फिलिप्पि 1:7 - Dhimal NT

⁷ नेलाइ झाराङको भाअ्सिङ का इसिका बिचार पालि ठिक हि, हाइपालिपानु का नेलाइ झाराङहेङ हेन्जा प्रेम पाखा, हाइपालिपानु का कैदि हिलाउ नेलाइ सुसमाचारको सुरिक्स्या कालाउ इदोइहेङ सत्ये प्रमानित पाका या न्हेनोङ दोङ कामता काङको दोफा परमेस्वरको आनुग्रहता झ्वाइनाका हिसुना।

धिमाल

⁷ नेलाइको बारेता इसिकाङ बिचार पालि कासेहेङ उचित लागेहि। हाइदोनु का नेलाइहेङ ताइको कोन्‍धाङसोङ माया पाखा। कालाउ का थुनाता हिलाउ बुङ, बाहार हिलाउ बुङ नेलाइ कासेहेङ रेम्‍काबानाल पारचारपालि रो इदोइहेङ जोगाइलि परमेस्‍वरको पिका इदोइ गोताङ निगाहाता नेलाइ कादोफाङ भाकर्‍हुका हिसुन्‍हा।

फिलिप्पि 1:7 Iomraidhean Croise

साल्न्हाका चात्या 20:23

का इदोइ झोको गिखा, कि गोताङ सहरता कैद कालाउ कस्ट का ह्रुता ल्वाङ दोअ्का पबित्तरो आत्मा कासेहेङ साक्सि पिखे।

साल्न्हाका चात्या 21:33

कालाउ रोमि सेनापति पावलको भेरपा हानितेङ रिम्हि, कालाउ न्हेनोङ झिन्झिरिहोइ वासेहेङ धेउलि दोअ्तेङ हुकुम पाहि। कालाउ सेनापति हिअ्हि, “इदोइ द्‍याङ हासु कालाउ वा हाइ गल्ति पाका हि?”

1 कोरिन्थि 13:7

इम्बालाइ हेलाउ बुङ माहारिखे कालाउ हेलाउ बुङ खाङधुरि पालि मालाअ्खे, गोताङ काथाता आस ताअ्खे, कालाउ दुख कालाउ कस्टता बुङ धर्य हिखे।

1 कोरिन्थि 9:23

सुसमाचारको आसिसगेलाइ का बुङ निङलि द्वाको दोअ्तेङ येसु ख्रिस्टको सुसमाचारको भाअ्सिङ का इदोइ गोताङ थोक पाखा।

2 कोरिन्थि 3:2

नेलाइ केलाइको परमेस्वरको भाअ्सिङ काङको पाका कामको सिफारिस पात्तारा भाइका दोङ हिसुना, जेदोङ केलाइको ह्रदयता लेखेका हि, जेदोङ केलाइ नेलाइको माझाता पाका आसल काम दोङ गोताङ द्‍याङगेलाइ नाल्लि कालाउ पढेलि दोखे।

2 कोरिन्थि 7:3

नेलाइहेङ दुसिका थोहोराइलि का इदोइ दोअ्का माको, हाइपालिपानु का लाम्फाङ दोअ्पिका हिघा, केलाइ पुरा ह्रदयहोइ नेलाइहेङ इदोइ झोको प्रेम पानाखे, कि केलाइ सिलाउ बुङ बान्चिलाउ बुङ केलाइ माखेङन्हाङ।

गलाति 5:6

जेसापा नेलाइ येसु ख्रिस्टको खान्धुराइगेलाइनु खाताना पालाउ बुङ मापालाउ बुङ हिदोइ बुङ फरक माजेङखे। कालाउ मुलि काथा या कि केलाइ ख्रिस्टता खाङधुरि पान्हाखे, कालाउ परमेस्वर कालाउ आरु द्‍याङहेङ बुङ प्रेम पान्हाखे।

एफिसि 3:1

ओदोङ भाअ्सिङ का पावल नाङको भाअ्सिङ प्रार्थाना पाङका, का येसु ख्रिस्टको कैदि जेङका हिघा हाइपालिपानु का नाअ् गैर-यहुदिगेलाइहेङ सुसमाचार प्राचार पाका काम पाघा।

