प्रकास 15:6 - Dhimal NT

^6-7 कालाउ न्हुसो, न्हि लोङ स्वर्गदुतगेलाइ इङको मुन्दिरसो बाहार लोहि, जाइ आम्तिम न्हि लोङ बिपतिगेलाइ चुम्तेङ ल्वाङ। ओबालाइ चिल्काका जे:का लोखोन धाबा होङका हिघाहि, कालाउ इम्बालाइको तुम्ता वरिपरि सोनाको पेत्तिगेलाइ बुङ हिघाहि। कालाउ द्‍यालोङ हुसि हिका प्रानिगेलाइ मध्ये एमि कालाउ गोताङ स्वर्गदुतहेङ सोनाको जाम बात्ति पिहि। जेदोङ जाम बात्ति जेलाउलाउ बुङ बान्चितेङ हिका परमेस्वरको हेथे थिलि गोइका साजाइ पोङघाका हिघाहि।

प्रकास 15:6 Iomraidhean Croise

लुका 24:4

जेलाउ इम्बालाइ इङको बिसोइता आवाइतुतेङ हिघाहि, कालाउ जाहाँका धाबा होङतेङ हिका न्हेमि वाजानगेलाइ इम्बालाइको भेरपाङ जाअ्हि।

प्रकास 1:13

“हिदोइ बुङ द्‍याङ भाइका तिङघाखे” जेदोङ चाहि चेरादानिगेलाइको माझाता जातेङ हिघाहि। वा ताइको पाइताला थेकाका लोखोन धाबा होङका हिघाहि। कालाउ वाको तुम्ता भरि सोनाको रङको फिता लागाइका हिघाहि।

प्रकास 14:15

ठिक एन्सालाउ दोङ, एमि भेनेङ स्वर्गदुत स्वर्गको मुन्दिरसो परमेस्वरको सन्‍देस चुम्तेङ बाहार लोहि। वा द्‍यातेङ स्वर्गदुत हि। वा बादेल ह्रुता योम्तेङ हिका द्‍याङसो आहुतेङ दोअ्हि, “प्रिथिबिता बालि मिङलि दोहोइ। बालि चेका सोमोइ लोहोइ। ओदोङ भाअ्सिङ एला ताइको काचियासो बालि चेसु।”

प्रकास 14:17

कालाउ न्हुसो, जाइ स्वर्गता हिखे एमि भेनेङ स्वर्गदुत स्वर्गको मुन्दिरसो बाहार लोहि। इदोइ नातेङ स्वर्गदुत हि। वाको दोफा बुङ एनोङ चु:का धार काचिया हिघाहि।

प्रकास 15:1

जेलाउ वा दोअ्लि दोहि, का आकासता एनोङ भेनेङ फरक चिन्हा तिङघा, जेदोङ हेन्जाङ आचाम्माको कालाउ हेथे थिलि गोइका हिघाहि। न्हि लोङ स्वर्गदुतगेलाइ न्हि लोङ भेनेङ खाल्को बिपतिगेलाइ चुमाका हिघाहि। इदोइ बिपतिगेलाइ आम्तिम हि हाइपालिपानु जेलाउ इदोइ नासातावा कालाउ परमेस्वरको चेरचुङ दोकावा।

प्रकास 19:8

परमेस्वर वासेहेङ पबित्तरो, सुद्द कालाउ जाहाका धाबा होङलि पिहि, जेदोङ रेस्मिहोइ बानाइका हिघाहि।” रेस्मिको धाबा खान्धुराइ ओनेगेलाइको रेम्का कामगेलाइ तिङपाखे।