एफिसि 5:2 - Dhimal NT

² बोगेलाइको भाअ्सिङ प्रेममय जिबन बितिपासु, जेसाङ ख्रिस्ट बुङ केलाइहेङ प्रेम पाहि, कालाउ वा केलाइको पापको भाअ्सिङ ताइमिहेङ भोगको रुपता चढाइका हि। कालाउ परमेस्वर खुसि जेङहि, हाइपालिपानु बलिदान वाको भाअ्सिङ ताअ्का मालामालाका बासाना भाइका हिघाहि।

एफिसि 5:2 Iomraidhean Croise

मत्‍ति 20:28

जेसाङ का द्‍याङको चान, बोगेलाइको सेवा पालि इदोइ सुमिङता लोघा। कालाउ का एसापा लोका माको कि बोगेलाइ दोङ काङको सेवा पाको। का हेन्जाङ झनाहेङ काङको पापसो लाअ्पालि दोअ्तेङ ताइको जिउ पिलि लोका हिघा।

युहन्‍ना 13:34

का नेलाइहेङ एनोङ नावा आग्या पिखा, नेलाइ एमिसो भेनेङहेङ प्रेम पासु। जेसाङ का नेलाइहेङ प्रेम पाका हिघा, नेलाइ बुङ एमिसो भेनेङहेङ इन्सिकाङ प्रेम पासु।

युहन्‍ना 6:51

स्वर्गसो खुअ्तेङ लोका जिबन पिका तोले का दोङ हिघा। हासु बुङ इदोइ तोले चानु उङको जेलाउ बुङ बान्च्याङ। कालाउ जेदोङ तोले का सुमिङता जिबनको भाअ्सिङ प्याङका, उङको चाहि काङको जिउ।”

रोमि 15:16

कि का गैर-यहुदिगेलाइको भाअ्सिङ येसु ख्रिस्टको सेवक जेङतेङ परमेस्वरसो लोका सुसमाचार प्राचार पालि पुजारि कोनिङ सेवा पाखा, कालाउकि गैर-यहुदिगेलाइहेङ पबित्तरो आत्मा पाहासो सुद्द जेङतेङ ग्रहन योग्य बलि जेङलि द्वाको।

रोमि 4:25

येसु केलाइको पापगेलाइको भाअ्सिङ सिपिहि, कालाउ परमेस्वर केलाइहेङ वाको दोफा धर्मि बानाइलि येसुहेङ आरोङ सिन्हु पाहि।

रोमि 8:3

हाइपालिपानु केलाइको पापमय स्वभाबको कारनहोइ जेदोङ काम मोसाको व्यवस्था बुङ पालि मादोहि, इङको ताइमिङ परमेस्वर दोङ पाहि। वा ताइको चानहेङ केलाइकोङ पापमय जिउको स्वरुपता भाइकाङ केलाइको पापको भाअ्सिङ भोग भाइपाङ दिङगिल्हि। कालाउ एसापा परमेस्वर ताइको चानको जिउपाहासो पापको सरबुङ नासा पाहि।

रोमि 8:37

कालाउ या गोताङ मारेम्का काथागेलाइ जेङलाउ बुङ, केलाइहेङ प्रेम पाका येसु ख्रिस्ट पाहासो केलाइ इदोइ गोताङ काथागेलाइ ह्रुता बार्का जित निङका हिनाहि।

1 कोरिन्थि 16:14

गोताङ काम प्रेमसो पासु।

1 कोरिन्थि 5:7

जेसाङ यहुदिगेलाइ निस्तार पार्बा मानाइलि लाम्फा ताइको साअ्सो गोताङ साउरि ओल्लेपाखे, एन्साङ पातेङ दोङ नेलाइ बुङ इन्सिका पाप पाका द्‍याङहेङ ताइको मन्डलिसो ओल्लेपालि गोइखे। कालाउ नेलाइ साउरि माह्वाका सेले भाइका जेङस्वाना। हाइपालिपानु येसु ख्रिस्ट केलाइहेङ पापसो लाअ्पालि सिहि, जेसाङ निस्तार पार्बाको बेलाता यहुदिगेलाइ पान्ठा भोग पिखे।

