Inpaspasing 2:39 - Dibshon Mengi-kan Ni Pansigshan

³⁹ Ta sota Ispirito Santo ja inkari nen Apo Shiyos, para so ni emin na toon pinidi ton manbedin na too to, jet mayda‐kam kayo, pati sota ira annak jo, tan angken pay sota ira toon aliẃen kait tayon Hodiyos.”

Inpaspasing 2:39 Iomraidhean Croise

Inpaspasing 10:45

Jet sota ira ematin Hodiyos ja i‐Jopa ja ekidaw son Pedro, ireka emesshaaw, ta sota ira toon aliẃen Hodiyos, engawat ngo ira ni Ispirito Santo ja in‐akan nen Apo Shiyos.

Inpaspasing 14:27

Idi mimotok ira, inolnong shen emin ira sota ematid man et inkowan sha son si‐kara sota dingdingka nen Apo Shiyos son si‐kara nonta maramen shaka pantongpala sota obden inpiyal nen Apo Shiyos son si‐kara; kowan sha ey si‐katoy engipedobos ni pantoshora so nonta ira aliẃen Hodiyos say memati ira ngo.

Inpaspasing 15:14

Si Simon Pedro, inkowan to la nonta ekay i inpasing nen Apo Shiyos ja emili ni toon aliẃen Hodiyos nonta pilmiro ja manbedin ira ni too to.

Inpaspasing 15:3

Sajay iren inbetkag sha, nanshalan ira shi Ponisia, tan shima Samaria, jet inistoriyara so ni totood man i inpamati ira nonta toon aliẃen Hodiyos son Cristo. Idi intenengan sha iyay, ebadeg i imdeng ira nonta a‐aki shi pamati ja ẃara nodtan na dogad.

Inpaspasing 15:8

Jet si Apo Shiyos ja maka‐amta ni nemnem ni too, si‐kato met laeng i engipa‐sas son si‐katejo ey ineẃat toy toon aliẃen Hodiyos, ta inpan‐iyan to i Ispirito Santo to son si‐kara, ja inges toy inpasing to son si‐katejo nonta pilmiro.

I-Roma 11:29

Tep no ngarantoy inkari nen Apo Shiyos, si‐katoy medeka, eg mesa‐datan; jet sota Hodiyos ngo eshan i pinidi to ja engi‐ẃatan to ni kari to.

I-Roma 8:30

Sotan iren toon pinidi to, si‐karay ninemnem to ngo eshan ja mayda‐kam son si‐kato, jet si‐kara met laeng sota too ton toka kosto‐i niman. Jet si‐kara, i‐inges to ira so nen Cristo.

I-Roma 9:24

Jet si‐katejo sotan na pinidi nen Apo Shiyos ja too to; aliẃen emili bengat son si‐kamin Hodiyos, no diket angken son si‐kayon aliẃen Hodiyos.

I-Roma 9:4

Si‐kara sota sigod ja too nen Apo Shiyos jet ebadeg i kaasi to son si‐kara: si‐karay inpanbalin ton annak to, naytakshol pay son si‐kara sota emenenili ja emengipa‐sas ni kawasha to son si‐kara; nay‐awat pay son si‐kara sota bilin to; inkari to pay son si‐kara ey si‐karay ibilang ton too to, tan ẃara pay i eshom ma inkari to son si‐kara; tan naypiyal pay son si‐kara sota koston pesing shen manshedjaw son si‐kato.

1 I-Korinto 7:14

Ta si‐kam ja emati, say nayda‐kaman nonta aseẃam ni kaasi nen Apo Shiyos, si‐kam ja emati, jet angken sota annak jo, mayda‐kam ngo ira. Nem no isi‐jan mo sotan na aseẃam, singa naysi‐jan ngo sota annak jo shi kaasi nen Apo Shiyos.

I-Ipiso 1:18

Say shawat ko pay so nen Apo Shiyos, si‐kato komay ondawag ni nemnem jo say eẃatan jo sota maypangkep ni namnama ja ẃara son si‐kayo ni inpili shakejo so, tan eẃatan jo pay sota mapteng nga kari to, ey mayda‐kam kayo son Cristo ali, ta totoo tokayo.

