Inpaspasing 1:8 - Dibshon Mengi-kan Ni Pansigshan

⁸ Nem iyay i ikowan ko son si‐kayo. Sota Ispirito Santo nen Apo Shiyos, man‐iyan so ni sakey tan sakey son si‐kayo say ẃaray panakabalin jon mengikowan ni maypangkep son si‐kak shi totoo, manshoki shi Jerusalem, Jodia, Samaria, tan shi emin na sakop niya dobong.”

Inpaspasing 1:8 Iomraidhean Croise

San Mateo 24:14

“Jet sota mapteng nga shamag maypangkep ni pantoshayan nen Apo Shiyos, maypedawag nin shi intiron dobong, say amta‐an ni emin na tood ja ka‐ili‐ili, asan kesabi may pantepos ni dobong.

San Mateo 28:19

Isonga ikowan ko son si‐kayo ey daw kayo shi emin na ili shiya dobong, jet itoshoyo i maypangkep son si‐kak say memati ira. Bonjagi jo ira shi ngaran nen Apo Shiyos ja Amak, shi ngaran ko ja Anak to, tan shi ngaran ni Ispirito Santo.

San Marcos 16:15

Jet kowan to pay son si‐kara ey, “Daw kayo shi emin na sakop niya dobong jet jo ikowan so ni emin na totoo i mapteng nga shamag maypangkep son si‐kak.

San Lucas 1:35

Kowan nonta anghil ma ey, “Sota Ispirito Santo nen Apo Shiyos i maka‐amta. Sota panakabalin nen Apo Shiyos, ẃara di son si‐kam. Isonga sajay alin nga‐nga, esanto‐an ja enshiy to di panbesolan, jet maykowan ali ey Anak nen Apo Shiyos.

San Lucas 10:19

Si‐kak i engibetkag son si‐kayo et angken manshedan kayod dilikaron dogad, enshiy mepesamak son si‐kayo. Mebedin jon ebaken i kabakal jon si Satanas, jet eg kayo ma‐an‐ano.

San Lucas 24:29

Nem inpeked sha ja kowan sha ey, “Ka‐okip ked jay, ta mama‐shem malen emankedabi ma.” Jet inonod toy kowan sha.

San Juan 15:27

Jet si‐kayo pay i mengikowan ni maypangkep son si‐kak, ta si‐kayo, naysigod ja naykadẃa kayo son si‐kak, nonta ikayshogik so pay laeng nonta obdak shiya dobong.”

Inpaspasing 1:5

Shanom bengat i inosal nen Juan ni inpamonjag to, nem say pemonjag nen Apo Shiyos son si‐kayo, Ispirito Santo. Eg medebas i eshakel la akew manipod niman et mebonjagan kayo ma ni Ispirito Santo.”

Inpaspasing 13:31

Jet nonta inpanbiyag to ma, eminshakel la nanpa‐sas so nonta ira ekidkidaw son si‐kato manshokid Galilia ingkatod Jerusalem. Si‐kara niman sota emengipaneknek so ni totoon Hodiyos.

Inpaspasing 2:32

Si Apo Shiyos, inpanbiyag to si Cristo shi patey, jet inon‐an min mismoy bakdang to alid patey!

Inpaspasing 22:15

Ta say si‐kam i mengikowan so ni emin na totoo ni maypangkep nonta inon‐an mo tan intenengan mo.

Inpaspasing 3:15

Jet si Jesus ja kepandepo‐i ni biyag, inpabonoyo! Nem si Apo Shiyos, inpanbiyag to mowan. Jet si‐kami i mismon engasas ni bakdang to nonta nanbiyag mowan.

Inpaspasing 4:33

Jet nontan, sota ira apostol, mas kimedsang iren mengitosho ni maypangkep son Apo Jesus, jey nanbiyag mowan shi patey, jet si Apo Shiyos, ebadeg i kaasi to son si‐karen emin.

Inpaspasing 5:32

Jet niman, si‐kami i mismon engasas ni maypangkep niyay ya banag; isonga peneknekan mi. Jet ẃara pay i onpaneknek so ja Ispirito Santo nen Apo Shiyos, ja in‐akan to ja man‐iyan so nonta ira toon emati son si‐kato.” Sajay i insongbat nen Pedro so nonta kangeto‐an na pari.

Inpaspasing 6:8

Si Esteban, eshakel la banag i dingdingka to ja kaskasshaaw wa inon‐an ni totoo, ta ẃares Apo Shiyos son si‐kato ja engi‐kan ni panakabalin to.

Inpaspasing 8:1

Si Saulo i sakey ya makapiyan ey angken bono‐en sha si Esteban. Nontan na timpo, epaladoy shaka pesing so nonta ira emati shi Jerusalem, isonga ebokal ira ja nayẃaris shi emin na ili ni Jodia, tan shi Samaria, nem sota ira apostol, si‐kara bengat i ebay‐an ja eg nansisi‐jan.

I-Roma 10:18

Jet say kowan ko, sigod ja intenengan sha met; isonga enshiy pangbal sha ni eg sha pemati‐an so. Ta say kowan nonta naysolat nonta bayag da, kowan to ey, “Angken towen dogad, ẃaray engitneng ni inkowan sha, jet nayẃaris sotan shi intiron dobong.”

I-Roma 15:19

Inon‐an sha sota milagron dingdingkak, jet sajay, ineẃatan sha ey edapod panakabalin ni Ispirito Santo nen Apo Shiyos. Isonga inekad ko ira jay ya dogad, manshokid Jerusalem ingkatod Ilirikom, jet intorok ka emin shiman sota mapteng nga shamag pangkep so nen Cristo.

I-Kolosas 1:23

Nem mesepol la itoloy joy pamatiyo, karejo ibi‐jag; mesepol la edagshay pamatiyo. Jet mesepol pay ya eg jo itolok ka maysi‐jan nodta esel nen Apo Shiyos ja naytoro son si‐kayo, ta sajay i kawad‐an ni namnama jo. Jet sajay ya esel nen Apo Shiyos, naykowan da shi emin na sakop ni dobong, jet si‐kak i sakey ja kaontolong ja mengikowan so.