2 कोरिन्थि 2:14

कालाउ परमेस्वरहेङ धन्यबाद ज्याको, हाइपालिपानु केलाइको ख्रिस्ट दोफाको सामान्दा, परमेस्वर जेलाउ बुङ केलाइहेङ ख्रिस्ट दोफाङ थोङखे कालाउ बिजोइ जेङखे, याको माने या हि कि, केलाइ हिसो बुङ हानिन्हाखे, केलाइ सुसमाचार प्राचार पानाखे कालाउकि झाराङ द्‍याङगेलाइ परमेस्वरको बारेता हिनाको कालाउ ग्याको।

2 कोरिन्थि 2:15

हाइपालिपानु केलाइको जिबन परमेस्वर थेकापा थुकाका ख्रिस्टको भाइका मालामालाका हि, कालाउ इदोइ मालामालाका को मुक्ति निङतेङ हिकालाइ कालाउ हान्ति जेङतेङ हिकालाइ पाहासो फरक तरिकासो बुझिखे।

2 कोरिन्थि 8:9

हाइपालिपानु केलाइको प्रभु येसु ख्रिस्टको आनुग्रह नेलाइहेङ थाहा हि, वा धनि हिघाहि, कालाउ बुङ नेलाइको भाअ्सिङ वा गरिब जेङपिहि। कालाउकि वाको गरिबसो नेलाइ धनि जेङलि दोसु।

गलाति 1:4

केलाइको परमेस्वर कालाउ आबाको इच्छा आन्सार येसु ख्रिस्ट केलाइको पापको भाअ्सिङ ताइमिहेङ बलि पिहि, कालाउकि केलाइहेङ इदोइ सुमिङको मारेम्का कामगेलाइसो लाअ्पाको।

गलाति 2:20

या इसिका हि, कि का बुङ येसु ख्रिस्ट दोफाङ क्रुस्टता सिघा, एला उसो का जियाइका माको भरु येसु ख्रिस्ट का लिता जियाइखे। जेदोङ जिबन जिउता एला जियाइखा, इङको परमेस्वरको चान ह्रुता खाङधुरि पातेङ जियाइखा, जाइ कासेहेङ हेन्जा प्रेम पाखे कालाउ काङको भाअ्सिङ ताइको जिबन बुङ आरपन पाहि।

एफिसि 1:4

परमेस्वर सुमिङ सिरजाइका खान्तेङ लाम्फा केलाइको ख्रिस्ट दोफाको सम्बन्धको कारन केलाइहेङ चुनिहि। कालाउकि केलाइ वाको आगाता पबित्तरो कालाउ निस्कलङ जेङलि द्वाको।

एफिसि 3:17

नेलाइ आत्माता बल्लियाका जेङलि गोइखे, कालाउकि नेलाइको खाङधुरिहोइ ख्रिस्ट नेलाइको ह्रदयता ह्याको। का प्रार्थाना पाखा, कि नेलाइको परमेस्वर दोफाको प्रेम कालाउ एमिसो भेनेङ दोफा प्रेमहोइ नेलाइहेङ बल्लियाका बानाइलि द्वाको कालाउ पाप पालिसो बान्चि पाको।

एफिसि 3:19

का प्रार्थाना पाखा, कि नेलाइ ख्रिस्टको प्रेम बुझिलि दोसु, जेदोङ द्‍याङको बुद्दि खान्तेङ बाहार हि। कालाउकि नेलाइ परमेस्वर कोनिङ गोताङ काथाता परिपक्क जेङलि दोसु।

एफिसि 4:15

भरु प्रेमहोइ सत्ये नुइ धुइकाताङ, कालाउ केलाइ ख्रिस्ट भाइपा गोताङ काथाता परिपक्क जेनाइने, जाइ चाहि ताइको जिउ मन्डलिको पुरिङ हि।

