Inpaspasing 24:16 - Dibshon Mengi-kan Ni Pansigshan

¹⁶ Isonga si‐kak, naka dag‐ay kabaalan ko ja no mebedin, enshi komay nak panbesolan son Apo Shiyos, kasta met so ni totoo.

Inpaspasing 24:16 Iomraidhean Croise

Inpaspasing 23:1

Jet si Pablo, diritson insi‐ning to ira sota toray jet kowan to son si‐kara ey, “Si‐kayon a‐akik, amta nen Apo Shiyos ey mapteng i ẃared nemnem ko ingkato niman; enshiy amtak ka basol kon kebistigalan kod jay.”

I-Roma 2:15

Jet angken enshi son si‐kara sota bilin nen Apo Shiyos ja naysolat ja onoran sha, ma‐sas met laeng ey ẃared nemnem sha sota koston kowan ni bilin, jet shi deknara, ẃaray emengipa‐amta ey ngaaw i dingkara. Nem no sina‐shom, shaka dekna‐a ey enshiy basol sha.

I-Roma 9:1

Si‐kak, emati‐ak so nen Cristo, isonga agpayso iya ikowan ko di; aliẃen na naka man‐o‐owap. Amtak ey aliẃen o‐owap iya ikowan ko tep sota Ispirito Santo nen Apo Shiyos i emengitoshong niya nemnem ko. Say kowan ko, sajay: ebadeg i naka pengisekit ni kait kon Hodiyos. Naka mandeshingit ta pasiya ni olay kabol son si‐kara ja karada‐an ko. No mebedin koma, angken si‐kak et ngo i shosa‐en nen Apo Shiyos ingkatod ingka, jet angken maysi‐janak son Cristo, basta si‐katoy pemati‐an ni kait kon Hodiyos son Cristo. Nem eg met mebedin.

1 I-Korinto 10:32

Asas jon eg kayo mengi‐kan ni kedismaya‐an ira nonta makapiyan na memati koma son Cristo — Hodiyos ono sota aliẃen Hodiyos — tan karekayo pay mengi‐kan ni kedismaya‐an ira nonta kait jon emati.

1 I-Korinto 4:4

Ta si Apo Jesucristo, si‐katoy mengesas ali nonta obdak. Enshiy amtak ja nak nankolangan shi obdak; nem sotan na ẃared nemnem ko, aliẃen sotan i kaybidangan ko so nen Apo Shiyos ey naka mepiyal.

2 I-Korinto 1:12

Marinel kami ey sotan i dag‐en jo tep mapteng ni olay i inpasing mi son si‐kayo. Saja nemnem mi, mika sigorado‐a ey say mika pekikadẃa shi emin na totoo, agdalo son si‐kayo, si Apo Shiyos i engitoshong son si‐kami. Isonga podno ni olay i pangkep mi. Jet sajay, aliẃen na nemnem min dag‐en, no diket kaasi nen Apo Shiyos. Jet sajay i mika pan‐imdengi.

2 I-Korinto 4:2

Sajay ya obda min mengitosho, enshiy kabebaing ja mika dagdag‐a, ono na‐alas sa aramid min mika i‐em‐emot. Aliẃen mika pan‐olbora i too say memati ira. Say mika pan‐itoro, sota podpodnon kowan ni esel nen Apo Shiyos, aliẃen mika pansa‐dati ono mika pan‐a‐shomi. Sajay, amta nen Apo Shiyos et sajay bengat i mika pesing nga mengisekot ni bakdang mi shorog so ni totoo, say nemnemen sha ey mapteng kamin too.

1 I-Tisalonika 2:10

Si‐kayon mismo i maka‐amta, tan kasta met son Apo Shiyos ngo, amta to ey sota piyan ton mapteng nga dag‐en mi, si‐katoy dingka mi ni olay son si‐kayon emati et enshiy mebedaw nonta emin na dingka mi.

