लुका 10:2 - Dhimal NT

² कालाउ येसु इम्बालाइहेङ दोअ्हि, “जेसाङ मिलिङगेलाइता हेन्जा बालि हि, एन्साङ दोङ हेन्जा द्‍याङगेलाइ हि जाइ परमेस्वरको बचन हिङलि मन पाखे। कालाउ परमेस्वरको सासनको बारेता दोअ्लि द्‍याङगेलाइ आतुइसा हि। प्रभु सेकाको गिह्रि, वासेहेङ प्रार्थाना पाअ्‌, कालाउ सेका जोम्पालि हेन्जा खेतालागेलाइ दिङगिल प्यावा।”

धिमाल

² “तोल्‍हेलिगोइका बालि ते हेन्‍जाङ हि, कालाउ बालि सान्‍तेका जनगेलाइ आतुइसा खिनिङ हि। एला बालिको मालिकदोफा पुकार पासु वा ताइको बालिता खेतालागेलाइ दिङगिलप्‍याको।

लुका 10:2 Iomraidhean Croise

मत्‍ति 20:1

येसु दोअ्हि, परमेस्वरको सासन इदोइ निङपिका भाइका हि: एह्रिमाङ एमि गिह्रि ताइको आङगुरको बारिता काम पाका खेतालागेलाइहेङ भोलि बाजार भारि ओल्लेहि।

मर्कुस 13:34

का द्‍याङको चान आरोङ ल्वाङका, एनोङ दुरेको दामा तेअ्का द्‍याङको काहानिसो बाताइलि दोअ्खे: एमि द्‍याङ ह्रिङका दामा हानिलिको भाअ्सिङ ताइको साअ् लाअ्पिधिखे। हानिलि खान्तेङ लाम्फा वा चाकारियागेलाइहेङ पालि गोइका काम पिखे। कालाउ वा पालेहेङ दोअ्खे कि वाको घुरिका दिनाता तियार जेङतेङ हिसु।

मर्कुस 16:15

कालाउ येसु इम्बालाइहेङ दोअ्हि, “सुमिङ भरि गोताङ थामेगेलाइता हानेसु कालाउ झाराङ द्‍याङगेलाइहेङ सुसमाचार हिङपासु।

मर्कुस 16:20

जेलाउ चात्यागेलाइ गोताङ थामेता द्‍याङगेलाइको माझाता हानितेङ सुसमाचार पाहि। प्रभु दोङ चात्यागेलाइहेङ साघाइहि कालाउ वाको सन्‍देस सत्ये हिघाहि इङको काथा साबित पालिको भाअ्सिङ, एसापा वाको पाहासो सरबुङसाइका चिन्हागेलाइको काम पाहि। आमेन।

लुका 9:1

कालाउ येसु वाको तेन्हे झना चात्यागेलाइहेङ ए दोफाङ काइहि, वा मासाधेकालाइहेङ एल्पालि कालाउ गोताङ भुत-आत्मा धेल्काहेङ लाअ्पालि सरबुङ कालाउ खाबारा इम्बालाइहेङ पिहि।

साल्न्हाका चात्या 11:19

स्तिफन सेन्हातेङ न्हुसो, हेन्जा खान्धुराइगेलाइ साताइन्हाका कारनहोइ यरुसेलेम सहर लाअ्तेङ हानिहि। कालाउ आउलि गिल्का खान्धुराइगेलाइ आरुगेलाइहेङते माको, कालाउ यहुदिगेलाइहेङ खिनिङ परमेस्वरको बचन प्राचार पाकाताङ फोनिके प्रदेसता, साइप्रस टापु कालाउ सिरिया प्रदेसको एन्तिओक सहर थेकापा हानिहि।

साल्न्हाका चात्या 13:2

इम्बालाइ प्रभुको आराधाना पातेङ हिका कालाउ बारितेङ हिका बेला पबित्तरो आत्मा दोअ्हि, “काङको सेवा पालिको भाअ्सिङ बार्नाबास कालाउ साउलहेङ खेङसु, जेदोङ कामको भाअ्सिङ का इम्बालाइहेङ काइका हिघा।”

