Inpaspasing 2:33 - Dibshon Mengi-kan Ni Pansigshan

³³ Jet niman, ẃared apit ni kanawan nen Apo Shiyos; isonga in‐akan nen Ameto sota Ispirito Santo son si‐kato ja inkari to, jet sajay ya Ispirito Santo iya intenengan jo niman tan inon‐an jo ja in‐awat ngo nen Jesus son si‐kami.

Inpaspasing 2:33 Iomraidhean Croise

San Mateo 28:18

Jet si Jesus, imesop son si‐kara, jet kowan to ey, “Say inkowan nen Apo Shiyos, si‐kak i mengitoshay ni emin na ẃared dangit tan shiya dobong.

San Marcos 16:19

Jet si Apo Jesus, idi naksheng nga inkowan to iyay son si‐kara, inda ma nen Apo Shiyos shi naykayang et en timongaw shi apit ni kanawan nen Apo Shiyos.

San Lucas 24:49

Jet iyay pay: ibetkag ko sota Ispirito Santo nen Apo Shiyos ja Amak ja inkari ton pan‐iyan to son si‐kayo. Nem panseked kayo nin shiya Jerusalem ingkatod eẃaten jo sota panakabalin nonta Ispirito Santo ja edapod dangit.” Kowan nen Jesus.

San Juan 14:16

Ikowan ko son Amak ey pan‐iyan to ali sota Ispirito Santo to son si‐kayo, jet si‐katoy ontolong son si‐kayo ingkatod ingka, ja si‐katoy mengiredan son si‐kayo shi podno. Saja tood ja dobong ja eg emati son si‐kak, eg mebedin na man‐iyan son si‐kara i Ispirito Santo nen Apo Shiyos, ta eg sha am‐amta, tan eg sha indasin. Nem si‐kayo, amtayo mango, ta ẃara son si‐kayo ja man‐iyan ni olay.

San Juan 14:26

Sota Ispirito Santo, si‐katoy ibetkag ali nen Amak son si‐kayo ja ontolong son si‐kayo, tep naykasakey kayo son si‐kak, say eg jo dibkan sota emin na inkokowan ko la son si‐kayo. Jet sotan i mengitosho son si‐kayo ni emin.

San Juan 15:26

Sota Ispirito Santo ja mandepo so nen Amak, si‐katoy ontolong son si‐kayo say eẃatan joy podno. Ibetkag ko di ja man‐iyan son si‐kayo, jet si‐kato met laeng i mengipaneknek ni maypangkep son si‐kak.

San Juan 17:5

Jet niman Ama, si‐kam i mengi‐odi nonta sigod ja shayaw ko ngo eshan nonta ẃara‐ak shi kad‐an mo, nonta eg pay laeng epalsowa iya dobong.

Inpaspasing 1:4

Idi nonta esa‐nop ira son si‐kato, inkowan to son si‐kara ey, “Karejo nin idekjas i Jerusalem, no diket seked jo nin sota Ispirito Santo nen Apo Shiyos ja inkari to, ja pan‐iyan to so ni totoo. Inkowan ko met iyay nontan.

Inpaspasing 10:45

Jet sota ira ematin Hodiyos ja i‐Jopa ja ekidaw son Pedro, ireka emesshaaw, ta sota ira toon aliẃen Hodiyos, engawat ngo ira ni Ispirito Santo ja in‐akan nen Apo Shiyos.

Inpaspasing 2:17

ja esel met laeng nen Apo Shiyos, ja kowan to ey, ‘Shi ka‐onoran alin timpo, sajay i pesing ko: pan‐iyan ko i Ispiritok so ni emin na totoo jet sota ira annak sha, mengipadto ira ni maypangkep son si‐kak, jet ẃaray pa‐amtak so ni bedoleki tan nankedakay shi kokokip sha.

