प्रकास 18:3 - Dhimal NT

³ या इदोइ भाअ्सिङ जेनाङ हाइपालिपानु, इदोइ बेबाल जाइ बेबिलोन सहर हि, वा गोताङ सारभिको गोताङ द्‍याङगेलाइहेङ ताइको गोरा आम्पाहि, जेदोङ वाको मुर्तिगेलाइको पुजा हि। गोताङ प्रिथिबिको गोताङ राजागेलाइ वाको दोफा मारेम्का काम पालिको भाअ्सिङ वाको दोफा झ्वाइनाहि। प्रिथिबिको गोताङ ब्यापारिगेलाइ धनि जेङहि, हाइपालिपानु उङको बेबालको इच्छा जाङका आनेमानेगेलाइ निङलि हि।”

प्रकास 18:3 Iomraidhean Croise

लुका 7:25

माकुनु नेलाइ हाइ खाङलि हानेसुना कुनु? माको हाइ जाङका धाबा होङका द्‍याङगेलाइहेङ? जाङका-जाङका धाबा होङका कालाउ मोज मज्जाता हिका द्‍याङगेलाइते राजाको दरबारता कि हिखे।

1तिमोथि 5:11

कालाउ म्हुइका उमेरको के सिकालाइको मिङ चाहि के सिका बेबालको सुचिता मालेखेसु, हाइपालिपानु जेलाउ इम्बालाइको जिउको इच्छा ख्रिस्टको सेवा पाका इच्छा खान्तेङ हेन्जा हिखे, इम्बालाइ ख्रिस्टको कामहेङ लाअ्तेङ आरोङ बिहु पालि इच्छा पाखे।

प्रकास 14:8

इन्ता भेनेङ स्वर्गदुत बुङ हिघाहि जाइ लाङति स्वर्गदुतहेङ पिताइतेङ दोअ्हि, “एला या नासा हि। बेबिलोन सहर हेन्जा नासा हि। इङको बेबाल गोताङ द्‍याङ जातिहेङ ताइको गोराहोइ म्हापाका हिघाहि, जेदोङ दोअ्का को आर्था हि कि, वा गोताङ द्‍याङ जातिगेलाइहेङ ओसारापा हेन्जा मारेम्का ब्यभार धिरपाहि हाइपालिपानु वा झाराङहेङ मुर्ति पुजिलि धिरपाहि।”

प्रकास 17:2

प्रिथिबिको राजागेलाइ वाको दोफा कासिबिरि पाहि, इङको बेबाल गोताङ द्‍याङ जातिहेङ ताइको गोराहोइ म्हापाका हिघाहि, जेदोङ दोअ्का को आर्था हि कि वा गोताङ द्‍याङगेलाइ जातिहेङ ओसारापा हेन्जा मारेम्का ब्यभार पालि धिरपाहि हाइपालिपानु वा झाराङहेङ मुर्ति पुजिलि धिरपाहि।”

प्रकास 18:19

इम्बालाइ ताइको दुख तिङपालिको भाअ्सिङ, इम्बालाइ ताइको पुरिङता धुला उतावा। इम्बालाइ खारावा कालाउ जिउधाइ ल्होपाङ तुम्ता थेकावा कालाउ बारका गालाहोइ दोअ्तावा, “बारका सहर बेबाल हेन्जा थिहि! समुन्द्रको गोताङ जाहाजको गोताङ गिह्रि इङको सहरको सम्पतिको धनि जेङहि। कालाउ एला ए घान्टा ताङ जेदोङ सहरता हिका गोताङ आमेनेगेलाइ नासा हि।

प्रकास 18:23

नाङकोता द्‍याङगेलाइ आरोङ हेलाउ बुङ गेसाको जोल्तेङ हिका फाइसालामका मातिनाङ, इम्बालाइ आरोङ हेलाउ बुङ वाजान कालाउ बेजानको बिहु पाकाको गाला माहिनाङ। इन्ताको ब्यापारिगेलाइ गोताङ सुमिङता झाराङ खान्तेङ प्रभाबसालि हिघाहि। कालाउ इन्ताको जादुगरगेलाइ सुमिङको गोताङ द्‍याङगेलाइहेङ धोका पिहि।

प्रकास 18:7

नाअ् इङको बेबालहेङ मारेम्फाङ पिडा कालाउ दुख पि, जेदोङ वाको माताइका जिबन कालाउ ताइमिङ ह्रुता गर्वको बानाबोर जेनाङ। वा ताइमिहेङ दोअ्हि, ‘का द्‍याङगेलाइहेङ रानिको भाइपाङ सासन पाखा कालाउ का बिना के को मान्थुघा। कालाउ कासेहेङ के सिकाको पिडा माजेनाङ।’

प्रकास 18:9

“जेलाउ प्रिथिबिको राजा जाइ वाको दोफा कासिबिरि पाहि कालाउ माताइतेङ मोजमाज्जा पाहि, जेलाउ इम्बालाइ इङको बेबालहेङ ओतेङ हिलाउ धुवा ओल्लेतेङ हिका तिनावा, इम्बालाइ वाको भाअ्सिङ खारावा कालाउ जिउधाइ ल्होपाङ तुम्ता थेकावा।”