साल्न्हाका चात्या 13:4

कालाउ पबित्तरो आत्मासो दिङगिल्कानाङ साउल कालाउ बार्नाबास एन्टिओक सहरसो सिलुकिया सहरता हानेहि कालाउ इन्तासो जाहाजता धोल्तेङ साइप्रस टापुता हानिहि।

साल्न्हाका चात्या 20:28

नेलाइ ताइको कालाउ ताइको गोताङ हुलको भाअ्सिङ चङख हिसु, पबित्तरो आत्मा नेलाइहेङ मन्डलिको आगुवा बानाइकानाङ हि। वा ताइकोङ हितिहोइ चोल्का परमेस्वरको मन्डलिहेङ नेलाइ सामाराइसु।

साल्न्हाका चात्या 22:21

कालाउ प्रभु कासेहेङ दोअ्हि, “हाने, हाइपालिपानु नासेहेङ दुरे-दुरे थेकापा गैर-यहुदिगेलाइकोता दिङगिल्लाङका।”

साल्न्हाका चात्या 8:4

कालाउ आउलिगिल्तेङ हिका खान्धुराइगेलाइ द्‍यापाहाङ हानितेङ प्रभुको बचन द्‍याङगेलाइहेङ हिङपाहि।

1 कोरिन्थि 12:28

ख्रिस्टको इदोइ मन्डलिता परमेस्वर केलाइहेङ खाल-खाल्को कामको भाअ्सिङ नियुक्त पाका हि: एतेङ साल्न्हाका चात्यागेलाइ, न्हेतेङ परमेस्वरको बक्तागेलाइ, सुम्तेङ सिक्स्यकगेलाइ, कालाउ भारबुसाइका काम पाकालाइ, कालाउ एल्पाका बरदान निङकालाइ, कालाउ साघाइकागेलाइ, कालाउ आगुवागेलाइ, कालाउ परिपरिको भासा धुइकालाइहेङ ताअ्का हि।

1 कोरिन्थि 15:10

कालाउ का परमेस्वरको आनुग्रहहोइ छाल्न्हाका चात्या हिघा, कालाउ वाको आनुग्रह काङको जिबनता प्रभाबकारि हिघाहि। भरु का ते छाल्का चात्यागेलाइ खान्तेङ इस्तु परिस्रोम पाघा। कालाउ बुङ का माको, कालाउ परमेस्वरको आनुग्रहहोइ कासेहेङ साघाइहि।

2 कोरिन्थि 6:1

परमेस्वरहेङ साघाइका द्‍याङ हिनाङ केलाइ नेलाइहेङ सेउपानाखे, कि वाको आनुग्रह व्‍यर्थ जेङलि मापि।

फिलिप्पि 2:21

हाइपालिपानु झाराङ ताइकोङ स्वार्थि भोखे कालाउ येसु ख्रिस्टको बारेता महत्य पुर्न हाइ हि इङको वास्ता पाका हासु बुङ मान्थु।

फिलिप्पि 2:25

का इपाफ्रोडाइट्सहेङ नेलाइकोता दिङगिल्लि आवस्यक थानिघा। वा काङको खान्धुराइ ओने, कालाउ का दोफा काम पाका कालाउ सुसमाचारको रक्स्या पाका सिपाइ कालाउ कासेहेङ खाचो परिलाउ साघाइका कालाउ नेलाइको बानाल काङकोता चुमाका द्‍याङ हि।

फिलिप्पि 2:30

हाइपालिपानु वा ख्रिस्टको कामको भाअ्सिङ झान्डाइ सिहि। कालाउ नेलाइ काङको भाअ्सिङ पुरा पालि माअ्दोका सेवा वा पुरा पाहि।

कलस्सि 1:29

ओदोङ भाअ्सिङ का थाङका परिस्रोम पाखा, इङको चाहि ख्रिस्टको पिका का लिता पाका बार्का सरबुङ आन्सार का पाखा।

