Daniel 7:10 - MUMA MALER 2015

¹⁰ Mach nodhuolore kanyo mana ka aora mamol. Ne nitie ji gana gi gana kanyo matiyone, kendo ji tara gi tara mochung’ e nyime. Eka bura nochakore, mi oyar kitepe.

Motingʼo Loko Manyien

¹⁰ Mach nodhuolore e nyime, mana ka aora mamol! Ji gana gi gana ne tiyone; kendo ji tara gi tara nochungʼ e nyime. Bangʼe noel kitepe eka bura nochakore.

Daniel 7:10 Iomraidhean Croise

1 Ruodhi 22:19

Mikaya nowacho niya, “Koro winj wach Ruoth Nyasaye. Naneno Ruoth Nyasaye kobet e kom duong’ne, kendo ka oganda polo ochung’ e bathe koni gi koni.

2 Weche mag Ndalo 18:18

Mikaya nowacho niya, “Koro winj wach Ruoth Nyasaye: Naneno Ruoth Nyasaye kobet e kom duong’ne, kendo oganda polo duto kochung’ e bathe koni gi koni.

Ayub 25:3

Bende nitie ng’at manyalo kwano malaika ma tiyone? Koso nitie kamoro ma ler mar Nyasaye ok rienyie?

Zaburi 103:21

Un ogend polo duto, pakuru Ruoth Nyasaye. Ee, un jotich matimo gik ma odwaro, pakeuru.

Zaburi 18:8

Iro nodum kawuok e ume, kendo mach mang’ang’ni nowuok e dhoge.

Zaburi 50:3

Nyasachwa biro, to ok obi ling’ aling’a. Mach mang’ang’ni nie nyime, kendo yamb koth maratipo kudho kolwore.

Zaburi 68:17

Kane Ruoth Nyasaye owuok Sinai kadhi e Hekalu mare, ne en gi geche lweny madongo gana gi gana.

Isaya 30:27

Neuru! Ruoth Nyasaye biro, kaa kuma bor. Mirimbe liel ka mach ma iche dhuolore. Dhoge tetni gi mirima mager, kendo lewe otimo mach makakni, mawang’o gik moko duto.

Isaya 30:33

To mach miwang’oe ringre joma otho ne oseik chon mondo owang’ie Molok, nyasach Asuria. Kendono duong’ ahinya, kendo odhurie yien mogundho. Much Ruoth Nyasaye ma chalo gi mach maliel ema biro moke.

Daniel 12:1

“E kindeno, malaika maduong’ miluongo ni Mikael marito jou, biro thinyore. Enobed kinde mar chandruok marachie moloyo kendo ma pok oneye nyaka ne ogendini chak bet e piny. Ka kindeno ochopo, to ibiro res jou duto ma nyinggi ondiki e kitap Nyasaye.

Daniel 7:22

nyaka ne ng’at ma nyaka nene obiro mong’ado bura ka chwako jo-Nyasaye Maduong’ Moloyo. Kinde koro ne osechopo ma jo-Nyasaye yudoe loch mar rito piny.

Daniel 7:26

Bang’ mano, bura nong’adi mi nomaye lochne duto mondo okethe chuth.

Zekaria 14:5

Unutony kuluwo hohono, nimar enochwe nyaka dhoranga dala. Adier, unutony kaka jou notony higni mang’eny mokadho, ka giringo yiengni piny mane otimore e ndalo Uzia ruodh Juda. Bang’e Ruoth Nyasaye ma Nyasacha nobi kaachiel gi malaika mage duto.

Mathayo 25:31

Bang’ mano Yesu nowacho niya, “Ka Wuod Dhano obiro e duong’ne maler, kaachiel gi malaika duto, to nobedi e kom lochne man gi duong’,

Rapar mar Chik 33:2

“Ruoth Nyasaye nobiro koa Sinai. Ne orienynigi gie Seir, kendo gie got Paran. Nobiro ka ji maler gana gi gana oruowo e bathe ma korachwich.

Jo-Hibrania 1:14

Kamano waneno ni malaika gin mana roho matiyo ni Nyasaye. Nyasaye orogi mondo gikony joma biro yudo warruok.

Jo-Hibrania 12:22

Ooyo, un uchung’ e nyim got Sayun, dala mar Nyasaye mangima, ma en Jerusalem manie polo, kendo uchung’ e nyim malaika gana gi gana. Unie nyim chokruok ma galamoro mar nyithind Nyasaye.

Juda 1:14

Enoka, nyakwar Adam kuom tieng’ mar abiriyo, nokoro wach jogo, kane owacho niya, “Neuru! Ruoth osebiro gi oganda mang’ongo mar joge maler,

Fweny 11:18

Mirima nomako ogendini, to koro chieng’ mirimbi iwuon osechopo. Kinde osechopo ma iyaloe joma otho, kendo ichiwoe pok ni jotichni ma jonabi, kod jogi, kaachiel gi ji duto madongo gi matindo moluoro nyingi. En kinde mitiekoe jogo maketho piny.”

Fweny 5:11

Eka ne achako ang’icho, mi awinjo dwond malaika mang’eny molworo kom duong’ kaachiel gi gik mangima kod jodongogo. Kwan-gi ne gana gi gana, kendo tara gi tara.