एफिसि 2:16 - Dhimal NT

¹⁶ क्रुसता वाको सिका पाहासो ख्रिस्ट इङको न्हेनोङ समुहहेङ एनोङ दोङ बानाइहि कालाउ परमेस्वर दोफा मिलि पापिहि, कालाउ एसापा यहुदि कालाउ गैर-यहुदिगेलाइको माझाको सतुरुता मेतिन्हाहि।

एफिसि 2:16 Iomraidhean Croise

रोमि 5:10

हाइपालिपानु केलाइ परमेस्वरको सतरु हिलाउ दोङ वाको चानको सिका पाहासो परमेस्वर दोफा केलाइको मिलाप जेङका हिघाहि, ओदोङ भाअ्सिङ केलाइ निसित हिनाहि कि एला केलाइ वाको दोफा मिलिकानाङ, वा दोङ केलाइहेङ बान्चि पावा, हाइपालिपानु ख्रिस्ट सिन्हुका हि।

रोमि 6:6

केलाइ गिनाखे कि, केलाइको पापमय ब्यभार ख्रिस्ट दोफा क्रुस्टा तोइन्हाहि, कालाउकि केलाइको जिउको पापमय स्वाभाब नासाताको, कालाउ एलासो केलाइ ताइमिङ पापको बान्धाइति माजेनाइने।

रोमि 8:3

हाइपालिपानु केलाइको पापमय स्वभाबको कारनहोइ जेदोङ काम मोसाको व्यवस्था बुङ पालि मादोहि, इङको ताइमिङ परमेस्वर दोङ पाहि। वा ताइको चानहेङ केलाइकोङ पापमय जिउको स्वरुपता भाइकाङ केलाइको पापको भाअ्सिङ भोग भाइपाङ दिङगिल्हि। कालाउ एसापा परमेस्वर ताइको चानको जिउपाहासो पापको सरबुङ नासा पाहि।

रोमि 8:7

हाइपालिपानु पापमय स्भाबको आधिनता हिका द्‍याङ चाहि परमेस्वरको सतुरु दोङ हि। हाइपालिपानु वा परमेस्वरको व्यवस्थाहेङ आग्या केम्का मान्थुखे, कालाउ ना ते वा आग्या केम्लि दोङ द्वावा।

1 कोरिन्थि 10:17

हाइपालिपानु एनोङ तोलेहोइ जानाइखे कि, केलाइ हेन्जाङ हिलाउ बुङ ख्रिस्टता एनोङ दोङ जिउ हिनाहि। हाइपालिपानु केलाइ झाराङ एनोङ दोङ तोलेसो चानाखे।

गलाति 2:20

या इसिका हि, कि का बुङ येसु ख्रिस्ट दोफाङ क्रुस्टता सिघा, एला उसो का जियाइका माको भरु येसु ख्रिस्ट का लिता जियाइखे। जेदोङ जिबन जिउता एला जियाइखा, इङको परमेस्वरको चान ह्रुता खाङधुरि पातेङ जियाइखा, जाइ कासेहेङ हेन्जा प्रेम पाखे कालाउ काङको भाअ्सिङ ताइको जिबन बुङ आरपन पाहि।

एफिसि 2:15

वाको सिकासो, वा मोसाको व्यवस्थाता हिका गोताङ आग्यागेलाइ कालाउ नियमगेलाइ मोअ्पाहि। कालाउकि वा यहुदि कालाउ गैर-यहुदिगेलाइको माझाता सान्ति चुमालि द्वाको कालाउ एनोङ नावा समुह बानाइलि द्वाको।

एफिसि 3:6

इङको म्होनाका रहस्य चाहि या हि: कि केलाइको ख्रिस्ट दोफाको सम्बन्धको कारन, गैर-यहुदिगेलाइ जाइ येसु ख्रिस्टता हि, इम्बालाइ बुङ सुसमाचार पाहासो यहुदिगेलाइ भाइपा परमेस्वरको आसिसगेलाइ निनावा। कालाउ गैर-यहुदिगेलाइ बुङ एनोङ दोङ जिउको आङगगेलाइ कालाउ परमेस्वरको पाका प्रतिग्याको भागिदार जेङका हि।

एफिसि 4:4

केलाइ झाराङ खान्धुराइगेलाइ एनोङ दोङ जिउको आङगगेलाइ भाइका हिनाहि, कालाउ केलाइ ओदोङ पबित्तरो आत्मा बुङ निङका हिनाहि, आस बुङ एनोङ दोङ हि, जाइको भाअ्सिङ परमेस्वर नेलाइहेङ ताइको द्‍याङगेलाइ जेङलि काइहि।

कलस्सि 2:14

या इसिका हिघाहि, जेसाङ परमेस्वर केलाइको पापको लेखा कातिपिहि, जेदोङता केलाइको बिरोधता आरोप लेखेका हिघाहि। जेलाउ ख्रिस्टहेङ क्रुस्टा तोइहि कालाउ वा इङको गोताङ लेखा पुराङ रुपहोइ मोअ्पापिहि।

कलस्सि 3:15

जेदोङ सान्ति ख्रिस्ट पिका हि इङको सान्ति नेलाइको ह्रदयता ह्याको। इदोङ सान्तिता हिलिको भाअ्सिङ परमेस्वर नेलाइहेङ एनोङ दोङ जिउ कोनिङ काइहि, कालाउ याको भाअ्सिङ नेलाइ जेलाउ बुङ धन्यबादि जेङसु।