प्रकास 7:3 - Dhimal NT

³ “केलाइ केलाइको परमेस्वरको बान्धाइतिगेलाइको कापालता मोहोर मालागाइपा धाउ माहामारि वासेहेङ हान्ति मापाको, इङको सोमोइसो प्रिथिबि, समुन्द्र माकुनु सिङगेलाइहेङ हाइ दोङ मानासापा।”

प्रकास 7:3 Iomraidhean Croise

मत्‍ति 24:22

परमेस्वर इङको माहा कस्ट कालाउ दुखको दिना आसा पोतो पाका हि जेसापा वा मापोतो पानु कालाउ बढेपानु हिदोइ बुङ द्‍याङ बान्चिलि मादोधाङ, कालाउ बुङ ताइको साल्कालाइको भाअ्सिङ इङको दिना पोतो पावा।

मत्‍ति 24:31

द्‍यापाहाङ आकासको एनोङ थामेसो भेनेङ ओताका थामे थेकापा परमेस्वरसो साल्का द्‍याङगेलाइहेङ जोम्पावा कालाउ द्‍याङको चान सानाइको बार्का गाला दोफाङ स्वर्गदुतगेलाइहेङ दिङगिल प्याङ।

युहन्‍ना 12:26

हासु बुङ काङको सेवा पाखे पानु, का दोफा लोसु कालाउ काङको चात्या जेङसु। कालाउ का जेता ह्याङका, इन्ताङ काङको सेवक ह्यावा। हासु बुङ काङको सेवा पाहे पानु काङको आबा वाको आदार पावा।

युहन्‍ना 3:33

कालाउ जाइ वाको साक्सि ह्रुका हि, वा चाहि परमेस्वर सत्ये हि दोअ्का काथाको प्रमान पिखे।

रोमि 6:22

कालाउ एला नेलाइ पापसो मुक्त जेङतेङ परमेस्वरको बान्धाइति जेङका हिसुन्हा। कालाउ नेलाइ इङको काथा पासुखेना जाइ पबित्तरोता थोङखे, कालाउ इङको को आन्त चाहि आनान्त जिबन दोङ हि।

प्रकास 13:16

न्हेतेङ राक्सेस गोताङ द्‍याङगेलाइहेङ बाध्ये बानाइहि, जाइ महत्वय पुर्न कालाउ जाइ महत्वय हिन हि, धनि कालाउ गरिब, बान्धाइति माकुनु जाइ बान्धाइति माजेङका, कि उङको झाराङ द्‍याङगेलाहेङ लाङति राक्सेसको मिङ ताइको दाम्पाहा खुर माकुनु ताइको कापालता छाप लागाइयाको।

प्रकास 13:17

राक्सेस इदोइ याको भाअ्सिङ पाहि कालाउकि सिरिप जाइ वाको ह्रुता छाप लागाइहि, वा दोङ आमेने पि:लि द्वाको कालाउ चोल्लि द्वाको। इङको छाप लाङति राक्सेसको मिङ हिघाहि माकुनु वाको मिङ तिङपाका सङख्या हिघाहि।

प्रकास 14:1

कालाउ न्हुसो का आरोङ स्वर्गदुतहेङ थुमाको सियोनको तिकारता जाअ्तेङ हिका तिङघा। वाको दोफाङ वाको ए लाख न्हे कुरि द्‍या हाजार द्‍याङगेलाइ हिघाहि। इम्बालाइको कापालता थुमाको कालाउ वाको आबाको मिङ लेखेका हिघाहि।

प्रकास 14:9

कालाउ सुम्तेङ स्वर्गदुत बाकि न्हेमि स्वर्गदुतहेङ पिताइहि। वा आहुतेङ दोअ्हि, “उङको द्‍याङगेलाइ जाइ इङको राक्सेस कालाउ इङको को मुर्तिहेङ पुजिखे, कालाउ इम्बालाइ जाइ इङको राक्सेसको चिन्हा ताइको कापालता माकुनु खुरगेलाइता दागाइखे, परमेस्वर उङको द्‍याङगेलाइहेङ ओसारापा खाका गोरा आम्पावा, जेदोङ चि मामिसालाइका ह्यावा। इङको को मतलप परमेस्वर बिना मोनोइसो इम्बालाइ दोफा मारेम्फाङ चेर ताम्पाहि। उङको द्‍याङगेलाइहेङ मे, कालाउ आङग्रोगेलाइता साताइयाङ। जेलाउ परमेस्वर इङको द्‍याङगेलाइहेङ साजाइ प्यावा, कालाउ पबित्तरो स्वर्गदुत थुमा दोफा इम्बालाइहेङ तिनावा।