एफिसि 4:2

जेलाउ बुङ दुखिता, मोनोइता कालाउ धर्यता एमिसो-भेनेङहेङ प्रेम तिङपासु।

एफिसि 5:15

ओदोङ भाअ्सिङ नेलाइ हेसा जियाइस्वाना इङको बारेता हेन्जाङ ख्याल पासु। मुर्खगेलाइ भाइपा माको भरु बुद्दिमानि भाइपा जिबन जियाइसु।

एफिसि 5:25

ओइ के गेलाइ, ताइको बे हेङ प्रेम पासु, जेसाङ ख्रिस्ट मन्डलिहेङ प्रेम पाखे। कालाउ ख्रिस्ट मन्डलिको भाअ्सिङ ताइको जिबन पिहि।

फिलिप्पि 4:18

का निङलि गोइका खान्तेङ हेन्जाङ निङका हिघा। इपाफ्रोडाइट्सो नेलाइहेङ पिगिल्का काङको भाअ्सिङ नेलाइको उपाहार परमेस्वरहेङ चढाइका ताअ्का बासाना लोका भेति कालाउ भोग भाइका हि। जाइ परमेस्वरहेङ हेन्जा मान्दा ताअ्खे कालाउ ग्रहन योग्य हि।

कलस्सि 3:14

नेलाइ पालि गोइका गोताङ खान्तेङ मुलि काथा चाहि एमिसो भेनेङहेङ प्रेम पासु। एन्सा पानु नेलाइ पुर्न रुपहोइ ए जुट जेङस्वाना।

1 थेस्लोनिकि 4:9

कालाउ खान्धुराइ ओनेगेलाइता प्रेमको बिसोइता नेलाइहेङ केलाइ हिदोइ बुङ काथा लेखेलि आवस्यक मान्थु, हाइपालिपानु एमिसो-भेनेङहेङ प्रेम पासु दोअ्का काथा नेलाइ ताइमिङ परमेस्वरसो धिरका हिसुना।

1तिमोथि 2:6

ख्रिस्ट गोताङ द्‍याङगेलाहेङ पाप कालाउ सिकाको सरबुङसो लाअ्पालि मोल तिरितेङ ताइमिहेङ बलिदान पिहि। कालाउ वाको सिकासो परमेस्वर झाराङ द्‍याङ बान्च्याको दोअ्तेङ ठिक सोमोइता प्रमान पिहि।

1तिमोथि 4:12

इसिका ब्याभार पाअ्‌ कि, हासु बुङ नाअ् धाना हिना दोअ्तेङ हेला मापाको कालाउ नाङको आदार पाअ्को। कालाउ खान्धुराइगेलाइको आगाता बोलिचालि, बानिबेहुरा कालाउ प्रेमता कालाउ ख्रिस्टको खाङधुरिता, कालाउ सुद्दता जिबन जियाइतेङ नाअ् एनोङ नमुना जेङ।

तितस 2:14

केलाइहेङ पापको सरबुङसो बान्चिपालि कालाउ पबित्तरो बानाइलि येसु ख्रिस्ट ताइमिहेङ बलिदान पिहि, कालाउकि केलाइ वाकोङ द्‍याङ जेङलि द्वाको। कालाउ आसल कामगेलाइ पालि द्वाको।

हिब्रु 8:3

गोताङ प्राधान पुजारि पाप स्यामाको भाअ्सिङ भेति कालाउ भोग पिलि नियुक्ति जेङका हिखे, ओदोङ भाअ्सिङ केलाइको प्राधान पुजारि येसु बुङ परमेस्वरहेङ हाइ दोङ पिलि आवस्यक हि।