I-Ipiso 2:12

Tan nontan pay laeng ja enshi kayo nin so nen Cristo, enshiy jo naybiyangan so nonta ira too nen Apo Shiyos ja Hodiyos, eg jo pay amta tan eg kayo nayda‐kam nodta kari nen Apo Shiyos; isonga istay enshin polos son si‐kayoy namnama, ta eg jo amtay podnon Shiyos.

2 I-Tisalonika 1:11

Nem say shawat mi ni olay son Apo Shiyos tayo ni maypangkep son si‐kayo, sapay koma ta ipakat toy panakabalin ton ontolong son si‐kayo, say maykeshi kayo nodta insagana to met laeng ja para son si‐kayo no ka‐onoran. Say tongpalen jon emin i mapteng nga joka nemnema niman na emati kayo son Cristo,

2 Timoteo 1:9

Si‐katoy engisedakan son si‐katejo, tan emili son si‐katejo met laeng ja manbedin ni too to, jet sajay i inpasing to son si‐katejo ta ebadeg i kaasi to. Sajay ngo eshan i plano to, ta sigod ja kinaasi‐an shakito pangkep so nen Cristo Jesus angken nonta eg pay laeng epalsowa iya dobong. Isonga sajay ya inpangisedakan to son si‐katejo, aliẃen sobadit nonta dingka tayon mapteng,

Hodiyos 3:1

Isonga si‐kayon a‐akik shi pamati ja pinidi ngo met laeng nen Apo Shiyos ja too to, si Jesus i mesepol la nemnemen tayo. Si‐katoy inbetkag ali nen Apo Shiyos jet may‐eshig ey si‐katoy kangeto‐an na pari ni pamati tayo.

Hodiyos 9:15

Isonga niman na binediwan nen Apo Shiyos sota sigod ja bilin to, teẃiren ma ira nonta toon pinidi to sota inkari to nontan da, ja kaysedakan sha ingkatod ingka, jet si Cristo i kabol, ta etey say eg kito meshosa pangkep nonta ngaaw wa aramid tayo ja edaga nonta timpo nonta sigod ja bilin.

1 San Pedro 5:10

Saja digat ja joka da‐da‐kami niman, eg mebedjag i panda‐kam jo tep si Apo Shiyos, ja eg nagshengan i toka pengaasi, eg shakejo i‐oway. Si‐katoy emili son si‐kayo say maybidang kayo nodta too tod dangit ingkatod ingka kabol ni inpamatiyo son Cristo. Isonga kenshat ta isingpet tokejo, pan‐odi tokejo nodta sigod ja mapteng nga kasesaad jo, tan pekedsang shakejo.

2 San Pedro 1:10

Isonga si‐kayon a‐akik shi pamati, enshiy panshowashowa‐an jo ey pinidi shakejo nen Apo Shiyos ja manbedin ni too to, nem mesepol la dag‐en jon emin i kabaalan jon mengi‐nam ni ogadiyo nodta pinidi‐an shakejo so. Ta no sajay ya ogadin inkowan ko la ket si‐katoy dag‐en jo, ẃara kayo son Apo Shiyos ni olay ja eg kayo maysi‐jan son si‐kato ingkatod ingka.

2 San Pedro 1:3

Si Apo Shiyos, ta ebadeg i panakabalin to, in‐akan toy emin na kasapolan tayo say meẃad‐an kito ni eshiyosan na ogadi. Jet say inpasing to, inpalobos ton amta‐en tayo i maypangkep son Cristo ja emili son si‐katejo ja memati, say mayda‐kam kito shi shayaw to tan say ingesen tayoy ogadi to.

Inpa-Amta Nen Jesucristo 17:14

Jet sajay ira, kobaten sha sota Kalniro, nem sota Kalniro, ebaken to ira, ta si‐katoy Apo ni emin na apo, tan si‐katoy Ari ni emin na ari. Jet sota ira too ton pinidi to, ja ebadeg i pamatira, ja imonod son si‐kato, mayda‐kam ngo ira son si‐kato ni pengebak to.”

Inpa-Amta Nen Jesucristo 19:9

Jet sota anghil, kowan to son si‐kak ey, “Isodat mo iyay: Man‐imdeng ira sota na‐awis ja mekilikob so nonta Kalniro ni pengesawa to.” Jet kowan to pay son si‐kak ey, “Sajay ya inkowan ko, podnon esel nen Apo Shiyos.”