कलस्सि 4:12

नेलाइको नगरसो लोका येसु ख्रिस्टको दास इपाफ्रास बुङ ताइको आभिबादन पिगिल्का हि। वा लगनसिल जेङतेङ प्रार्थानाता परिस्रोम दोफाङ जेलाउ बुङ नेलाइहेङ फोम पातेङ हिखे। कालाउकि नेलाइ परिपक्क जेङसु कालाउ परमेस्वरको गोताङ इच्साता गोताङ रुपहोइ आग्याकारि हिनाङ निर्धक्क हिलि दोसु।

1 थेस्लोनिकि 2:9

हाइपालिपानु खान्धुराइ ओनेगेलाइ, नेलाइहेङ थाहा दोङ हि केलाइ नेलाइ दोफा हिलाउ केलाइ थाङका मेहेनत पातेङ ताका कामाइन्हाहि कालाउ परमेस्वरको सुसमाचार नेलाइता प्राचार पान्हाहि, कालाउकि केलाइ नेलाइ ह्रुता भार मापरियाको भरु ताइकोङ आवस्यकता पुरा पालि द्वाको।

1 थेस्लोनिकि 5:12

ओइ खान्धुराइ ओनेगेलाइ, केलाइ नेलाइहेङ निबेदन पानाखे, कि प्रभुता नेलाइको आगुवागेलाइहेङ आदार पासु, जाइ नेलाइको भाअ्सिङ परिस्रोम पाखे, कालाउ नेलाइहेङ आत्मिक काथाता आगुवाइ पाखे।

2 थेस्लोनिकि 3:1

खान्धुराइ ओनेगेलाइ, आखिरता केलाइको भाअ्सिङ प्रार्थाना पाअ्पिसु, कालाउ प्रभुको बचन धेमाङ द्‍यापाहाङ फाइलाइयाको कालाउ द्‍याङगेलाइ साम्मान पालि द्वाको जेसाङ नेलाइ बुङ साम्मान पाका हिघासुखेना।

1तिमोथि 4:10

हाइपालिपानु केलाइ ताइको खाङधुरिको भाअ्सिङ थाङका परिस्रोम कालाउ सङघरस पान्हाखे, हाइपालिपानु केलाइको आस सिन्हुका परमेस्वरता ताअ्का हिनाहि, जाइ गोताङ द्‍याङको बिसेस पातेङ वाको ह्रुता खाङधुरि पाकागेलाइको मुक्ति दाता हि।

2 तिमोथि 4:5

कालाउ नाअ् कस्ट भोगिलि गोइलाउ बुङ जेलाउ बुङ ताइमिहेङ नियन्तरन पालि गोइखे, कालाउ सुसमाचार प्राचार पालि थाङका मेहेनत पाअ्‌, कालाउ प्रभु नासेहेङ पिका गोताङ काम पुरा पाअ्‌।

फिलेमोन 1:1

का पावल इदोइ पात्तारा लेखेदोङखा, का झ्याल्खानाता हिघा हाइपालिपानु का येसु ख्रिस्टको बारेता प्राचार पाघा। का कालाउ का दोफाङ काम पाका खान्धुराइ सानाइति तिमोथिसो नाअ् फिलेमोन केलाइको आनाउ सानाइति कालाउ साघाइकाहेङ सेउपाखा।

हिब्रु 3:6

कालाउ येसु ख्रिस्ट चाहि परमेस्वरको साअ्को द्‍याङगेलाइ दोफा चानको रुपता खाङधुरि योग्य हिघाहि, कालाउ जेसापा केलाइ केलाइको आसता साहास ताअ्तेङ हिनाहि पानु, कालाउ केलाइ परमेस्वरको द्‍याङगेलाइ दोङ हिनाहि।

प्रकास 2:1

येसु कासेहेङ एसा बुङ दोअ्हि, एफिसस सहरको मन्डलिको स्वर्गदुतहेङ या सन्‍देस लेखे: का वाआङ हिघा जाइ न्हि लोङ फुरुहेङ काङको दाम्पाहा खुरता ताअ्ताङका कालाउ न्हि लोङ सोनाको चेरादानिगेलाइको माझाता ताअ्खे। जेदोङ का नेलाइहेङ दोअ्खा वासेहेङ हिङसु।