रोमि 1:16 - Dhimal NT

¹⁶ कालाउ का येसु ख्रिस्टको सुसमाचारता गर्ब पाङका। हाइपालिपानु खाङधुरि पाका झाराङको मुक्तिको भाअ्सिङ इदोइ परमेस्वरको सरबुङ हि, लाम्फा यहुदिगेलाइहेङ कालाउ गैर-यहुदिगेलाइको भाअ्सिङ बुङ हि।

रोमि 1:16 Iomraidhean Croise

मर्कुस 8:38

इदोइ सोमोइता पापि कालाउ खाङधुरि मापाका पुसतागेलाइ जाइ कासेहेङ परमेस्वरको रुपता सुइकार पालि कालाउ काङको सिक्स्यागेलाइ केम्लि इन्कार पाखे, का द्‍याङको चान बुङ आबाको महिमा चुम्तेङ पबित्तरो स्वर्गदुतगेलाइ दोफा लोलाउ, वासेहेङ ताइको दोअ्लि इन्कार पाङका।

लुका 9:26

कालाउ हासु बुङ काङको बचनसो लेदेरनु, “का द्‍याङको चान बुङ ताइको महिमाता कालाउ आबाको महिमा चुम्तेङ पबित्तरो स्वर्गदुतगेलाइ दोफा लोलाउ, वाको दोफा का बुङ लेदेरयाङका।”

युहन्‍ना 7:35

कालाउ यहुदि आगुवागेलाइ ता-ताइमिता दोअ्हि, “वा हिसो हानिलि तोम्हि, कालाउ केलाइ वासेहेङ मादुसुताङ? जेङलि दोअ्, वा ग्रिक सहरगेलाइता जोसो-ओसोङ हिका यहुदिगेलाइकोता हानितेङ सिक्स्या पिहि।

साल्न्हाका चात्या 3:26

परमेस्वर झाराङ खान्तेङ लाम्फा ताइको सेवकहेङ सिकासो सिन्हु पाहि कालाउ नेलाइकोता दिङगिल्हि, कालाउकि परमेस्वर नेलाइ झाराङहेङ पापमय जिबनसो लाअ्पातेङ आसिस प्याको।

रोमि 10:17

ओदोङ भाअ्सिङ खाङधुरि एन्सालाउ लोखे जेलाउ नाअ् बचन हिङखेना, कालाउ इङको बचन ख्रिस्टको बचन दोङ हि।

रोमि 15:19

इदोइ चिन्हागेलाइ कालाउ भारभुसाइका कामगेलाइ पबित्तरो आत्माको सरबुङ पाहासो दोङ का पाका हिघा। एसापा का यरुसेलेम सहरसो इल्लुरिकन प्रदेस थेकापाङ द्‍यापाहाङ दोअ्ताङका द्‍याङगेलाइहेङ ख्रिस्टको सुसमाचार पुर्न रुपहोइ प्राचार पाका हिघा।

रोमि 15:29

कालाउ का गिखा कि, जेलाउ का नेलाइकोता ल्वाङका, ख्रिस्टको प्रसस्त आसिस नेलाइ दोफा बाखाराइ याङका।

रोमि 2:9

कालाउ दुस्ट काम पाकालाइ झाराङ द्‍याङगेलाइ ह्रुता दुख कालाउ कस्ट आइ लागियाङ, लाम्फा यहुदिगेलाइता कालाउ न्हुसो गैर-यहुदिगेलाइता।

रोमि 4:11

परमेस्वर आब्राहामहेङ वाको खाङधुरि पाहासो दोङ खाताना मापालाउ बुङ वाको आगाता धर्मि बानाइहि। कालाउ खातानाको चिना चाहि सुइकारका छाप दोङ हि। ओदोङ भाअ्सिङ आब्राहाम खाताना मापाका कालाउ परमेस्वरहेङ खाङधुरि पाका झाराङको आत्मिक आबा जेङका हि। कालाउ इम्बालाइको खाङधुरिको कारनहोइ धर्मि बानाइका हि।

1 कोरिन्थि 15:2

जेसापा का प्राचार पाका सुसमाचारता नेलाइ खाङधुरि पातेङ हिसुना पानु, परमेस्वर इङको सुसमाचार पाहासो नेलाइहेङ बान्चि पावा, माकुनुते नेलाइ खाङधुरि पाका ब्यर्थ जेनावा।

1 कोरिन्थि 2:2

हाइपालिपानु का नेलाइ दोफा हिलाउ येसु ख्रिस्ट कालाउ वासेहेङ क्रुसता ताङगाइतेङ सिका काथा बाहेक आरु हाइ दोङ काथा मागिका का थानिका हिघाखा।

1 कोरिन्थि 2:4

काङको सिक्स्या कालाउ उपदेस मानिमुइ बुद्दि भाइका मान्थुघाखे, कालाउ पबित्तरो आत्माको सरबुङसो नेलाइहेङ काङको दोअ्का सन्‍देस सत्ये तिङपा पिहि।

1 कोरिन्थि 9:12

जेसापा आरुगेलाइ नेलाइसो हाइ दोङ निङखे पानु, निसित दोङ बार्नाबास कालाउ का इम्बालाइ खान्तेङ झन हेन्जा निङका योग्यको हिनाहि। कालाउ केलाइ इङको पिलि गोयाङ दोअ्तेङ कर मापानाहि। भरु ख्रिस्टको सुसमाचार हिङपालि हिदोइ बुङ बाधा मापोरियाको दोअ्तेङ दोङ केलाइ गोताङ काथा सिहितेङ हिनाहि।

