Mathayo 24:29 - Digo Bible

²⁹ “Phahi bada ya siku za mateso kusira tu, dzuwa rindakala jiza, na mwezi taundangʼala. Nyenyezi zindagbwa kula dzulu, na nguvu za dzulu mlunguni zindasumbiswa.

Mathayo 24:29 Iomraidhean Croise

Muhubiri 12:2

Kabila mwanga wa dzuwa, mwezi na nyenyezi kukala jiza kpwako, nawe ukaona vurungu-vurungu avi kuna maingu ga mvula.

Isaya 13:10

Nyenyezi zosi za mlunguni tazindangʼala tsona, dzuwa richituluka tarindangʼala na mwezi nao taundaala.

Isaya 24:23

Dzuwa na mwezi undagbwirwa ni haya kpwa kukala Mwenyezi Mlungu, Mlungu wa majeshi andatawala hiko Mwango Sayuni, hiko Jerusalemu na akulu a atue andaona utukufuwe.

Isaya 34:4

Nyenyezi zosi mlunguni zindaangamika na mlungu undakundzwa dza jamvi. Chila chitu mlunguni chindagbwa dza makodza ga mzabibu chigonyala au ga mtini chigouma pho muhini.

Joeli 2:10

Dunia nkusumba na mlunguni kukakakama mbere zao, dzuwa na mwezi nkufunga jiza na nyenyezi zikakosa kungʼala.

Joeli 3:15

Dzuwa na mwezi vindatiywa jiza, nyenyezi nazo zindaricha kungʼala.

Amosi 5:20

Yo siku ya Mwenyezi Mlungu indakala ya jiza, si ya mwanga, indakala ya chilungulungu cha jiza bila ya mwanga wowosi.

Amosi 8:9

Mwenyezi Mlungu anaamba, “Siku iyo ndahenda dzuwa ritswe mutsi, na kuhenda tsi ikale jiza wakati wa mutsi.

Mathayo 24:21

Mana wakati hinyo kundakala na tabu kulu ambazo tazidzangbwekala kula mwandzo wa dunia hadi rero, wala tazindahendeka tsona.

Mathayo 24:8

Mambo higa ni dza viratu mwandzo wa utsungu wa mayo alondaye kudzivugula.

2 Petero 3:10

Ela siku ya Bwana Jesu kuuya duniani indaangalaza atu kpwa kukala indakala gafula, dza viratu muivi aedzavyo. Wakati hinyo kundakala na ngurumo na mlunguni kundayaya na chila chitu chirichohimo chindaphya tsetsetse. Na dunia na vyosi virivyo mumo vindayaya piya.

Maono 8:12

Naye malaika wa ne ariphopiga gundare, seemu ya dzuwa, ya mwezi na ya nyenyezi zapigbwa. Hizo seemu za dzuwa, mwezi na nyenyezi zopigbwa taziyaala. Hipho seemu ya mutsi yakosa mwanga na seemu ya usiku nayo ichikosa mwanga.