Inpaspasing 13:39 - Dibshon Mengi-kan Ni Pansigshan

³⁹ Jet emin na basol ja eg mebedinan nonta bilin ja nay‐awat so nen Moises, mebedin na mepekawan shi pamati bengat son Jesucristo.

Inpaspasing 13:39 Iomraidhean Croise

San Lucas 10:25

Waray sakey ya maistoro ni dinteg ni Hodiyos; dimaw son Jesus sa kowan to ey peshasen to no kas‐anoy katekal nen Jesus. Kowan to son Jesus ey, “Maistoro, ngantoy kowan mo ja dag‐en ko say eẃaten koy biyag ja enshiy to engintegan?”

San Lucas 10:28

Kowan nen Jesus ey, “Kostoy songbat mo. Jet no onoren mo iyay, ja dag‐en mo, eẃaten mo sotan na biyag ja insalodsod mo.”

San Lucas 18:14

Jet intoloy nen Jesus ey, “Ikowan ko son si‐kayo, sajay ya para singil ni bowis, si‐katoy kinosto‐an nen Apo Shiyos asan ka‐akad shi baley to; nem sota Parisiyo, eg to kinosto‐an. Sota toon mengingeto ni bakdang to shorog, si‐kato et ngo mowan i maybeba; jet sota toon toka ibaba shorog i bakdang to, si‐katoy mayshedjaw.” Kowan nen Jesus.

San Juan 1:17

Siya, si‐kato si Jesucristo et inpawasha toy semek shiya dobong. Jet si Moises ngo nonta bayag da, inpawasha to sota sigod ja bilin nen Apo Shiyos, nem si Jesucristo i engitosho ni podnon olog nontan na bilin.

San Juan 5:24

Kinapodpodno iya ikowan ko son si‐kayo. Sota memati nonta ikowan ko tan memati son Amak ja engibetkag ali son si‐kak, si‐katoy eẃad‐an ni biyag ja enshiy to engintegan, jet eg to da‐kaman na meshosa, ta ẃara son si‐kato sota biyag ja edapo son Apo Shiyos.

Inpaspasing 10:43

Jet angken sota emin na para padto nen Apo Shiyos nonta bayag da, insigod shen inkowan ey emin na toon memati son si‐kato, mepekawanan i basol sha. Ta si Jesus i inpiyalan nen Apo Shiyos ja memekawan ni basol.”

I-Roma 10:10

Ta no mismon si Cristoy ẃared nemnem mo ja pinatim, kosto‐an toka nen Apo Shiyos; jet no mismon pa‐amtam ngo shi eshom i inpamatim, maysedakan ka.

I-Roma 10:4

Sota bilin nen Apo Shiyos nonta bayag da, eg ma mansilbi niman ta binediwan to ni indaw ali nen Cristo; isonga si Cristoy singa engintegan ni sakop nonta sigod ja bilin. Jet niman, emin na memati son si‐kato, kosto‐an nen Apo Shiyos.

I-Roma 3:19

jet amta tayo ey sota kowan nonta bilin ja nay‐awat nonta bayag da, say kaytoshongan to, sota ira toon nay‐awatan to ngo ja Hodiyos. Jet say kabol la naysolatan nontan, say angken sipen too, mayda‐kam ira ngo ja enshiy sha idason son Apo Shiyos, tan say amta‐an pay ni emin na tood ja dobong ey ẃaray ikaro sha so nen Apo Shiyos ja basol sha.

I-Roma 3:20

Ta angken sipen too, enshiy kosto‐an nen Apo Shiyos ni kabol bengat ni pengonod to so nonta kowan ni bilin ja nay‐awat nonta bayag da. Ta sotan na bilin, si‐katoy mengipa‐amta bengat ey ẃaray basol tayon totoo.

I-Roma 4:15

Enshiy eshom ma tayo tineẃid shima bilin na nay‐awat so ni Hodiyos nem eg sota keshosa ali ni totoon eg imonod so. Sajay i itsora ni angken nganton bilin, ta no ẃaray amtam ma bilin, ey eg mo onoren, basol mo.

I-Roma 4:24

no diket si‐katejo ngo ket maybidang kito ngo ey enshiy basol tayo, no memati kito son Apo Shiyos ja inpan‐ongal so nen Jesus ja Apo tayo.

I-Roma 5:1

Niman ma, ta emati kito so nen Cristo, kinosto‐an shakito ma nen Apo Shiyos jet mapteng may pengidmang nen Apo Shiyos son si‐katejo; eg shakito ma shosa‐en. Sajay i kabol la eteyan nen Jesucristo ja Apo tayo shi koros;

I-Roma 5:20

Nonta nay‐awat sota bilin nonta bayag da son Moises, singa inparakel to et i basol ni too tep inamta‐an sha sota bilin nen Apo Shiyos, nem eg sha inbi‐jag sota shaka dagdag‐a ja ngaaw. Nem angken na emanba‐deg nontan i basol tan emankaiweshis, mas ebadbadeg ngo eshan i kaasi nen Apo Shiyos.

