Isaya 4:2 - MUMA MALER 2015

² E ndalogo, yath ma Ruoth Nyasaye osepidho nobed gi duong’ kendo nonere maber, bende olemo ma piny onyago ema nobed gima kelo ni jo-Israel motony mor kod pak.

Motingʼo Loko Manyien

² E kindeno Bad Yath mar Jehova Nyasaye nobed maber kendo man-gi duongʼ, kendo olemo mar piny nobed mor kod duongʼ ne jo-Israel motony.

Isaya 4:2 Iomraidhean Croise

Zaburi 67:6

Piny osechiek maber! Nyasaye ma Nyasachwa oseguedhowa.

Zaburi 72:16

Onego chiemo obed mang’eny e piny, kendo cham machiek e gode mondo obed mogundho ka chamb Lebanon. Ji onego opong’ mier mana ka lum manie pap.

Wuok 28:2

Twang’ni Harun owadu lep dolo, mondo omedu duong’ gi chia.

Isaya 11:4

To nong’ad bura gi adiera ni joma odhier, kendo nochwak joma muol kaka owinjore. Dhoge ema nobed luth mogoyogo joma timbegi mono. Ee, wachne ema noneggo joricho.

Isaya 26:1

Wer ma nower e piny Juda chieng’no e ma: “Wan gi dala mochiel motegno, kendo resruok ma Ruoth Nyasaye osekelonwa ema obedo ohinga mwageng’orego.

Isaya 27:6

E ndalo mabiro, nyikwa Jakobo nogurre motegno. Ee, jo-Israel nobed ka yath ma dongo kendo thiewo nyaka nyag olemo, mi pong’ piny ngima.”

Isaya 30:23

Ruoth Nyasaye nokel koth ni chambu, kendo nomi puotheu chieg cham mogundho. Jambu bende nokwa e lege madongodongo,

Isaya 45:8

Un polo, lwaruru piny, mondo tim makare ochwe ka koth, mi piny nyag olemb warruok, kendo tim makare bende omedre. Mago duto, an Ruoth Nyasaye ema achueyo.

Isaya 53:2

Jatich Ruoth Nyasaye nodongo e nyime mana ka yath ma tiendene nie lowo motwo. Ne oonge gi chia, bende ne oonge gi duong’ moro, mane nyalo mako wang’wa, mi mi wahere.

Isaya 60:15

Isebedo dala mojwang’ kendo ma ji ochayo, maonge ng’ama lim, to koro abiro miyo ibedo dala man gi duong’ mosiko, ma kelo ni ji mor ma ok rum.

Isaya 60:21

Jogi duto nobed joma kare, kendo piny nobed margi nyaka chieng’. Ginichal gi bad yath ma an ema apidho gi lweta awuon, mondo okelna duong’.

Isaya 61:11

Kaka lowo miyo cham twi, kendo kaka cham mae puodho thiewo, e kaka Ruoth Nyasaye bende nomi tim makare kod pak thiew e nyim ogendini duto.

Jeremia 23:5

“Ndalo biro ma nayierie nyakwar Daudi hie mondo obed ruoth. Enorit piny gi rieko, kotimo gik ma owinjore kendo makare e piny.

Jeremia 33:15

E kindeno anakel nyakwar Daudi hie, mi enotim gik malong’o kendo makare.

Jeremia 44:14

Onge kata ng’at achiel kuom jo-Juda mane odong’ mi tony. Bende onge kata ng’at achiel kuomgi ma nodong’ e piny Juda kuma gigombo mondo gidagie kendo. Onge ng’ama nodogi, mak mana ji moko manok moringo lweny.”

Jeremia 44:28

To ji manok kuomu notony e tho, mi dog Juda koa Misri. Bang’e jo-Juda modong’ kuom mago mane obiro Misri nong’e ka wechena kata wechegi ema oselokore adiera.

Ezekiel 34:29

Anami puothegi chieg cham mang’eny, mi atiek kech e pinygi. Bende ogendini mamoko ok nochak ojargi kendo.

Ezekiel 36:8

To un joga Israel, yien nochak odongnu e gode mag Israel, mi nyagnu olembe, nikech ubiro dok e pinyu mak odeko.

Ezekiel 7:16

Kata ka moko notony mi dhi e gode, ka akuche maluor, to ginitho kuro nikech richogi.

Joel 2:32

Chakre kanyo ng’ato ka ng’ato moluongo nying Ruoth Nyasaye noresi. Jomoko modak e got Sayun notony kuno. Ee, jomoko notony Jerusalem, mana kaka Ruoth Nyasaye osewacho. Joma Ruoth Nyasaye oluongo nobed mangima.”

Joel 3:18

Kindeno yiend mzabibu manyak ahinya nopong’ gode, kendo jamni mathoth noyud e got ka got. Soko nomol kawuok e Hekalu mar Ruoth Nyasaye, mi nomi holo Shitim bedo mang’ich.

Obadia 1:17

“To jomoko modak e got Sayun biroo tony kuno, mi kanyono nobed kama ler, kendo joka Jakobo nokaw piny ma margi giwegi.

Zekaria 3:8

Koro yaye Joshua jadolo maduong’, in kaachiel gi jowadu mobet e nyima ka, chikuru itu. Un duto un ranyisi maber mar gik mabiro. Abiro kelo jatichna miluongo ni Badyath.

Zekaria 6:12

kiwachone niya, ‘Weche ma Ruoth Nyasaye Manyalo Gik Moko Duto owacho e magi: Jali e ng’at miluongo ni Badyath. Obiro dhi nyime maber, kodongo piyopiyo kama entie, kendo obiro gero Hekalu mar Ruoth Nyasaye.

Zekaria 9:17

Mano kaka gin gi mwandu mogundho kod mor maduong’! Cham gi divai biro miyo yawuotgi gi nyigi bed gi del mabeyo.

Malaki 3:17

Ruoth Nyasaye Manyalo Gik Moko Duto owacho niya, “Chieng’ ma ang’adoe bura, to ginibed joga awuon kendo ginibed mwanduna. Anabednigi mang’won mana kaka wuoro bedo mang’won ni wuode moluore.

Mathayo 24:22

Ka dine Nyasaye ok osechano mondo ong’ad kar romb ndalogo, to onge ng’ama dotony. To Nyasaye nong’ad ndalogo nikech joma oyiero.

Luka 21:36

Omiyo beduru motang’ kulemo pile mondo uyud teko mar tony e gik mabiro timore duto, kendo uchung’ e nyim Wuod Dhano.”

Johana 1:14

Wach nodoko dhano, mi odak kodwa, kende ne waneno duong’ne maler. En duong’ machalo gi duong’ mar Wuowi ma miderma, mopong’ gi ng’wono kod adiera.

2 Jo-Korintho 4:6

Watimo kamano nimar Nyasaye achiel mane owacho ni mondo ler orieny e chunywa mondo okelnwa ler mar ng’eyo duong’ mar Nyasaye mineno e wang’ Yesu Kristo.

2 Petro 1:16

Kane wanyisou kaka Ruodhwa Yesu Kristo biro gi duong’ maler, to ne ok wakonyore gi sigendini ma dhano ochuogo, to wan wawegi ne wanene gi wang’wa, ka en gi duong’ne maler duto.