लुका 3:1 - Dhimal NT

¹ रोमि साम्रात तिबेरियासको सासन पाका तेनाऔङ बासारता जेलाउ पन्तियास पिलातस यहुदिया जिल्लाता बडा-हाकिम हिघाहि। जेलाउ राजा हेरोद गालिल जिल्लाको सासक हिघाहि। वाको ओने फिलिप इतुरिया कालाउ टेबेरियासको इलाकाता सासन पाघाखे, कालाउ लुसानियास दोअ्का द्‍याङ आबिलेनेको इलाकाता सासन पाघाहि।

धिमाल

¹ रोमि माहाराजा तिबेरिअस सिजरको राज पाका तेना बाअ्‍सार जेङका हिघाहि। इङको पहरता पन्‍तियस पिलातस यहुदिया माउजाको रोमि बारा हाकिम हिघाखे। रोमि माहाराजाको बसता हेरोद गालिल माउजाता राज पाघाखे। वाको ओने फिलिप इतुरिया रो त्‍रोखोनितिस माउजाता राज पाघाखे। कालाउ अबिलेने माउजाता लुसानियास दोअ्‌का द्‌याङ राज पाघाखे।

लुका 3:1 Iomraidhean Croise

मत्‍ति 14:1

इङको बेला राजा हेरोद येसुको पाका रेम्का कामगेलाइको नावाइ चार-चाराइका हिङहि।

मत्‍ति 14:3

हाइपालिपानु राजा हेरोद ताइको ओने, फिलिपको बे हेरोदियासको भाअ्सिङ युहान्नाहेङ रिम्तेङ कालाउ धेउतेङ झ्यालखानाता ह्वाका हिघाहि।

मत्‍ति 14:6

जेलाउ राजा हेरोदको जोलोम दिना लोहि, कालाउ रानि हेरोदियासको चामिन्दि ओबालाइको आगाता न्हातेङ राजा हेरोदहेङ लेङचापाहि।

मत्‍ति 22:17

रोमि साम्रातहेङ पोत तिरिलि ठिक हि या ठिक मान्थु?”

मत्‍ति 27:2

कालाउ ओबालाइ वासेहेङ जिङतेङ पिलातस हाकिमकोता जिम्मा पिपुहि।

मर्कुस 6:17

राजा हेरोद ताइमि दोङ आले सोमोइ लाम्फा ताइको ओने फिलिपको बे हेरोदियास दोफा बिहु पाका हिघाहि। कालाउ युहान्‍ना वासेहेङ दोअ्हि, “ताइको ओनेको बे हेङ ताअ्लि रेम्का माको, जेसापा कि ओने बान्चिकाङ हि! या उचित माको मोसाको व्यवस्था आन्सार।” ओदोङ भाअ्सिङ हेरोदियासहेङ लेङचापालिको भाअ्सिङ राजा हेरोद युहान्नाहेङ रिम्पालि लागाइतेङ कालाउ धेउतेङ झ्यालखानाता ह्वाहि।

मर्कुस 6:21

कालाउ एनि, राजा हेरोद ताइको जोलोम दिवस मानाइलिको भाअ्सिङ एनोङ बार्का भोज पिहि। वा ताइको बार्का आधिकारिगेलाइ कालाउ आधिकृतगेलाइ कालाउ गालिल जिल्लाको मुलि-मुलि द्‍याङगेलाइहेङ नेउता पिहि।

लुका 13:31

ओदोङ घुरि आधिमि फारिसिगेलाइ येसुकोता लोहि कालाउ दोअ्हि, इदोइ थामे लाअ्तेङ भेनेङ थामे हाने, हाइपालिपानु नासेहेङ राजा हेरोद सेअ्लि खाङखे।

लुका 2:1

इङको दिनाता रोमि साम्रात आगसतस दोङ ताइको गोताङ रोमि राइजि भरि झाराङ द्‍याङगेलाइको जनगरना पालि हुकुम पिहि।

लुका 23:24

कालाउ ओबालाइ एसा दोअ्काताङ ह्रिकाइहि कि इङको पुरा पापिलि पिलातस मुन्जुरि पाहि कालाउ फाइसाला बुङ हिङपापिहि।

लुका 3:19

राजा हेरोद ताइको ओनेको बे हेरोदियासहेङ ताइको बे बानाइतेङ ताअ्हि। वाको इन्सिका मारेम्का दुस्ट काम कालाउ सम्बन्ध ताअ्नाङ युहान्‍ना सासक राजा हेरोदहेङ मारफाङ चेरहि।

लुका 9:7

सासक राजा हेरोद इदोइ गोताङ घाटाना थाहा गिहि वा आवाइतुहि, हाइपालिपानु हेथेते द्‍याङगेलाइ दोअ्हि, बप्तिस्ता पिका युहान्‍ना सिकासो सिन्चालतेङ ल्होका हि।

साल्न्हाका चात्या 23:26

“मानेनिय हाकिम फेलिक्सहेङ, का क्लौडियस लुसियसको सेउपाखा!

साल्न्हाका चात्या 24:27

कालाउ न्हे बासार न्हुसो फेलिक्सको थामेता पोर्सिअस फेस्तस हाकिम जेङहि। कालाउ फेलिक्स यहुदिगेलाइहेङ खुसि ताअ्लिको भाअ्सिङ पावलहेङ झ्यालखानाता ताअ्पिहि।

साल्न्हाका चात्या 26:30

कालाउ राजा आग्रिप्पा, हाकिम फेस्तस कालाउ वाको बेजान ओने बर्निकि कालाउ इम्बालाइ दोफा योम्तेङ हिका आरु द्‍याङगेलाइ बुङ ल्होतेङ हानिहि।

साल्न्हाका चात्या 4:27

हाइपालिपानु नाङको परमेस्वरको सेवक, जाइहेङ नाअ् आबिसेक पान्हा ओदोङ येसुको बिरोधता राजा हेरोद कालाउ पन्तियास पिलातस उधिन्हेमि, गैर-यहुदि कालाउ इस्राएलगेलाइ दोफाङ इदोइ दोङ सहरता जोम्का हिघाहि।