Alapidho wi got mabor pa Isiraili, lajwayo jange to nyak olemo to lokere yath sida maŋon. Kisi nger winyo lageto i tiende, aka i tipo mere kisi nger cwec lageto.
Kwoŋ kisi gimoro ma rieko kodi niaŋ ma kere openjo jo, onwaŋere nike jo oyido joloyo dipar jomiliel kodi jondijo ma joneno gima latimere i ker pa kere je.
Me lek ma an, Nebukadineza aneno. Onyo Beltesazar, titi dwoŋ mere, paka cwo mariek je i ker paran jokinyal tito ran dwoŋ mere. To in inyalo, kwoŋbedo initie gi cuny pa Were Maleŋ kwoŋin.
Nitie i ker perin jal ma cuny pa Were maleŋ nitie kwoŋe. I hongo pa benin onwaŋ nike go nitie gi lero, niaŋ kodi rieko paka rieko pa werin. Aka benin Nebukadineza oketho go bedo jadwoŋ pa jondijo ma joneno gima latimere, jondijo ma timo gir'aura, Jokaldin kodi jothieth.