प्रकास 1:18 - Dhimal NT

¹⁸ का जिबनको मुल हिघा, का एखे सिघा। कालाउ एला का सिन्हुका हिघा कालाउ का जेलाउलाउको भाअ्सिङ सिन्हुतेङ ह्याङका, कालाउ का दोफा सिका ह्रुता खाबारा हि, कालाउ पाताल ह्रुता बुङ जेता सिका द्‍याङगेलाइ हिखे।

प्रकास 1:18 Iomraidhean Croise

मत्‍ति 11:23

ए कर्फनहुम सहरको द्‍याङगेलाइ, हाइ नेलाइ सोचिसुखेना स्वर्गता साम्मानित जेङस्वाना माको नेलाइ साम्मानित माजेङस्वाना। नाअ् नरकता हुलाना हाइपालिपानु सोदोम सहरता बुङ नेलाइहेङ भाइपाङ सरबुङसाइका कामगेलाइ तिङपाकानु सोदोम सहर एला थेकापा हिधावा।

मत्‍ति 16:19

का परमेस्वरको सासनको ताल्चा नेलाइहेङ प्याङका जेलाउ नेलाइ इदोइ प्रिथिबिता न्यायको भाअ्सिङ जिङस्वाना कालाउ इङको न्याय स्वर्गता परमेस्वरको न्याय जेनावा। जेलाउ नाअ् इङको प्रिथिबिता हासुहेङ बुङ माफ प्याना कालाउ इङको माफ परमेस्वरको माफ जेनावा।

लुका 24:5

उङको बेबालाइ मेनाङ थिहि कालाउ तुघुरहि। कालाउ उङको न्हेमि वाजान बेबालाइहेङ दोअ्हि, सिन्हुका द्‍याङहेङ नेलाइ हाइ पालि सिकालाइको माझाता भोसुखेन्हा?

युहन्‍ना 11:25

येसु मार्थाहेङ दोअ्हि, “का ओदोङ हिघा जाइ सिका द्‍याङगेलाइहेङ आरोङ जिबन पिखे। जाइ कासेहेङ खाङधुरि पाखे, जेसापा वा सिलाउ बुङ आरोङ सिन्हुताङ।

युहन्‍ना 14:19

कोम्हा सोमोइ न्हुसो सुमिङको द्‍याङगेलाइ कासेहेङ आरोङ मातिनाङ, कालाउ नेलाइ कासेहेङ तिङस्वाना। हाइपालिपानु का आरोङ सिन्हुताङका कालाउ नेलाइ बुङ सिन्हुतेङ हिस्वाना।

रोमि 6:9

हाइपालिपानु केलाइ गिनाखे कि, येसु ख्रिस्ट सिकालाइसो सिन्हुतेङ आरोङ हेलाउ बुङ मासियाङ, कालाउ वाको ह्रुता सिकाको एला हिदोइ बुङ खाबारा मान्थु।

2 कोरिन्थि 13:4

हाइपालिपानु कमजोरिता वा क्रुस्टा तोइन्हाहि, कालाउ परमेस्वरको सरबुङता वा आरोङ सिन्हु पाङ हि। एसा पासोङ केलाइ ख्रिस्ट कोमजोर जेङनाङ कोनिङ केलाइ बुङ कोमजोर हिनाहि, कालाउ नेलाइ दोफाको केलाइको ब्यभारता परमेस्वरको सरबुङ पाहासो केलाइ वाको दोफा सिन्हुतेङ ह्याङ।

गलाति 2:20

या इसिका हि, कि का बुङ येसु ख्रिस्ट दोफाङ क्रुस्टता सिघा, एला उसो का जियाइका माको भरु येसु ख्रिस्ट का लिता जियाइखे। जेदोङ जिबन जिउता एला जियाइखा, इङको परमेस्वरको चान ह्रुता खाङधुरि पातेङ जियाइखा, जाइ कासेहेङ हेन्जा प्रेम पाखे कालाउ काङको भाअ्सिङ ताइको जिबन बुङ आरपन पाहि।

कलस्सि 3:3

हाइपालिपानु नेलाइ ताइको पापमय स्वभाबता सिका हिसुना, कालाउ एला नेलाइ परमेस्वरता ख्रिस्ट दोफा ए जेङतेङ हिसुन्हा, कालाउ द्‍याङगेलाइ नेलाइको इदोइ नावा जिबनको बिसोइता माबुझिखे।

हिब्रु 1:3

वा दोङ परमेस्वरको महिमाको रुप कालाउ वा दोङ परमेस्वरकोङ स्वभाबको जातिङकोङ प्रति रुप हि, कालाउ गोताङ सुमिङहेङ ताइको सरबुङसाइका बचनहोइ सामाराइखे। कालाउ वा दोङ द्‍याङगेलाइहेङ ओबालाइको पापगेलाइसो स्यामा पापाका काम पालि दोतेङ वा स्वर्गता परमेस्वरको महिमाको दाम्पाहा खुर भारि झाउका साम्मानको थामेता योम्हि।

हिब्रु 12:2

केलाइको खाङधुरि सुरु पाका कालाउ सिद्द बानाइका येसुहेङ खाङतेङ ह्याइने, वा दोङ भबिस्यता निङका आनान्दको भाअ्सिङ आपामानहेङ हाइ दोङ भाइपा माथानिसिङ क्रुसको कस्ट भोगिहि कालाउ परमेस्वरको सिङहासनको दाम्पाहा भारि झाउका साम्मानको थामेता बिराजमान हितेङ हि।