एफिसि 4:1

प्रभुको सेवा पानाङ का एमि कैदि जेङका हिघा, कालाउ का नेलाइहेङ बिन्ति पाखा, परमेस्वर ताइको सान्तान जेङलि काइका को योग्यता आन्सार ताइको जिबन जियाइसु।

एफिसि 6:20

हाइपालिपानु कासेहेङ इदोङ सुसमाचार प्राचार पालि दिङगिल्का हि, कालाउ का एला इता झ्यालखानाता इङको सुसमाचार एमि परमेस्वरको राजदुत भाइपा पादोङखा। प्रार्थाना पापिसु, कि जेसाङ का धुइलि गोइका हि, एन्साङ दोङ का माअ्थिसिङ सुसमाचार प्राचार पालि द्वाको।

फिलिप्पि 1:12

खान्धुराइ ओनेगेलाइ इदोइ काथा नेलाइहेङ थाहा जेनाको दोअ्तेङ का भोखा, कि का ह्रुता जाइ लागिका काथागेलाइहोइ झन बास्ताबता सुसमाचार फाइलाइपालि साघाइ जेङका हि।

फिलिप्पि 1:13

इता थेकापा कि साम्रात महलको गोताङ सिपाइ कालाउ बाकि गोताङ द्‍याङगेलाइकोता बुङ इदोइ थाहा जेङका हि, कि का ख्रिस्टको सेवा पाका हिनाङ झ्यालखानाता हिघा।

फिलिप्पि 1:14

हेन्जा जोसो खान्धुराइ ओनेगेलाइ, का एला झ्याल्खानाता परेकाता प्रभुता साहासि जेङका हि, कालाउ परमेस्वरको बचन साहास सो प्राचार पाका जेङका हि।

फिलिप्पि 1:5

हाइपालिपानु नेलाइ सुसमाचारता खाङधुरि पाका दिनासोङ एला थेकापा येसु ख्रिस्टको बारेता सुसमाचार प्राचार पालि कासेहेङ साघाइकानाङ का धन्यबाद पिखा।

फिलिप्पि 2:22

कालाउ नेलाइहेङ थाहा हि, कि हेसा वा ताइमिहेङ खाङधुरि योग्य तिङपाहि, जेसाङ चान आबा दोफा सेवा पाखे, एन्साङ दोङ तिमोथि का दोफा सुसमाचारको कामता सेवा पाहि।

फिलिप्पि 4:14

कालाउ बुङ नेलाइ कासेहेङ ताका पिगिल्तेङ दुखता साघाइकाता धन्यबाद हि।

फिलिप्पि 4:15

नाअ् फिलिप्पिको द्‍याङगेलाइ ताइमिङ गिसुखेना, कि नेलाइहेङ सुसमाचार प्राचार पाका दिनासो जेलाउ का नेलाइको थामेसो म्यासिडोनिया प्रदेसता हानिघा, कासेहेङ नेलाइ बाहेक आरु हिदोइ बुङ मन्डलि ताका पितेङ मासाघाइहि।

फिलिप्पि 4:3

काङको खाङधुरि योग्य दोफाङको सानाइति, का नासेहेङ बिन्ति पाखा, कि इदोइ न्हेमि बेबाललाइहेङ मिलि पालि साघाइसु, हाइपालिपानु इम्बालाइ का दोफाङ सुसमाचार पालि क्लेमेस दोफा कालाउ काङको आरु दोफाङको सानाइतिगेकाइ दोफा परिस्रोम पाका हि, जाइको मिङ जिबनको कितापता हि।

कलस्सि 4:18

का पावल, पात्ताराको इङको भाग नेलाइहेङ सेउपालि को भाअ्सिङ लेखेदोङखा। फोम ताअ्सु कि का झ्यालखानाता हिघा कालाउ काङको भाअ्सिङ प्रार्थाना पासु। नेलाइ दोफा परमेस्वरको आनुग्रह ह्याको। आमेन।

कलस्सि 4:3

केलाइको भाअ्सिङ बुङ प्रार्थाना पासु, कालाउकि ख्रिस्टको इङको रहस्यको सुसमाचार प्राचार पालि परमेस्वर केलाइहेङ दामा खोलि पाप्याको, जाइको भाअ्सिङ का झ्याल्खानाता हिघा।