I-Roma 5:9

Sota naybokbok ka shala nen Cristo nonta inkatey to shi koros i kaybidangan tayo ma ey singa enshiy basol tayo; isonga ẃaray namnama tayo ma ja isalakan shakito no onsabi sota timpon penosa nen Apo Shiyos so nonta ira eg emati.

I-Roma 8:1

Owen agpayso, angken saman i kakapoy ni bakdang tayo, eg shakito shosa‐en nen Apo Shiyos, basta ẃara kito et so nen Cristo Jesus.

I-Roma 8:3

Sota kowan nonta bilin nen Apo Shiyos ja naysolat nonta bayag da ket eg kabaalan ni toon tongpalen na emin sotan tep ekapoy i too. Isonga sotan na bilin, eg to kabaalan na mengisedakan ni too. Nem si Apo Shiyos, say inpasing to ja mengisedakan son si‐katejo, inbetkag to ali sota Anak to, jet nay‐inges i bakdang tod bakdang tayo, nem say nay‐apilan ni bakdang tayon too, mabesol i bakdang tayo. Jet sotan na Anak to, si‐katoy engikesho nonta basol tayo. Siya, idi etey sota bakdang nen Cristo, na‐abak i basol; enshi malay kedsang ton ontengel ni too.

I-Roma 9:31

Nem sota ira Hodiyos et ngo mowan, say kowan sha ket, kosto‐an kono ira nen Apo Shiyos ja sobadit ni itongpal sha so nonta bilin to ja naysolat nonta bayag da, nem enshi, ta eg sha kabaalan na onoren na emin.

1 I-Korinto 6:11

Waray eshom nontan da son si‐kayo ja inges niyay i aramid to. Nem niman ma, ta emati kayo son Apo Jesucristo, tan ẃara sota Ispirito Santo nen Apo Shiyos son si‐kayo, epakaẃanan ira jay den aramid jet may‐eshig ey edinis kayo ma. Too kayo ma nen Apo Shiyos, ja para mansilbi son si‐kato, jet si Apo Shiyos, kinosto‐an tokejo ngo.

I-Galasia 2:16

Nem enshiy mi nandasinan shi eshom, ta edawag ey say kekosto‐i so nen Apo Shiyos so ni sakey ya too, sota pamati to bengat so nen Jesucristo, aliẃen sota pengonod to nonta bilin ja in‐awat nen Apo Shiyos so nonta apo min Hodiyos nonta bayag da. Jet angken si‐kami, emati kami son Jesucristo, jet si‐katoy kabol la kinosto‐an shakami nen Apo Shiyos; aliẃen sota pengonod ni bilin nonta bayag da. Ta sota toon emengonod bengat ni bilin nen Apo Shiyos nonta bayag da, ey enshiy pamati to son Cristo, angken sakey, enshiy en kosto‐an nen Apo Shiyos son si‐kara.

I-Galasia 2:19

Ta sotan na bilin ja in‐awat nen Apo Shiyos nonta bayag da, si‐katoy singa bimono son si‐kak ta ekak baalan na dag‐en sota kowan to, jet niman, kowinta ey eteyak maypangkep nontan na bilin, jet say manbiyagak ma son Apo Shiyos.

I-Galasia 3:8

Sigod iyay ya esel nen Apo Shiyos ja naysolat nonta bayag da ja kowan to ey sota ira toon aliẃen Hodiyos, kosto‐an met laeng nen Apo Shiyos ira maypangkep ni pamatira bengat. Kowan met nen Apo Shiyos son Abraham nontan da ey, “Mapteng aliy panpa‐no‐an ni totood emin na ka‐ili‐ili, jet si‐kam Abraham i kabol la kayda‐kaman sha.” Kowan nen Apo Shiyos.

I-Galasia 5:3

Asan iyay pay i ikowan ko. Sota ira toon on‐onod ni sakey ya ogadi ni Hodiyos, may‐eshig ey singa naypagod ira ta mesepol la onoren shen emin sota bilin ni Hodiyos.

Hodiyos 10:11

Sota ira papashi ni Hodiyos, inakew wa ẃara ired ma shaka pengi‐kani ni daton, jet ememinshakel la sotan met laeng i itsora ni shaka pengileton, nem sajay ya daton sha, eg to kabaalan na mengkal ni basol.

Hodiyos 10:4

Isonga angken sota shala ni baka tan shala ni kanshing i shaka idaton ni olay, eg mebedin na sotan i on‐anay ja mengkal ni basol sha.