हिब्रु 7:16

येसु लेबि कुलको हिनाङ पुजारि जेङका माको, भरु वाते पुजारि जेङलि व्यवस्थाता लेखेका जेदोङ हि इङको काम पुरा पानाङ पुजारि जेङहि।

हिब्रु 7:25

ओदोङ भाअ्सिङ येसु पाहासो परमेस्वरको भेरपा लोकालाइहेङ वा जेलाउ बुङ उद्दार पालि द्वाङ, हाइपालिपानु इम्बालाइको भाअ्सिङ मध्येस्ताको प्रार्थाना चढाइलि वा जेलाउ बुङ सिन्हुतेङ हिखे।

प्रकास 10:6

स्वर्गदुत इङको मिङको केरा चाहि जाइ जेलाउलाउ बुङ सिन्हुका हितेङ हिखे, वा दोङ स्वर्ग, प्रिथिबि, समुन्द्र कालाउ इन्ता हिका गोताङ आमेनेगेलाइ सिरजाइहि। स्वर्गदुत दोअ्हि, “हिदोइ बुङ काथाको भाअ्सिङ आरु ह्रुम्लि आवास्यक मान्थु। गोताङ आमेने एला पुरा जेनाङ।”

प्रकास 2:8

येसु कासेहेङ एसा बुङ दोअ्हि, स्मुरना सहरको मन्डलिको स्वर्गदुतहेङ या सन्‍देस लेखे: का वाआङ हिघा जाइ गोताङ आमेने सुरु पाहि, कालाउ का आवाङ हिघा जाइ गोताङ आमेने आन्त्य बुङ पाहि। का सिका हिघाखा, कालाउ एला सिन्हुका हिघा कालाउ जेलाउलाउको बुङ भाअ्सिङ सिन्हुतेङ ह्याङका। जेदोङ का नेलाइहेङ दोअ्खा वासेहेङ हिङसु।

प्रकास 20:14

झाराङ द्‍याङगेलाइको जाइको मिङ जिबनको कितापता लेखेका मान्थु, इङको झाराङहेङ ताल भाइका बारका मेता थाइगिल्हि। कालाउ न्हुसो एला सिका आरोङ माजेनाङ, सिका द्‍याङगेलाइको थामे बुङ आरोङ माह्याङ, हाइपालिपानु गोताङ द्‍याङगेलाइ जाइको मिङ जिबनको कितापता लेखेका मान्थु, इम्बालाइ झाराङहेङ ताल भाइका बारका मेता थाइगिल्पिहि। मेको ताल्ता निङका इदोइ साजाइहेङ न्हेतेङ सिका दोअ्खे।

प्रकास 3:7

येसु कासेहेङ एसा बुङ दोअ्हि, फिलाडेलफिया सहरको मन्डलिको स्वर्गदुतहेङ या सन्‍देस लेखे: का वाआङ हिघा, जाइ पबित्तरो कालाउ सत्ये हि, जाइ दोफा राजा दाउदको ताल्चा हि, जेलाउ का इङको ताल्चाहोइ फिनु हेअ्खा, हासु बुङ इङकोहेङ गि:लि माद्वाङ, कालाउ जेलाउ का इङको ताल्चाहोइ फिनु गि:ताङका हासु बुङ इङकोहेङ हेअ्लि माद्वाङ। जेदोङ नेलाइहेङ दोअ्खा वासेहेङ हिङसु।

प्रकास 4:9

जाइ सिङहासनता बिराजमान हिका हि वा दोङ हि जाइ जेलाउलाउ बुङ सिन्हुका हितेङ हिखे। जेलाउ बुङ हुसि हिका प्रानिगेलाइ वासेहेङ महिमा, आदार, कालाउ धन्यबाद पिखे, ए कुरि द्‍यामि आगुवागेलाइ वाको आगाता तुघुरतेङ वाको आराधाना पाखे। इम्बालाइ ता-ताइको मुकुट सिङहासनको आगाता ताअ्तेङ या दोअ्ताङ:

प्रकास 5:14

कालाउ इङको द्‍यालोङ हुसि हिका प्रानिगेलाइ दोअ्हि। “आमेन।” कालाउ उङको आगुवाहगेलाइ तुघुरतेङ कालाउ आराधाना पाहि।

प्रकास 6:8

कालाउ का याउका रङगको एनोङ ओह्याँ तिङघा। ओह्याँ सावारहेङ काल दोअ्घाहि। वाको भेरपा पाअ्तेङ न्हु हानिघाहि। वासेहेङ सुमिङको ए चौथाइ द्‍याङगेलाइहेङ सेअ्लि खाबारा निङहि। कालाउ वा ओबालाइहेङ कात्तिहोइ सेअ्हि। वा ओबालाइहेङ म्हितुपाङ सेअ्हि कालाउ मारेम्का मिसाहोइ सेअ्हि कालाउ झारभारिको गुपुसगेलाइसो सेअ्लि लाअ्पिहि।

प्रकास 9:1

कालाउ जेलाउ नातेङ स्वर्गदुत ताइको सानाइ म्होहि, का एनोङ फुरु तिङघा जेदोङ स्वर्गसो प्रिथिबि ह्रुता हुल्का हिघाहि। इङको फुरुहेङ खारा खोलेलि ताल्चा पिहि। जेदोङको वाङखाराकाको हिदोइ बुङ आन्ता मान्थु।