रोमि 3:4 - Dhimal NT

⁴ मिधुलाउ बुङ माको, परमेस्वर जेलाउ बुङ सत्ये धुइखे कालाउ गोताङ द्‍याङगेलाइ धाताइखे। जेसाङ धर्मसास्तरता परमेस्वरको बारेता लेखेका हि, “नाअ् ताइको बचनता ठिक जेङपि, कालाउ न्याय जेङलाउ नाअ् जितिपि।”

रोमि 3:4 Iomraidhean Croise

मत्‍ति 11:19

का द्‍याङको चान बुङ द्‍याङगेलाइ भाइपा चागिल्घा आमगिल्घा कालाउ इम्बालाइ कासेहेङ जिहुका, म्हाका पोत ल्होपाकालाइको कालाउ पापिगेलाइको सानाइति दोअ्तेङ दुसिखे। कालाउ हिदोइ बुङ द्‍याङको कामहोइ या साबित पाखे कि वा बुद्दिमानि हि।

लुका 20:16

वा ताइमिङ लोतेङ उङको दुस्ट मोहिगेलाइहेङ पाक्का दोङ सेअ्तावा कालाउ ताइको आङगुरको बारि भेनेङगेलाइहेङ कामाइलि प्यावा। कालाउ न्हुसो द्‍याङगेलाइ इसिका हिङतेङ दोअ्हि, परमेस्वर इसिका मापा।”

युहन्‍ना 3:33

कालाउ जाइ वाको साक्सि ह्रुका हि, वा चाहि परमेस्वर सत्ये हि दोअ्का काथाको प्रमान पिखे।

रोमि 11:1

ओदोङ भाअ्सिङ का हिअ्दोङखा, “हाइ परमेस्वर ताइको द्‍याङगेलाइहेङ बाथालाइगिल्हि कुनु?” मिधुलाउ बुङ माको! हाइपालिपानु का बुङ आब्राहामको हारागुटियासो जोलोम जेङका बेन्यामिन कुलको एमि इस्राएललि दोङ हिघा।

रोमि 11:11

का आरोङ हिअ्दोङखा, “हाइ यहुदिगेलाइ थुनिङचातेङ जेलाउको भाअ्सिङ थोबिन्हाका कुनु?” मिधुलाउ बुङ माको! कालाउ यहुदिगेलाइ खाङधुरि मापाकानाङ गैर-यहुदिगेलाइ मुक्ति निङका हि। कालाउकि इस्राएललिगेलाइ बुङ या तिङतेङ डाहा पाको।

रोमि 3:31

हाइ केलाइ इदोङ खाङधुरिसो व्यवस्थाहेङ रद्द पानाखे रो? मिधुलाउ बुङ माको! भुरु केलाइते व्यवस्थाहेङ जोगिपातेङ ताअ्नाखे।

रोमि 6:15

हाइपालिपानु केलाइ व्यवस्थाको आधिनता मान्थुन्हाहि कालाउ परमेस्वरको आनुग्रहको आधिनता हिनाहि, ओदोङ भाअ्सिङ केलाइ पाप पालि माएल।

रोमि 6:2

एन्सा माज्याको! केलाइते पापको भाअ्सिङ सिलि दोनाहोइ, ओदोङ भाअ्सिङ केलाइ एला लागातार जिबनता पाप पालि माएल।

रोमि 7:13

हाइ व्यवस्था जाइ आसल हि कासेहेङ आत्मिक सिका पिहि? मिधुलाउ बुङ माको! भरु पाप चाहि पापको रुपता तिनाको दोअ्तेङ इङको रेम्का काथासो पापहोइ काङकोता आत्मिक सिका उब्जाइपाहि, कालाउकि आग्याहोइ पापहेङ हेन्जा मारेम्का तिङपाको।

रोमि 7:7

केलाइ हाइ दोअ्लि कुनु? व्यवस्था दोङ पाप चुमाहि? मिधुलाउ बुङ माको! जेसापा व्यवस्था मान्थुनु का पाप हाइ वाला दोअ्तेङ थाहा मागिधाङका, हाइपालिपानु “नाअ् चिचा माजेङ” दोअ्तेङ व्यवस्था दोङ मादोअ्नु चिचा जेङलि माएल दोअ्तेङ थाहा मागिधाङका।

रोमि 9:14

एला केलाइ हाइ दोअ्लि कुनु? हाइ ताइमि साल्लि भोका द्‍याङहेङ छाल्तेङ परमेस्वर आन्याय पाखे? मिधुलाउ बुङ माको!