1 थेस्लोनिकि 5:5

का इसिका दोअ्खा, हाइपालिपानु नेलाइ झाराङ द्‍याङ फाइसालामका कालाउ दिनाको द्‍याङ कोनिङ रेम्फा ब्यभार पासु कालाउ आसल काम पासु। हाइपालिपानु केलाइ खान्धुराइगेलाइ इङको कितिकितिकाता हिका कालाउ दुस्ट सुमिङको द्‍याङगेलाइ भाइपा माको, जाइ पाप पाखे कालाउ मारेम्का ब्यभार पाखे।

2 तिमोथि 1:8

ओदोङ भाअ्सिङ केलाइको प्रभु येसु ख्रिस्टको बारेता द्‍याङगेलाइहेङ साक्सि पिलि मालेदेरसु। कालाउ का कैदता हिघा दोअ्तेङ बुङ मालेदेरसु, भरु परमेस्वर नेलाइहेङ पिका सरबुङ प्रयोग पालि गोइखे, कालाउ सुसमाचारको भाअ्सिङ काङको दुखता झ्वाइका जेङसु।

2 तिमोथि 2:9

कालाउ ओदोङ सुसमाचार हिङपाकानाङ का आपाराधि कोनिङ कस्ट भोगितेङ हिघा। इङको झोको खिनिङ माको आपाराधि कोनिङ झिन्झिरिहोइ धेउनातेङ झ्यालखानाता परिका हिघा। कालाउ द्‍याङगेलाइहेङ परमेस्वरको बचन प्राचार पालि हिदोइ बुङ काथाहोइ रोकिलि माद्वावा।

फिलेमोन 1:13

का ओनेसिमसहेङ झ्यालखानाता सुसमाचार प्राचार पालि साघाइलिको भाअ्सिङ इता का दोफाङ ताअ्लि खाङघाखा। वा नाङको सात्ताता कासेहेङ साघाइलि दोअ्धावा, हाइपालिपानु का गिखा कि नाअ् कासेहेङ साघाइलि भोखेना।

हिब्रु 3:1

ओदोङ भाअ्सिङ परमेस्वर वाको दोफा स्वर्गता झ्वाइनालि काइका खान्धुराइ ओनेगेलाइ दोङ हिसुना, येसुता मन लागाइसु जाइ केलाइको भाअ्सिङ परमेस्वरको दुत कालाउ प्राधान पुजारि जेङका हि।

1पतरुस 4:13

याको बारेता लेङचासु, कालाउकि नेलाइ ख्रिस्ट भोगिका क्रुस्टता झ्वाइनाका हिसुना। ओदोङ भाअ्सिङ जेलाउ ख्रिस्ट गोताङ द्‍याङगेलाइहेङ ताइको महिमाता देखाल पिलि आरोङ ल्वाङ, कालाउ नेलाइको आनान्द जातिङकोङ बार्का जेनाङ।

1पतरुस 5:1

का नाअ् इन्ताको मन्डलिको आगुवागेलाइहेङ हाइ दोङ दोअ्लि भोखा, हाइपालिपानु का बुङ नेलाइ भाइकाङ एमि आगुवा हिघा। का ताइमिङ ख्रिस्टको हेन्जाङ सोमोइ लाम्फा निङका कस्ट तिङका हिघा। जेलाउ वा आरोङ धुरितेङ ल्वाङ, का बुङ वाको महिमाता साझेदार जेनाङका। एला का नेलाइहेङ आग्राह पाङका।

२ पत्‍रुस 1:13

कासेहेङ थाहा हि कि का मासिपा धाउ नेलाइ दोफा प्राय इङको काथागेलाइको बारेता दोअ्तेङ हिलि उचित हि, कालाउकि नेलाइ इङको काथागेलाइ मानिल्सु।

१ युहन्‍ना 3:14

केलाइ गिनाखे, कि केलाइ सिकाको सरबुङसो स्वतन्तरो जेङका हिनाहि कालाउ एला केलाइ दोफा आनान्तको जिबन हि। हाइपालिपानु केलाइ आरु खान्धुराइगेलाइहेङ प्रेम पानाखे, जाइ प्रेम मापाखे वा सिकाको सरबुङको आधिनता हिखे।