1 कोरिन्थि 9:18

एन्सा जेङनु काङको इनाम हाइ वाला? काङको इनाम केवल इदोइ झोको खिनिङ हि कि, एन्साङ सुसमाचार प्राचार पालि निनाको, कालाउ बुङ कासेहेङ सुसमाचार प्राचार पातेङ ताइमि बान्चिलिको भाअ्सिङ नेलाइसो साघाइ निङलि होक हि।

2 कोरिन्थि 2:12

ख्रिस्टको सुसमाचार प्राचार पालिको भाअ्सिङ तरोआस सहरता हानिलाउ परमेस्वर कासेहेङ सुसमाचार प्राचार पालि बार्का माउका पिका हिघाहि।

2 कोरिन्थि 4:4

कालाउ इदोइ सुमिङको दिर साइतान उङको खाङधुरि मापाकालाइको बिद्दिहेङ कान्हाँ बानाइ पिका हि, ओदोङ भाअ्सिङ इम्बालाइ ख्रिस्टको बारेता सुसमाचार कालाउ वाको महिमाको बारेता बुझिलि मादोखे, हाइपालिपानु ख्रिस्ट परमेस्वरको स्वरुप हि।

2 कोरिन्थि 9:13

पिका सेवाहोइ नेलाइ सत्ये हिसुना दोअ्तेङ प्रमान पालि हेन्जाङ द्‍याङगेलाइ परमेस्वरको बाखानाइ पाखे, हाइपालिपानु नेलाइ येसु ख्रिस्टको सुसमाचार सत्ये हि दोअ्तेङ खाङधुरि पासुखेना गरिब कालाउ आरु खान्धुराइगेलाइहेङ बुङ उद्दार मनहोइ पितेङ इदोङहेङ केम्सुखेना।

गलाति 1:7

कालाउ बास्ताबता एनोङ खिनिङ सत्ये सुसमाचार हि, कालाउ हेथे द्‍याङगेलाइ नेलाइहेङ आवाइ तुपातेङ ख्रिस्टको सुसमाचारहेङ परिबतन पालि भोदोङखे।

1 थेस्लोनिकि 2:13

ओदोङ भाअ्सिङ केलाइ बुङ परमेस्वरहेङ धन्यबाद पिनाखे, कि नेलाइ केलाइसो हिङका बचन जातिङकोङ परमेस्वरसो लोका बचन दोङ हि, इङको नेलाइ द्‍याङगेलाइसो लोका बचन भाइका माको, कालाउ परमेस्वरसो लोका बचन कोनिङ ग्रहन पासुन्हा, कालाउ इङको परमेस्वरको बचन एला नेलाइ ख्रिस्टता खाङधुरि पाकालाइता काम पातेङ हि।

1तिमोथि 1:11

इदोइ सहि सिक्स्या केलाइको आधभुत परमेस्वरको महिमाको बारेता सुसमाचार दोफा सहमति हिखे, जाइ कासेहेङ प्राचार पाका जिम्माबारि सुम्पिका हि।

2 तिमोथि 1:12

ओदोङ सुसमाचार प्राचार पालिको भाअ्सिङ का झ्यालखानाता कस्ट भोगिलि गोइतेङ हिघा। कालाउ बुङ का मालेदेरखा, हाइपालिपानु का ख्रिस्टहेङ नाल्खा जाइ ह्रुता का भोरोसा बुङ ताअ्का हिघा। कालाउ कासेहेङ इदोइ निसित हि, कि परमेस्वर कासेहेङ जिम्मा पिका काथाहेङ ख्रिस्ट ताइमिङ आरोङ घुरितेङ मालोपा धाउ इङको काथा जोगाइतेङ ताअ्ताङ।

2 तिमोथि 1:16

प्रभु आन्सिफरसको जाहानहेङ क्रिपा पाको दोअ्तेङ का प्रार्थाना पाखा। हाइपालिपानु ओन्सिफरस का कस्टता हिलाउ भेतिलि लोहि कालाउ हेन्जाङ खेप साघाइहि। कालाउ कासेहेङ झ्यालखानाता भेतिलि लोलि बुङ मालेदेर हि।

2 तिमोथि 1:8

ओदोङ भाअ्सिङ केलाइको प्रभु येसु ख्रिस्टको बारेता द्‍याङगेलाइहेङ साक्सि पिलि मालेदेरसु। कालाउ का कैदता हिघा दोअ्तेङ बुङ मालेदेरसु, भरु परमेस्वर नेलाइहेङ पिका सरबुङ प्रयोग पालि गोइखे, कालाउ सुसमाचारको भाअ्सिङ काङको दुखता झ्वाइका जेङसु।

हिब्रु 4:12

परमेस्वरको बचन ते काम पातेङ हिका कालाउ हुसि हिका हि, कालाउ वाको बचन न्हेपाहाङ धार हिका कात्ति खान्तेङ बुङ चुका हि। इङकोहोइ लिता हानितेङ प्रान कालाउ आत्माहेङ खेङन्हा पापिखे। इङकोहोइ जोरनि कालाउ हारा सुधाङ पाल्खे। इङको परमेस्वरको बचनहोइ द्‍याङगेलाइको ह्रदयको बिचार कालाउ इच्छाहेङ झोअ्तेङ जाचिखे।

1पतरुस 4:16

कालाउ हासु बुङ ख्रिस्टतियन जेङका को कारन दुख भोगिखे पानुते वा मालेदेराको, भरु ख्रिस्टियान जेङका कारन वा परमेस्वरहेङ धन्यबाद प्याको।