1 कोरिन्थि 6:15

नेलाइको जिउ ख्रिस्टको जिउको आङगगेलाइ दोङ हि दोअ्का काथा नेलाइहेङ थाहा दोङ हि। एन्सा पानु हाइ का ख्रिस्टको आङगगेलाइ चुम्पुतेङ कासिबिरिको आसुद्द आङग बानाइलि? मिधुलाउ बुङ माको।

2 कोरिन्थि 1:18

परमेस्वर खाङधुरि योग्य हिका कोनिङ केलाइ “नेलाइहेङ दोअ्का काथा जेलाउ बुङ सत्ये हि।”

गलाति 2:17

हाइपालिपानु केलाइ मोसाको व्यवस्था मानितेङ माको, भरु येसु ख्रिस्टता खाङधुरि पानाङ परमेस्वर केलाइहेङ धर्मि बानाइहि, ओदोङ भाअ्सिङ आधिमि यहुदिगेलाइ केलाइहेङ पापि जेङका थानिखे। एन्सा पानु हाइ ख्रिस्ट केलाइहेङ पाप पालि लागाइहि? मिधुलाउ बुङ माको।

गलाति 2:21

परमेस्वर केलाइहेङ ताइको आनुग्रहसो धर्मिको रुपता सुइकार पाहि। का इङको काथा हेलाउ बुङ मानिल्लाङका। हाइपालिपानु जेसापा द्‍याङगेलाइ मोसाको व्यवस्था पालि केम्तेङ धर्मि जेङखे पानुते, ख्रिस्ट सिलि मागोइधाङ।

गलाति 6:14

कालाउ का चाहि आरु काथाता माको, भरु प्रभु येसु ख्रिस्ट क्रुस्टता सिका काथाता खिनिङ गर्ब पाङका। हाइपालिपानु वाको सिकासो का एला सुमिङको इच्छाको बान्धाइति मान्थुघा कालाउ सुमिङको हिदोइ बुङ सरबुङहोइ काङको ह्रुता सासन पालि माद्वावा।

1तिमोथि 3:16

हिदोइ बुङ साङखा माकोसिङ केलाइ मानिन्हाखे, कि केलाइको खाङधुरिको रहस्य हेन्जाङ माहान हि: ख्रिस्ट एमि द्‍याङको रुपता देखाल जेङहि, वा पबित्तरो आत्मासो परमेस्वरको चान साबित जेङहि, स्वर्गदुतगेलाइ वासेहेङ तिङहि, गोताङ सारभिगेलाइता वाको बारेता सुसमाचार हिङपाहि, सुमिङको गोताङ द्‍याङगेलाइ वाको ह्रुता खाङधुरि पाहि, कालाउ परमेस्वर वासेहेङ महिमाको स्वर्गता चुम्पुहि।

तितस 1:2

एसापा इम्बालाइ परमेस्वर दोफा आनान्त जिबनको आस पाखे। हाइपालिपानु हेलाउ बुङ माधाताइका परमेस्वर, सुमिङ सिरजाइका खान्तेङ लाम्फा दोङ ताइको द्‍याङगेलाइहेङ आनान्त जिबन प्याङका दोअ्तेङ प्रतिग्या पाका हिघाहि।

हिब्रु 6:18

कालाउ इदोइ न्हेनोङ काथागेलाइ हि: वाको प्रतिग्या कालाउ वाको केरा चाका, जाइ हेलाउ बुङ फेरिलि मादोअ्खे, हाइपालिपानु परमेस्वर हेलाउ बुङ धाताइलि माद्वाङ। ओदोङ भाअ्सिङ जाइ केलाइ परमेस्वरको भेरपा सुरुक्सिया निङलिको भाअ्सिङ लोका हिन्हाहि, कालाउ जेदोङ आस वा केलाइहेङ पिका हि, इङकोहेङ हेन्जाङ साहाससोङ थामितेङ ताअ्का हिनाहि।

१ युहन्‍ना 5:10

जाइ परमेस्वरको चान येसु ह्रुता खाङधुरि पाखे, वाको हृदयता इङको काथाको साक्सि हिखे। परमेस्वरता खाङधुरि मापाका परमेस्वरहेङ धातुवा बानाइका हिखे, हाइपालिपानु परमेस्वर ताइको चानको बिसोइता पिका साक्सिता वा खाङधुरि पाका मान्थुखे।

१ युहन्‍ना 5:20

केलाइ गिनाखे, कि परमेस्वरको चान येसु ख्रिस्ट इदोइ सुमिङता लोका हि, जाइ सत्ये हि वासेहेङ नाल्लि द्वाको दोअ्तेङ परमेस्वर केलाइहेङ समझ पिका हि। जाइ सत्ये हि, केलाइ वा दोफा ए जेङतेङ हिनाहि, माकुनु वाको चान येसु ख्रिस्ट दोफा, वा दोङ सत्ये परमेस्वर कालाउ आनान्त जिबन हि।

प्रकास 3:7

येसु कासेहेङ एसा बुङ दोअ्हि, फिलाडेलफिया सहरको मन्डलिको स्वर्गदुतहेङ या सन्‍देस लेखे: का वाआङ हिघा, जाइ पबित्तरो कालाउ सत्ये हि, जाइ दोफा राजा दाउदको ताल्चा हि, जेलाउ का इङको ताल्चाहोइ फिनु हेअ्खा, हासु बुङ इङकोहेङ गि:लि माद्वाङ, कालाउ जेलाउ का इङको ताल्चाहोइ फिनु गि:ताङका हासु बुङ इङकोहेङ हेअ्लि माद्वाङ। जेदोङ नेलाइहेङ दोअ्खा वासेहेङ हिङसु।