Inpaspasing 5:31

Si Apo Shiyos, inpanbiyag tos Jesus, jet niman, inpansaad to; isonga ẃara shi apit ni kanawan nen Apo Shiyos, ja si‐katoy Pangolo tan Mengisedakan. Jet in‐aknan toy tood Israel ni ẃaya sha ja manbebawi, say omasen nen Apo Shiyos i basol sha.

I-Roma 5:5

Jet sota tayoka namnama‐a ja tayoka sesseskera, agpayson tongpalen nen Apo Shiyos, ta ebadeg ga pasiyay semek to son si‐katejo. In‐akan nen Apo Shiyos i Ispirito Santo to son si‐katejo, isonga amta tayo ey ebadeg i semek to son si‐katejo.

I-Galasia 3:14

Sajay i inpasing nen Jesucristo say si‐kayon aliẃen Hodiyos, no memati kayo son Cristo, mayda‐kam kayo nodta bindisiyon nen Apo Shiyos so nen Abraham, tan say eẃaten tayon emin sota inkari ton Ispirito Santo to.

I-Ipiso 1:13

Jet niman, ẃara kayo ngo son si‐kato. Intenengan jo sota podnon esel nen Apo Shiyos, ja engipa‐amta ni kaysedakan jo et emati kayo son Cristo. Jet si Apo Shiyos, in‐awat to sota inkari ton Ispirito Santo say man‐iyan son si‐kayo, ja singa malka to son si‐kayo ja mengipa‐sas ey kokowa shakejo ma.

I-Ipiso 4:8

Sajay ya inpangi‐kan to ni kaasi, naypadto met nonta bayag; isonga ẃara iya naysolat ja esel nen Apo Shiyos ja kowan to ey, “Idi dimaw shi naykayang, eshakel i intakin ton piriso, jet ẃaray inẃaris ton pansigshan ni totoo.” Kowan nonta naysolat.

Tito 3:6

Saja inpan‐iyan ton Ispirito Santo to son si‐katejo, si‐katoy on‐anay ni kasapolan tayo, jet sajay ya Ispirito Santo ket in‐akan to son si‐katejo pangkep so nen Jesucristo ja engisedakan son si‐katejo.

Hodiyos 10:12

Nem si Cristo, pinsak bengat ja indaton toy mismon bakdang to say ma‐kal i basol ni totoo. Sotan na inpasing nen Cristo i mapteng nga daton ja kekosto‐i nen Apo Shiyos ingkatod ingka; jet angken enshi may eshom ma maydeton. Isonga idi naksheng iyay, dimaw da shi dangit si Cristo jet inpatongaw nen Apo Shiyos shi petek ni kanawan to.

Hodiyos 2:9

Nem say inamta‐an tayon naksheng den etongpal nodtan na naysolat, sajay: si Jesus, naybaba nin ni sanka‐atikan ey say sota ira anghil, nonta kawasha tod ja dobong, nem niman, nay‐aknan ni ebadeg ga shayaw tod dangit, tep nanda‐kam ni ebadeg ga digat shiya dobong tan etey pay. Jet sotan i ka‐amta‐an ni kaasi nen Apo Shiyos so ni totoo, ta say kabol la eteyan nen Jesus ket say ikaro toy basol ni emin na totoo.

1 San Pedro 1:21

Niman ma, kabol ni inpamatiyo son Cristo, marinel kayo so nen Apo Shiyos. Inpan‐ongal nen Apo Shiyos si Cristo, tan in‐aknan to pay ni ebadeg ga shayaw tod dangit, isonga niman, si‐kato bengat i joka panshindi tan pannamnama‐i.

1 San Pedro 3:22

Idi nan‐ongal si Jesucristo, dimaw da shi dangit jet ẃara niman shi petek ni kanawan nen Apo Shiyos, ja emekitoshay son si‐kato. Intorayan ton emin sota ẃared dangit: sota ira anghil tan sota eshom ma ẃaray saad to ono panakabalin to.