प्रकास 19:2

वाको बाखानाइ पासु! हाइपालिपानु वाको गोताङ न्याय सत्ये हि कालाउ ठिक हि। वा इङको बारका सहरहेङ साजाइ पिहि जाइ मिङ चलिका बेस्या भाइका हि। हाइपालिपानु वा सुमिङता हिका द्‍याङगेलाइहेङ पाप पालि उसकाइहि। परमेस्वर वासेहेङ घुरिपातेङ तिरिपिहि हाइपालिपानु वाको बान्धाइतिगेलाइहेङ सेअ्हि।”

प्रकास 20:4

कालाउ न्हुसो, का आधे सिङहासनगेलाइ तिङघा, वाको दोफा योम्तेङ हिका द्‍याङगेलाइ दोफा सासन पालि खाबारा पिहि। का इम्बालाइको आत्माहेङ बुङ तिङघा जाइको पुरिङ पाल्पाहि हाइपालिपानु इम्बालाइ येसु दोङ प्रभु दोअ्तेङ सुइकार पाहि कालाउ इम्बालाइ परमेस्वरको बचनहेङ खाङधुरि पाहि। जेदोङ उङको द्‍याङगेलाइ इङको राक्सेसको माकुनु वाको मुर्तिको पुजा मापाहि, कालाउ इम्बालाइ ताइको कापालता माकुनु खुरता राक्सेसको दागाइका चिन्हा मालागाइहि। इदोइ द्‍याङगेलाइ आरोङ सिन्हुहि कालाउ ए-हाजार बासारको भाअ्सिङ ख्रिस्ट दोफा सासन पाहि।

प्रकास 22:4

इम्बालाइ परमेस्वरहेङ ताइको आगा-आगाता तिनावा, कालाउ वाको मिङ इम्बालाइको कापालता लेखेका ह्यावा।

प्रकास 6:6

कालाउ न्हुसो, का द्‍यामि हुसि हिका प्रानिगेलाइ माझासो हासु बुङ नुइ धुइका हिङघा इङको गाला द्‍याङको भाइका हिघाहि। इङको गाला दोअ्हि, “भबिस्यता प्रिथिबिता आनिकाल जेनाङ कालाउ ओदोङ भाअ्सिङ ए दिनाको ज्याला ए-किलो उम माकुनु सुम किलो माकै चोल्लि हेन्जा जेनाङ। कालाउ चुइति कालाउ दाखरसको दाम माफेरियाङ।”

प्रकास 7:1

कालाउ न्हुसो, का सुमिङको द्‍या कुन्हाता द्‍यामि स्वर्गदुतगेलाइहेङ जाअ्तेङ हिका तिङघा। परमेस्वर इङको स्वर्गदुतगेलाइहेङ माहामारिसो इदोइ सुमिङहेङ द्‍याङगेलाइको हान्ति पालि खाबारा पिहि, चाहे इङको समुन्द्रता ह्याको याते भोनोइता। ओबालाइ भेरमाहेङ सुमिङको गोताङ द्‍या कुन्हासो रोकिहि, कालाउकि समुन्द्रता कालाउ भोनोइता कालाउ झारता भेरमा दोलाइतेङ माह्याको। का भेनेङ स्वर्गदुतहेङ नुहे भारि देखाल जेङका तिङघा। वाको दोफा सिन्हुका परमेस्वरको दागाइका चिन्हा हिघाहि, उङको स्वर्गदुत उङको द्‍यामि स्वर्गदुतगेलाइहेङ बारका तिराराइका गालाहोइ काइतेङ वा दोअ्हि,

प्रकास 9:4

जेसाङ द्‍याङगेलाइहेङ चिम्ताङको चुकाहोइ तुखे, एन्साङ दोङ इङको चाकागेलाइहेङ कस्ट पिलि खाबारा पिहि कालाउ सेअ्लिको भाअ्सिङ माको कि ना माइना थेकापा इङको द्‍याङगेलाइहेङ कस्ट पिहि जाइको कापालता परमेस्वरको मोहर मान्थु। कालाउ इम्बालाइहेङ प्रिथिबिको घासि, हिदोइ बुङ झारगेलाइ, कालाउ हिदोइ बुङ सिङसोङको, हान्ति पालि खाबारा मान्थुघाहि।