Inpaspasing 18:15 - Dibshon Mengi-kan Ni Pansigshan

¹⁵ Nem no sota maypangkep bengat ni esel, ono maypangkep ni ngaranton nay‐apilan tod dinteg jo, ja eg jo pan‐i‐inawatan, mesepol la si‐kayo ngon shorog i ontongtong so; enshiy nak kaybiyangan; aliẃen si‐kak i en mengigsheng so.”

Inpaspasing 18:15 Iomraidhean Croise

San Mateo 27:24

Idi indasin ma nen Pilato ey enshiy pesing ton mengibediw son Jesus, tan ninamnama to pay ey ẃara aliy kolo ja medeka, en nanbolo shi sango‐an ira nonta totoo, ta si‐katoy ogadira nontan da no piyan shen ipa‐sas ey enshi may kaybibiyangan sha shi dag‐en ni eshom ma too. Isonga inkowan to ey, “Enshiy basol ko no mebono iyay ya too; olay tokajo ngo!”

San Mateo 27:4

jet kowan to ey, “Nanbasolak ka pasiya! Ta inbaag ko sota toon enshiy basol to son si‐kayo jet niman pebonoyo gayam!” Nem kowan sha son si‐kato ey, “Enshiy mi naybiyangan nitan; olay toka ngo.”

San Juan 18:31

Jet si Pilato, kowan to son si‐kara ey, “No sajay ya too ket nanbasol, alejo et tongtong jo ngo shi dinteg jo.” Nem sota ira Hodiyos, simongbat ira ja kowan sha ey, “Eg met maypedobos shi dinteg jon i‐Roma ey onbono kami; isonga eg mebedin.”

Inpaspasing 18:13

jet kowan sha ni sharom sha ey, “Sajay ya too, si‐kato i emengeẃis ni totoo say apil i pesing shen manshedjaw son Apo Shiyos. Emaykontra shi dinteg min Hodiyos.”

Inpaspasing 23:29

Jet say sinepolan ko ja shaka panpebesoli so, sota maypangkep bengat ni dinteg sha ja Hodiyos, nem enshiy basol to ja kabol la to kebono‐an, ono to kaybedoran.

Inpaspasing 25:11

No bilang ey si‐kak ket ẃaray dingkak ja ngaaw wa aramid, ey ikesheng jon patey i karo to, ekak sopngilen, ontolokak. Nem enshi met! Sota kowan sha ey basol ko, aliẃen podno. Isonga angken sipa, enshiy en mengi‐ẃat son si‐kak son si‐kara. Sota ari shi Roma i ikamangan ko so ni kasok!”

Inpaspasing 25:19

Nem say eg sha bengat pan‐i‐inawatan, sota maypangkep ni rilihiyon shen Hodiyos, tan maypangkep nonta toon etey da ja si Jesus i ngaran to, ta si Pablo, say kowan to, nanbiyag mowan iyay den too.

Inpaspasing 26:3

Ta si‐kam, amtam ma emin i ogadi tayon Hodiyos tan sota eg tayo pan‐i‐inawatan. Jet say shawat ko son si‐kam, no mebedin, anosim ja itenengan iya ikowan ko.

1 Timoteo 1:4

Ikowan mo son si‐kara ey isalsheng sha sota shaka dagdag‐a ja shaka pemati nonta shiba ni toon bayag, tan shaka pemasa ni olay nonta ngarangaran ni ap‐apora nonta bayag da. Ta sajay i mengi‐kan ni panshowashowa‐an ni pamati ni eshom. Say piyan nen Apo Shiyos, saksakey komay pamati son Cristo, jet sota kowan ni eshom ma tood Ipiso, enshiy to itolong pangkep ni pengonod son si‐kato.

1 Timoteo 6:4

sotan na too, edastog, enshiy amta to. Sotan na toro to, si‐katoy emengi‐kan ni kolo ja pansosongbatan, ono panbabakalan maypangkep ni esel bengat. Jet say pantongpalan niyay, apal, bonget, kesekitan ni nemnem ni eshom, tan eg panpipiniyal.

2 Timoteo 2:23

Araẃi‐im sota dinedokon tabtabal ja enshiy silbi to, ta amtam met ey say pantongpalan niyay ket bakal.

Tito 3:9

Nem mesepol la eg ka mekibibiyang nonta enshiy silbi ton tabtabtabal maypangkep ni rilihiyon, ono sota pamati ja maypangkep ni ngarangaran ni ap‐apo sha la, jet kareka mekibekal ono mekisongbat ni maypangkep nonta bilin ni Hodiyos nonta bayag da, ta sotan na pesing, enshiy silbi to, enshiy to itolong.