Kɛ̈ŋ 3:3 - JAM DE NHIALIC 2011

³ Du piɔ̈n adöt päl kekë yic. Duöötë keek në yïyeth, ku muk keek në yïpiɔ̈u.

Kɛ̈ŋ 3:3 Iomraidhean Croise

2 Tham 15:20

Yïn aa piac rɔt mät yɛn, ka bä yïn tɔ cath wekë wook adï? Ayï yɛn aya yɛn kuc të la yɛn thïn. Dakë yïnɔm ciëën ku lɔɔr wekë mïthëkɔckun kedhie, ku Bɛ̈nydït abï yïn nyuöth nhiëërdɛn agɔk kekë piɔ̈n adöt.”

Diɛt 119:11

Yɛn cï lööŋku muk në yapiɔ̈u, ke ya cïï kërac bï luöi Yïn.

Diɛt 25:10

Kuɛɛr ke Bɛ̈nydït kedhie ee kuɛɛr ke nhiëër agɔk ku piɔ̈n adöt, në baŋ de kɔc ee löŋde döt ku dötkï wëëtde.

Diɛt 85:10

Nhiëër agɔk ku piɔ̈n adöt abïk mat, ku piathëpiɔ̈u kekë mät abïk kethook ciim,

Bɛ̈n 13:9

Yen abï week jɔ aa täk nïïm. Ka bï ciët kë duööt ë wecin, ku cït kë cï tääu në wenyïïn tueŋ. Abï week aa täk nïïm ë cieŋ, në baŋ bä wek lööŋ ke Bɛ̈nydït aa luɛɛl aköölnyïïn, në luɔi cï Bɛ̈nydït we bɛ̈ɛ̈i bei Rip në riɛl dïïtde.

Bɛ̈n 34:6

Na wën, ke Bɛ̈nydït tëk ë yenɔm tueŋ, ku lueel an, “Ee Yɛn Bɛ̈nydït Nhialic de kok ë piɔ̈u ku dhuëëŋ, Nhialic cie dap gɔ̈th, ku ye Nhialic adöt, Nhialic ee nhiëër agɔk nyuɔɔth.

Kɛ̈ŋ 1:9

Wëëtden abï yï tɔ läk cït göl ë dhuëëŋ në yïnɔm, ku cït kuat piɛth në yïyeth.

Kɛ̈ŋ 14:22

Määr cie këde kɔc ee kiɛɛr rac cät? Ku kɔc ee kapiɛth kiëët ayek nhiëër kekë piath ë piɔ̈u yök.

Kɛ̈ŋ 16:6

Bɛ̈nydït ee kɔc adööt ku kɔc piɛth piɔ̈ɔ̈th päl awɛ̈ɛ̈c. Ka ye Bɛ̈nydït riëëu ke cïn kërac bï yï yök.

Kɛ̈ŋ 20:28

Piathëpiɔ̈u ku nhiëër ayek bɛ̈ny tɔ rɛ̈ɛ̈r në thönyde nɔm.

Kɛ̈ŋ 6:21

Thiɔ̈ɔ̈kë jamden në yïpiɔ̈u thïn, ku ye döt ë cieŋ.

Kɛ̈ŋ 7:3

Ye wëëtdï döt në yïpiɔ̈u aköölnyïïn ëbɛ̈n.

Jeremia 17:1

Aye Bɛ̈nydït lueel an, “Kɔc ke Juda, karɛckun acï ke gɔ̈ɔ̈r në agalam de wëëth, acï ke guaŋ ë wepiɔ̈ɔ̈th në thoŋ de kuur ë daimon, ku ɣöötë keek në aguuk ke yïkkun kɔ̈ɔ̈th.

Ɣodh 4:1

Piɛŋkï jam ë Bɛ̈nydït wek kɔc ke Yithriɛl, Bɛ̈nydït ade gääk wël nɔm week, wek kɔc cieŋ ee pinyë. “Wek cïn piɔ̈n adöt, ku ciënkï nhiëër, ku wek cïï Nhialic ŋic.

Malakai 2:6

Aake ye wëët në yith, ku acïn lueth ë yek töör. Aake ye cath në Yɛn apiɛth, ku loikï yith. Agokï kɔc juëc tɔ päl karɛcken.

Math 23:23

Amawoou në week, wek kɔc ë löŋ gɔ̈ɔ̈r ku Parithai, kɔc de yäc aguk! We ye wal juaar, yï mint, ku anith, ku kumin, ku we ye ka ke löŋ pɔ̈l, ka cït guiëërëlöŋ, ku kokdepiɔ̈u, ku gäm, ka de naamden awärkï wɛl awën, kake adï cäk ke dhil aa looi, ku cäkï kak awën ee pɔ̈l ayadäŋ.

2 Kor 3:3

We ye tïc nɔn aa wek awerek de Kërtho, awerek cï looi në wook, ku kënë gɔ̈ɔ̈r ë miök ë gäär, ee Wëi ke Nhialic pïïr kek ë gɛ̈ɛ̈rë ye, ku acie pɛɛm ë kur kek ë gäär kɔ̈ɔ̈th, ee pɛɛm cɔl piɔ̈ɔ̈th ke kɔc.

Epethiei 5:9

kak ye ɣɛɛrëpiny ke luɔk ayek luɔi de këpiɛth ëbɛ̈n ku piathëpiɔ̈u ku yic.

Nyöŋ 6:8

Duöötkï keek në we kök ku cieŋkï keek në wenïïm tueŋ ke ke bï we aa täk nïïm.

Ɣeberuu 10:16

“Të le thaar bɛ̈n yɛn bï löŋ mac wokë keek, ku lööŋkï abä ke tääu ë kenïïm ku gäär keek ë kepiɔ̈ɔ̈th.”