1 Timoteo 1:19

Jet say singa almas mo, sota makedsang nga pamatim tan sota mapteng nga nemnem mo. Nemnemnem mo ira jay ni olay, ta ẃaray eshom ma toon eg ira nannemnem ni mapteng, nakol ni epilshiy pamatira.

1 Timoteo 1:5

Say pangkep tayon memidin ni angken sipa, piyan tayon meẃad‐an ira ni semek ja mandepod mapteng nga nemnem, tan say memati iren kosto.

1 Timoteo 3:9

Tan mesepol pay ya topogen toy nemnem to nodta pamatin inpa‐amta nen Apo Shiyos ja enshiy showashowa to.

2 Timoteo 1:3

Naka man‐iyaman son Apo Shiyos, ja Shiyos met laeng ira da nonta ap‐apok. Etopog ga sota pansilbik son si‐katoy naka nemnemnema ja inges toy inpansilsilbi ira nonta ap‐apok nonta bayag da. No mansheẃatak son Apo Shiyos, takaka ida‐kam ni olay.

Tito 1:15

Sota ira maronong, ja mapteng i ẃared nemnem sha, mapteng ngon emin i pangkep sha. Nem sota ira ngaaw i ẃared nemnem sha, ja eg memati son Cristo, ngaaw ngon emin i pangkep sha, ta eg sha mala idasin i kosto tan ngaaw.

Hodiyos 10:22

Isonga niman ma, manshinel kito komen on‐esop so nen Apo Shiyos, ta singa edinisan i nemnem tayo et mapteng ma, jet singa na‐odsan kito pay ni inpanbonjag tayo. Isonga niman ma, no on‐esop kito son Apo Shiyos ja manshedjaw son si‐kato, enshi koma i showashowa tayo, ja makedsang tan podno i pamati tayo son si‐kato.

Hodiyos 13:18

Nem si‐kami, kamika menigorado ey mapteng i ẃared nemnem mi, ja enshiy mi nanbasolan son Apo Shiyos, tep sota koskosto ni olay i piyan min dag‐en. Isonga ireẃati jokami son Apo Shiyos.

Hodiyos 9:14

nem mas pay ya makedsang sota shala nen Cristo, ta intorong ni Ispirito Santo nen Apo Shiyos ja ẃara ni olay ingkatod ingka ey sota bakdang ton mismo i indaton to son Apo Shiyos; isonga enshiy kolang nontan na indaton to so ni bakdang to. Makedsang sota shaleto ja ondinis so nonta sigod ja ngaaw ja ẃared nemnem tayo ja kaondingding son si‐katejo, ja istay eg tayo so kon‐oran ni biyag ja kai‐akan nen Cristo, isonga mebedin na mansilbi kito ma so nen Apo Shiyos ja sibibiyag.

1 San Pedro 2:19

Ta say ka‐aporbali nen Apo Shiyos, sota toon mengenos ni kedsel ni kait ton too son si‐kato, no enosan to kabol ni toka pemati son Apo Shiyos. Nem mesepol la sajay ya digat ket aliẃen pengikesho to ni basol la dingka to.

1 San Pedro 3:16

Mesepol la tanshaaniyoy ogadiyo say enshiy jo dag‐en na kaydaw‐anan jo. No mapteng ni olay i ogadiyo, mebebaingan sota menoyshoy son si‐kayo ja kowan to ey enshiy kowinta ni inpamatiyo son Cristo.

1 San Pedro 3:21

Sajay i arig nonta shanom ma ebonjagan jo, ta si‐katoy naysalakanan jo. Say bonjag, aliẃen maypangkep ni inkalinis ni bakdang jo, no diket sota inshawat jo so nen Apo Shiyos ey pekawanan to sota naksheng den dingkayo tan say todongan shakejon mandisi ni basol. Isonga ẃaray kedsang ni bonjag ja mengisedakan, ta nan‐ongal si Jesucristo.