तितस 2:3 - Dhimal NT

³ एन्साङ पातेङ बेराङ बेबालाइ गोताङ काथाता परमेस्वरहेङ मन्दा ताअ्का जिबन जियाइयाको, बोमिको काथा पाका कालाउ हेन्जा गोरा-चि आम्का बानि माह्याको। कालाउ इम्बालाइ बो गेलाइहेङ रेम्का काथा पालि धिरपाको दोअ्तेङ इम्बालाइहेङ धिरपा।

धिमाल

³ एसाङ पातेङ बेराङगेलाइ परमेस्‍वरहेङ मान पाका ज्‍यान सालाको। एम्‍बालाइ बोमिहेङ बिथाको दुस मालाग्‍याको। एबालाइ गोराको बसता मावालाको रो रेम्‍का काथागेलाइको बिद्‌या प्‍याको।

तितस 2:3 Iomraidhean Croise

रोमि 1:29

इम्बालाइ गोताङ खाल्को पाप, खाराबि, दुस्ट, दिका, इख, मारा पाका, चेरसुका, धाताइका कालाउ एमिसो-भेनेङको काथा पोअ्खे।

रोमि 16:2

का नेलाइहेङ निबेदन पाखा, कि ख्रिस्टको पबित्तरो जन कोनिङ वासेहेङ बुङ स्‍वागत पासु, जेसाङ परमेस्वरको द्‍याङगेलाइ एमिसो-भेनेङहेङ स्‍वागत पाखे। कालाउ वासेहेङ गोइका काथाता साघाइसु, हाइपालिपानु वा ताइमिङ हेन्जाहेङ कासेहेङ बुङ साघाइका हि।

एफिसि 5:3

कालाउ नेलाइ परमेस्वरको द्‍याङगेलाइ जेङनाङ नेलाइ कासिबिरि, चिचाहा, कालाउ गोताङ खाल्को मारेम्का कामगेलाइ मापासु।

1तिमोथि 3:11

मन्डलि साघाइकालाइको बे गेलाइ बुङ आदार पालिको योग्य हिलि गोइखे, बोमिको बिसोइता आखेका काथा मापोका हिलि गोइखे। कालाउ ताइमिहेङ काबुता ताअ्तेङ गोताङ काथाता खाङधुरि योग्य हिलि गोइखे।

1तिमोथि 3:8

एन्सा पातेङ मन्डिलिहेङ साघाइकालाइ बुङ भलादमि हिलि गोइखे, इमान्दार, हेन्जा गोरा चि-माआम्का कालाउ ताकाको लोभ मापाका ह्याको।

1तिमोथि 5:23

ना चि खिनिङ आम्तेङ माहि, भरु नाङको हामुको भाअ्सिङ कालाउ जेलाउ-सेलाउ मासाधितेङ हिलाउ आतुइसा दाखरस आम्सु।

तितस 1:7

हाइपालिपानु मन्डलिको आगुवा परमेस्वरको कामको जिम्मा ह्रुका हिखे, ओदोङ भाअ्सिङ वाकोता हिदोइ बुङ दुसिका हिलि माएल। वा ताइकोङ काथाता जिद्दि पाका, धेमाङ चेर ताम्पाका, गोरा चि आमका, बल दिका कालाउ ताकाको लोभ मापाका द्‍याङ हिलि गोइखे।

तितस 2:4

कालाउकि इम्बालाइ एनोङ आसल उधाहरन जेङतेङ धानिगेलाइ हेसा ताइको के कालाउ जामाललाइहेङ मायारु पालि गोइखे दोअ्तेङ साल्हा पिलि द्वाको।

हिब्रु 5:12

एला थेकापा ते नेलाइ आरुगेलाइहेङ धिरपालि दोका जेङलि गोइधास्वाना, कालाउ नेलाइ एला थेकापा बुङ परमेस्वरको बचनको बारेता आधारभुत काथा थाहा मान्थुनाङ आरु हासु बुङ धिरपालि गोइखे। जाराउका चाका-आम्का आमेने खान्तेङ आझाइ भरु नेलाइहेङ जामाल भाइपा दुधे गोइखे।

प्रकास 2:20

कालाउ नाङको बिरोधता कासेहेङ या गुनासो दोअ्लि हि: नाअ् इजेबेल दोअ्का बेबालहेङ सहिका हिना। वा ताइमिहेङ परमेस्वरको बक्ता दोअ्खे, कालाउ काङको द्‍याङगेलाइहेङ कासिबिरि पालि कालाउ मुर्तिगेलाइहेङ भोग पिका आमेने चालि-आम्लि कालाउ आसलिल जिबन बितिपालि धिरपाहि।