Inpaspasing 10:36 - Dibshon Mengi-kan Ni Pansigshan

³⁶ Amtayo met ey si‐kamin Hodiyos ja i‐Israel, si‐kamiy inbetkagan to so nen Jesucristo say to ikowan no ngarantoy dag‐en mi say kosto‐an shakami nen Apo Shiyos, jet si‐kato met laeng sota Apo ni toon emin, pati si‐kayon aliẃen Hodiyos.

Inpaspasing 10:36 Iomraidhean Croise

San Mateo 10:6

no diket say daẃan jo bengat, topog jon ondaw nodta kad‐an ni kait tayon Hodiyos ja singa may‐eshig ey kalniron imaraẃi.

San Mateo 11:27

Jet inkowan to pay ey, “Si‐kak bengat i inpiyalan so nen Amak ni emin. Si‐kak bengat i maka‐amta ni emin na maypangkep son si‐kato, tan si‐kato ngo bengat i maka‐amta son si‐kak ka Anak to. Isonga sota piyan kon pengitosho‐an maypangkep ni pantoshayan nen Apo Shiyos, si‐katoy itoro‐an ko so.”

San Mateo 28:18

Jet si Jesus, imesop son si‐kara, jet kowan to ey, “Say inkowan nen Apo Shiyos, si‐kak i mengitoshay ni emin na ẃared dangit tan shiya dobong.

San Lucas 24:47

Tan say inpadtora pay, kowan sha ey maytosho shi emin na ka‐ili‐ilin sakop niya dobong ey mesepol la manbebawi komay totoo ni basol sha say pekawanan ira nen Apo Shiyos. Inpadtora pay ey say mengitosho, si‐kayon mengi‐edagey son si‐kak, jet ishogi jo konod Jerusalem. Si‐kayoy ondaga so niyay tep mismon inon‐an jo iya epasemak son si‐kak niman na timpo.

Inpaspasing 10:37

Amtayo met pay sota edagdaga shi intiron Jodia manshoki shi Galilia nonta naksheng nga intoro nen Juan i maypangkep nonta toka pemonjag.

Inpaspasing 11:19

Nonta naksheng nga binonora si Esteban, inshogi sha men pedigaten ima eshom ma emati, jet sajay iren emati, ebokal ira. Simbi ni eshom i Ponisia, Cyprus tan Antiok, jet intoro shed man i mapteng nga shamag pangkep son Jesus. Nem say intod‐an sha bengat shiman, sota ira Hodiyos.

Inpaspasing 13:32

Si‐katoy kabol la kawasha‐an mi did jay, ta ikowan mi son si‐kayo i mapteng nga shamag, ey sota kari nen Apo Shiyos so nonta appo tayo da,

Inpaspasing 13:46

Nem si Pablo nen Bernabe, mas timoled ira ja man‐a‐sel, jet kowan sha ey, “Mesepol la si‐kayon Hodiyos nin i kaykowanan ni esel nen Apo Shiyos, nem niman ta binedaw jo, ja endedamsis jo sota biyag ja enshiy to engintegan ja eg jo koston eẃaten, ondaw kami ma shi toon aliẃen Hodiyos jet si‐kara may pengitosho‐an mi.

Inpaspasing 2:36

“Isonga si‐kayon emin ja kait kon Hodiyos, mesepol la amta‐an jon pasiya ey si Jesus ja inpaidansayo shi koros, si‐kato sota inpanbalin nen Apo Shiyos ni Apo tayon emin! Si‐kato sota singsingked tayon inkari nen Apo Shiyos ey ibetkag to din mengisedakan!” Sajay i kowan nen Pedro.

Inpaspasing 5:31

Si Apo Shiyos, inpanbiyag tos Jesus, jet niman, inpansaad to; isonga ẃara shi apit ni kanawan nen Apo Shiyos, ja si‐katoy Pangolo tan Mengisedakan. Jet in‐aknan toy tood Israel ni ẃaya sha ja manbebawi, say omasen nen Apo Shiyos i basol sha.

I-Roma 14:9

Sajay i kabol la eteyan nen Cristo, tan nanbiyagan to mowan, say si‐katoy Apo ira nonta ẃara pay laeng shi biyag, tan sota ira nanketey da.

