Inpaspasing 24:24 - Dibshon Mengi-kan Ni Pansigshan

²⁴ Idi ẃaray edabas sa pigen akew, si Felix tan sota aseẃa ton si Drosila, ja Hodiyos, sha ali inpa‐odop si Pablo, ta piyan shen itenengan i ikowan nen Pablo ja maypangkep nonta pamati son Cristo Jesus.

Inpaspasing 24:24 Iomraidhean Croise

San Marcos 6:20

tep si Ari Hirodis, entakot to si Juan et toka ibaliẃi ni olay. Amta nen Hirodis ey si Juan, eshiyosan na too ja in‐apil nen Apo Shiyos ja mansilbi son si‐kato. Idi itenengan nen Hirodis i pan‐ikowan nen Juan, emandikat i nemnem to, nem piyan to met laeng karin mengitneng ni kowan to.

San Lucas 19:3

Piyan ton asen nem sipa si Jesus, nem sina‐dinan ira nonta eshakel la totoo, ta si Sakio, entikey ya too.

San Lucas 23:8

Si Hirodis, eman‐imdeng nga pasiya ni in‐oney to son Jesus, ta ebayag ga shinemag toy maypangkep son si‐kato, jet piyan ton pasiya ja asen, balang nem ẃaray dag‐en ngo nen Jesus ja milagro.

Inpaspasing 16:31

Jet kowan sha ni songbat sha son si‐kato ey, “Pamati ka son Apo Jesucristo jet maysedakan ka, tan angken sota ira pamiljam.”

Inpaspasing 20:21

Inkowan ko so ni Hodiyos, tan toon aliẃen Hodiyos, ey manbebawi ira ni basol sha et si Apo Shiyos i toshongen sha, tan inkowan ko son si‐kara ey pati‐en sha si Jesucristo, ja Apo tayo.

Inpaspasing 24:25

Jet si Pablo, intoro to ey say too, mesepol la nemnemen toy panmaptengan ni eshom, tan mesepol la tetngelen to shorog i bakdang to ja eg koma manbesol, asan kowan to pay ey ẃara aliy ma‐onod ja timpo ja onsangon emin i totoo son Apo Shiyos, jet si‐katoy pengigsheng nen Apo Shiyos no sipay maysedakan. Jet si Felix, timakot, jet kowan to ey, “Angken ondaw ka nin; no ẃaray ẃayak, pa‐odop taka mowan.”

Inpaspasing 26:22

Nem si Apo Shiyos i timolong son si‐kak nontan jet kaontolong pay ingkato niman. Isonga ẃara‐ak shiyay niman ja emengikowan niyay son si‐kayon nankengato tan angken pay so ni nankebaba. Jet enshiy eshom ma naka pan‐ikowan, nem eg sota inkowan met laeng ira da nonta para padto nonta bayag da ja naysolat, tan sota kowan nen Moises, ja kowan sha ey ẃara aliy ibetkag nen Apo Shiyos ja mengisedakan, jet sotan na mengisedakan, kowan sha ey kenshat ta manda‐kam ni digat asan ma matey, nem si‐katoy pilmiro ja manbiyag so nonta ira nanketey. Jet say kowan sha pay, tan angken si‐kak, sotan na mengisedakan ja si Jesus, si‐kato met laeng i ondawag ni nemnem ira nonta toon Hodiyos tan toon aliẃen Hodiyos.”

I-Galasia 2:16

Nem enshiy mi nandasinan shi eshom, ta edawag ey say kekosto‐i so nen Apo Shiyos so ni sakey ya too, sota pamati to bengat so nen Jesucristo, aliẃen sota pengonod to nonta bilin ja in‐awat nen Apo Shiyos so nonta apo min Hodiyos nonta bayag da. Jet angken si‐kami, emati kami son Jesucristo, jet si‐katoy kabol la kinosto‐an shakami nen Apo Shiyos; aliẃen sota pengonod ni bilin nonta bayag da. Ta sota toon emengonod bengat ni bilin nen Apo Shiyos nonta bayag da, ey enshiy pamati to son Cristo, angken sakey, enshiy en kosto‐an nen Apo Shiyos son si‐kara.

I-Galasia 2:20

Singa eteyak ja inpakidansara‐ak son Cristo shi koros, jet niman, sajay ya biyag ko, aliẃen sota sigod, no diket si Cristo iya ẃara ma son si‐kak. Isonga say emengitoshong ni biyag ko niman, sota naka pemati son Cristo ja Anak nen Apo Shiyos. Si‐katoy ebadeg i semek to son si‐kak, jet si‐katoy mismon etey shi koros say ikaro to sota istay ikarok koma.

I-Galasia 3:2

Iyay i piyan kon nemnemen jo. Ngantoy inpasing jon engawat aya ni Ispirito Santo nen Apo Shiyos? Ineẃat jo aya ja sobadit ni inpangonod jo nonta bilin ja nay‐awat so ni Hodiyos nonta bayag da? Enshi — ineẃat jo nonta inpamatiyo ni intenengan jon mapteng nga shamag ja pangkep son Jesucristo!

1 San Juan 5:1

Sota ira ememati ey si Jesus, si‐kato sota inbetkag ali nen Apo Shiyos shiya dobong, si‐karay podnon annak nen Apo Shiyos, jet sota ira ẃaray semek to son Apo Shiyos ja Maka‐anak son si‐kara, ẃara ngoy semek sha so nonta kait shen annak to.

San Judas 1:3

Si‐kayon ensemek ko, istay piyan kon pasiya ja mansodat son si‐kayo pangkep nonta inkaysalakan tayo ja pineshasan tayon emin ja emati. Nem niman, binediwan koy piyan kon isolat. Epilitanak ka mengadok son si‐kayo ey mesepol la eg jo i‐onod ja mesa‐datan i pamatiyo. Ta saja pamati tayo, in‐akan nen Apo Shiyos son si‐katejon too to, jet eg mesepol la ma‐shoman ta kompliton sigod, ẃaren emin.

Inpa-Amta Nen Jesucristo 14:12

Isonga mesepol la man‐enos kiton too nen Apo Shiyos, ja kaon‐onod so nonta bilin to, tan ememati so nen Jesus.