Inpaspasing 18:3 - Dibshon Mengi-kan Ni Pansigshan

³ Jet eki‐iyan nin si Pablo son si‐kara, ta nan‐i‐inges sa say obdaren tedo, ireka mengemag ni tolshen pankampo‐an.

Inpaspasing 18:3 Iomraidhean Croise

1 I-Korinto 4:12

Isonga kamika man‐obden pasiya say ẃaray osalen mi ni kasapolan mi, ta enshiy emengi‐kan. Jet no ẃaray ngaaw wa ikowan sha son si‐kami, eg mi ibales, no diket say kowan mi, si Apo Shiyos komay onbindisiyon son si‐kara. Jet no ẃaray memedigat son si‐kami, mika itoled.

1 I-Korinto 9:14

Inges to met laeng sota ira emengikowan ni mapteng nga shamag maypangkep son Jesucristo. Say kowan nen Apo Jesus, sota ira emengitosho, say pengal‐an sha koma ni kasapolan sha, sota ira shaka pantod‐i.

1 I-Korinto 9:15

Nem si‐kak, ekak inosal ira jay ya istay palobos sa dag‐en ko. Jet sajay ira den insolat ko, aliẃen naka mengshaw ni kasapolan ko. Mapmapteng ja angken meteyak ni agang ko nem say nak mankekkekshaw, nakol ni damsisen sha sota naka pan‐itoro ja mapteng nga shamag maypangkep son Jesus. Baka kowan sha ey sota kenen koy naka nemnema.

1 I-Korinto 9:18

Jet ngarantoy kon‐oren ko? Enshiy eshom nem eg sajay: Sota naka pengitosho nonta mapteng nga shamag maypangkep son Cristo, dibshi, ekak panbedjad ira sota naka pan‐itod‐i. Tan say sakey pay, ekak inosal sota istay palobos sa pengshaw ko ni mesepol ko so nodta ira naka pantod‐i.

2 I-Korinto 11:7

Nem baka apil i ẃared nemnem jo son si‐kak, ja kowan jo ey inbabak i kina‐apostol ko, ta enshiy nak siningil son si‐kayo nonta intorok sota mapteng nga shamag ja edapo so nen Apo Shiyos. Nem pansigshan joy kabol la ekak dingka‐an so nontan.

2 I-Korinto 11:9

Jet nonta ẃara‐ak son si‐kayo, enshiy kowan ko ey mengshawak son si‐kayo no ẃaray mesepol ko. Sota ira a‐aki shi pamati ja i‐Masidonia, si‐kara i engimotok ni mesepol ko nontan. Ta ekak kosto nontan ja ẃaray mankastos son si‐kayo ni kabol ni kompormin mesepol ko. Jet no ondawak da mowan, satan met laeng i dag‐en ko.

2 I-Korinto 12:13

Jet enshi met i nak inpabor so ni emati shima eshom ma dogad ja ekak ngo inpabor son si‐kayo. Say amtak bengat ja singa inpabor ko son si‐kara, sota inpangados sha ni kasapolan ko. Jet pakaẃani jowak ni sajay ya nankolangan ko, ta eg takejo ngo inpangados!

1 I-Tisalonika 2:9

Jet si‐kayon a‐akik shi pamati, mebedin na eg jo dinibkan pay laeng sota itsora ni mika pansepol ni panbiyag mi nontan. Angken edabi, tan ka‐akawan, kamika man‐obda ni panbiyag mi, ta en‐asneng kamin ẃaray mankastos son si‐kayo maypangkep son si‐kami, ni mika pengikowan nonta mapteng nga shamag ja edapo so nen Apo Shiyos.

1 I-Tisalonika 4:11

Jet daga jon emin i kabaalan jon manbiyag ga etalna; karekayo mekibiyang shi kedagdag‐a ni kait jo. Nem pan‐obda kayo et ni panbiyagan jo. Ta sajay i inbilin mi son si‐kayo nontan pay laeng.