Filemon 1:1 - Dibshon Mengi-kan Ni Pansigshan

¹ Si‐kak si Pablo ja makasolat niyay jet say kadẃak shiyay, si Timoteo, ja agi tayo shi pamati. Si‐kak, ebaloshak kabol ni naka pansilbi son Cristo Jesus. Sajay ya solat ko, para son si‐kam Filemon, ja epateg ga kait min kaontolong ni obda tayo.

Filemon 1:1 Iomraidhean Croise

Inpaspasing 16:1

Si Pablo, dimaw shi Dirbi, asan shi Listra. Jet shi Listra, ẃaray simbi ton daki ja emati son Cristo ja anak ni biin Hodiyos ja emati met laeng son Cristo, nem say ama niyay, aliẃen Hodiyos. Jet say ngaran niyay ya anak sha, si Timoteo.

1 I-Korinto 3:9

Jet sajay den obda min Apolos, si Apo Shiyos i mika pan‐i‐obda‐i; aliẃen kamika mandongba. Jet si‐kayoy singa payew ton inpa‐iso to son si‐kami. Say sakey pay ya kay‐eshigan ni obda mi, singa si‐kayo i inpaitowen nen Apo Shiyos ja baley to.

2 I-Korinto 1:1

Si‐kak si Pablo ja makasolat niyay et si Timoteo ja agi tayod pamati, si‐katoy kadẃak. Jet sajay ya solat, para son si‐kayon kait ko ja toon Apo Shiyos ja ẃared ta siyodad ni Korinto, tan shita intiron probinsiya ni Akaya. Itneng jo iya ikowan ko tep si‐kak i sakey ya apostol nen Cristo Jesus, jet si Apo Shiyos i mismon enotok son si‐kak.

I-Galasia 3:26

Jet si‐kayon aliẃen Hodiyos, ta emati kayo ngo son Cristo, annak shakejo ma nen Apo Shiyos, jet emin kito ma, nan‐i‐inges sa ẃara kito son si‐kato.

I-Ipiso 3:1

Sajay ira day kabol la naka pansheẃati so nen Apo Shiyos. Si‐kak, ebaloshak maypangkep ni naka pengitosho ni esel nen Cristo Jesus son si‐kayon aliẃen Hodiyos.

I-Ipiso 4:1

Ebaloshak tep naka mengitosho ni maypangkep so nen Apo Jesus, isonga iyay iray sheẃaten ko son si‐kayo. I‐enam jo komay ogadiyo shi piyan nen Apo Shiyos ja dag‐en ira nonta pinidi ton too to.

I-Ipiso 6:20

Ta say kabol la naybaloshan ko shiya badoran ket, sota inbetkagan towak nen Apo Shiyos say nak ikowan sota mapteng nga shamag maypangkep so nen Cristo. Isonga kowan ko ey ireẃati jowak so nen Apo Shiyos, say aknan towak ni toled ja mengikowan nonta maypangkep ni esel to, ta si‐katoy nebeng nga dag‐en ko.

I-Pilipos 1:1

Si‐kak si Pablo, ja makasolat niyay et say kadẃak, si Timoteo. Si Cristo Jesus i mismon engibetkag son si‐kami ja mansilbi son si‐kato; isonga itnengi jon pasiya iya ikowan mi. Jet sajay ya solat, para son si‐kayon emin ja kait min too nen Jesus ja ẃared siyodad ni Pilipos, agdalo son si‐kayon pangolo ni ematid tan, tan son si‐kayon para tolong met laeng so nonta ira emati.

I-Pilipos 2:25

Ninemnem ko pay ey mesepol la ibetkag ko la si Ipaprodito ja on‐oli shita kadnan jo. Ta naka ikari ey si‐kato, epateg ga agik shi pamati, tan sakey pay, etoled ja kadẃak ni mika pansilbi so nen Jesucristo. Salamat ta inbetkag jo di, ta ebadeg i tolong to son si‐kak.

I-Pilipos 4:3

Jet si‐kam ma kait kon emepiyal la emansilbi, kekshawen ko ngo ey si‐kam i mengolnos son si‐kara, no ngarantoy eg sha nan‐inawatan. Ta sajay iren bii, ebadeg i tolong sha son si‐kak ni naka pengitosho nonta mapteng nga shamag pangkep so nen Jesucristo. Aliẃen si‐kara bengat i timolong son si‐kak, no diket angken pay si Clemente, tan sota ira eshom ma kait kon emansilbi. Jet say ngaran ira niyay, naysolat ngo nodta dibsho nen Apo Shiyos ja naysolatan ira nonta nay‐aknan ni biyag ja enshiy to engintegan.

I-Kolosas 1:1

Si‐kak si Pablo ja makasolat niyay et si Timoteo ja agi tayo shi pamati, si‐katoy kadẃak, jet say shawat mi, sapay koma ta kaasi‐an shakejo nen Apo Shiyos, tan a‐shoman to sota talna son si‐kayo ja edapo met laeng son Apo Shiyos ja Ametayo. Sajay ya solat, para son si‐kayon totood Kolosas ja kait min too nen Apo Shiyos ja makedsang i pamati to. Itnengi jo iyay ya kowan ko tep si‐kak i sakey ya apostol nen Cristo Jesus et si Apo Shiyos i mismon enotok son si‐kak.

I-Kolosas 4:11

Tan si Jesus Hosto, inkowan to ngo ey ibalikas koy semek to son si‐kayo. Saja tedo bengat iray Hodiyos ja kait kon emengikowan pangkep so nonta pantoshayan nen Apo Shiyos, jet si‐karay emengi‐kan ni imdeng ko.

2 I-Tisalonika 1:1

Si‐kak si Pablo ja makasolat niyay et say kadẃak, si Silas nen Timoteo. Sajay ya solat, para son si‐kayon tood ta Tisalonika ja kait min emati son Cristo, ja ẃara ma son Apo Shiyos ja Ametayo, tan si Apo Jesucristo.

2 Timoteo 1:8

Isonga kareka onbaing ja mengikowan ni maypangkep so nen Jesucristo ja Apo tayo, tan eg mo koma ibaing sota inkabedod ko pangkep ni naka pengitosho ni maypangkep son si‐kato, no diket itoded mon mengikowan ni mapteng nga shamag maypangkep son Cristo angken manda‐kam ka ni digat, ta i‐aknan toka met laeng nen Apo Shiyos ni kedsang mo.

Filemon 1:23

Si Ipapras, ja kadẃak ja naybalod shiya badoran pangkep so nen Cristo Jesus, piyan ton pekikowan kod ja solat koy semek to son si‐kam,

Filemon 1:24

jet angken sota ira kait ko ja emansilbi so nen Jesucristo, ja si Marcos, si Aristarko, si Dimas, tan si Lucas, inkowan sha ngo ey pekikowan koy semek sha son si‐kam.

Filemon 1:9

nem enshi, ekak osalen iyay ya kanebengan ko tep ensemek taka. Nem iyay et mango i sheẃaten ko son si‐kam, jet nemnem mo ey si‐kak, agpayson inbetkag towak nen Cristo Jesus ja mengitakshel son si‐kato, jet ebaloshak pay pangkep ni naka pengitosho shi totoo ni maypangkep son si‐kato.