हिब्रु 9:14

या सोचिसु कि सिका भारि चुम्पुका कामगेलाइसो ख्रिस्टको हितिहोइ केलाइको ह्रदयहेङ ते झन हेथे हेन्जा सुद्द बानाइलि दोखे, कालाउकि केलाइ सिन्हुका परमेस्वरको आराधाना पालि द्वाको, हाइपालिपानु आनान्त आत्माको सरबुङ पाहासो ताइमिहेङ केलाइको पापको भाअ्सिङ एमि सिद्द भोगको रुपता परमेस्वरहेङ चाढाइहि।

हिब्रु 9:23

ओदोङ भाअ्सिङ इङको खोपाराहेङ कालाउ इङकोता हिका गोताङ आमेनेगेलाइहेङ गुपुसको भोगको मुन्धुम आन्सार चोख्याइलि गोइका आवस्यक हिघाहि, कालाउ इदोङ स्वर्गिय आमेनेगेलाइको नक्कल खिनिङ हि, भरु स्वर्गता हिका आमेनेगेलाइ मुन्धुम आन्सार चोख्याइलिको भाअ्सिङ गुपुसगेलाइको हिति खान्तेङ आझाइ झन रेम्का भोगको खाचो हिघाहि।

1पतरुस 4:8

झाराङ खान्तेङ मुलि काथा, एमिसो भेनेङहेङ लिताङसो प्रेम पासु। हाइपालिपानु जेसापा नेलाइ द्‍याङगेलाइहेङ प्रेम पासुन्हा, नेलाइ जेलाउ बुङ इम्बालाइको हिदोइ बुङ पाप पाका काम स्यामा पालि तियार जेङस्वाना।

१ युहन्‍ना 3:16

एसा पासोङ प्रेम हाइ वाला केलाइ थाहा गिनाखे, कि येसु ख्रिस्ट दोङ केलाइको भाअ्सिङ सिपिहि। ओदोङ भाअ्सिङ केलाइ बुङ आरु खान्धुराइगेलाइको भाअ्सिङ सिलि गोइलाउ बुङ तियार हिलि गोइखे।

१ युहन्‍ना 3:23

कालाउ परमेस्वरको आग्या इदोइ दोङ हि, कि केलाइ वाको चान येसु ख्रिस्टता खाङधुरि पालि गोइखे, कालाउ वा केलाइहेङ आग्या पिका बमोजिम केलाइ एमिसो-भेनेङहेङ प्रेम पालि गोइखे।

प्रकास 1:5

कालाउ येसु ख्रिस्टसो, जाइ परमेस्वरको सत्येता खाङधुरि योग्यता देखाल पापियाङ। वा दोङ हि जाइ सिका न्हुसो आरोङ सिन्हु पाहि, कालाउ वा इदोइ सुमिङको गोताङ राजागेलाइको सासक हि। कालाउ येसु ख्रिस्ट केलाइहेङ मायारु पाखे कालाउ वाको हितिहोइ केलाइहेङ केलाइको पापगेलाइसो बान्चिपाखे। वा केलाइहेङ एनोङ जाति बानाइहि जाइ दोफा परमेस्वर ओबालाइको राजाको रुपता हिका हि। कालाउ वा केलाइहेङ वाको आबा परमेस्वरको भाअ्सिङ पुजारिगेलाइ बानाइहि। वा दोङ जेलाउलाउको भाअ्सिङ साम्मान कालाउ खाबारा गोताङ सोमोइ निङलि गोयाङ। आमेन।

प्रकास 5:9

इम्बालाइ एसा दोअ्काताङ एनोङ नावा ले लेहि: “नाअ् मोहोरगेलाइ थुरलि कालाउ किताप खोलेलि योग्य हिना, हाइपालिपानु द्‍याङगेलाइ नासेहेङ सेअ्हि कालाउ नाङको सिकाको हितिहोइ नाअ् परमेस्वरको भाअ्सिङ गोताङ कुल, भासा, रास्ट कालाउ जाति-जातिसो झाराङ द्‍याङगेलाइहेङ चोल्न्हा।