I-Roma 5:1

Niman ma, ta emati kito so nen Cristo, kinosto‐an shakito ma nen Apo Shiyos jet mapteng may pengidmang nen Apo Shiyos son si‐katejo; eg shakito ma shosa‐en. Sajay i kabol la eteyan nen Jesucristo ja Apo tayo shi koros;

1 I-Korinto 15:27

Amta tayo ey itorayan nen Criston emin, pati sota patey, ta say kowan nonta padton naysolat nonta bayag da, “Si Apo Shiyos i engigsheng ey sotan aliy mengitoshay ni emin.” Jet sajay ya kowan to, edawag ey aliẃen pati si Apo Shiyos ket, itorayan nen Cristo.

1 I-Korinto 15:47

Sota pilmiron tood ja dobong ja si Adan, depok i edapo‐an to. Nem sota paris nen Adan ja si Cristo, edapod dangit.

I-Pilipos 2:11

Jet angken sipa, ikowan sha met laeng ey si Jesucristo, si‐katoy Apo, jet sotan i kayshedjawan met laeng nen Apo Shiyos ja Ameto.

I-Kolosas 1:20

Jet ninemnem to pay ey sajay ya Anak to, si‐katoy mengolnos ni emin na ẃared dangit, tan shiya dobong, say may‐odi met laeng son si‐kato, ja tongpalen shay piyan to. Jet say kabol la nay‐oli‐an ni emin ja angken nganto son Apo Shiyos, sota inkatey nen Cristo shi koros ja imayos i shaleto.

Hodiyos 1:2

nem niman ma, simabi sota koston timpo, isonga ẃaray inpa‐amta to son si‐katejo ngo jet sota Anak ton mismo i inosal ton engipa‐amta son si‐katejo. Si‐katoy inpandaga nen Apo Shiyos ni dobong, jet si‐kato pay i shinotokan to ja makakokowa ni emin ingkatod ingka.

Hodiyos 13:20

Jet niman, say shawat ko ngo son Apo Shiyos, si‐katon mismo komay mengi‐kan son si‐kayo ni emin na kasapolan jo, say dag‐en jo ni olay sota piyan to; tan say shawat ko pay, panbedin tokejo koma ni toon masi‐met ja mandeka ni olay nonta mengi‐kan met laeng ni pan‐imdengan to, pangkep son Jesucristo. Sajay i shawat ko son Apo Shiyos tep si‐kato met laeng i mismon kedepo‐i ni talna. Si Apo Shiyos, inpan‐ongal to si Jesus nonta etey shi koros. Nonta etey si Jesus shi koros, naybokbok i shaleto ja engipilmi nonta badon bilin ja insa‐dat nen Apo Shiyos nodta sigod jet ẃara ni olay iyay ya bilin ingkatod ingka. Jet niman ma, si Apo Jesus i Kangeto‐an na emengiredan ni too to, jet si‐katoy mayshedjaw ni olay ingkatod ingka. Siya, satan da.

1 San Pedro 3:22

Idi nan‐ongal si Jesucristo, dimaw da shi dangit jet ẃara niman shi petek ni kanawan nen Apo Shiyos, ja emekitoshay son si‐kato. Intorayan ton emin sota ẃared dangit: sota ira anghil tan sota eshom ma ẃaray saad to ono panakabalin to.

Inpa-Amta Nen Jesucristo 1:18

Si‐kak sota ẃaray biyag to! Agpayson eteyak, nem nan‐ongalak et ekak ma metmetey ingkatod ingka. Si‐kak i engegshi nonta tolbek ja mengilokat nonta daẃan ira nonta nanketey. Tan si‐kak pay sota ẃaray kabedinan ton mengeda ni biyag ni too, nem mebedin na panbiyag ko ali mowan shi patey.

Inpa-Amta Nen Jesucristo 17:14

Jet sajay ira, kobaten sha sota Kalniro, nem sota Kalniro, ebaken to ira, ta si‐katoy Apo ni emin na apo, tan si‐katoy Ari ni emin na ari. Jet sota ira too ton pinidi to, ja ebadeg i pamatira, ja imonod son si‐kato, mayda‐kam ngo ira son si‐kato ni pengebak to.”

Inpa-Amta Nen Jesucristo 19:16

Nodta baro to, tan nodta olpo to, ẃara mowan i sakey ya ngaran ton naymalka, ja kowan to ey, “Ari ni emin na ari, tan Apo ni emin na apo.”