एफिसि 2:10 - Dhimal NT

¹⁰ हाइपालिपानु केलाइ परमेस्वरको सिरजाइन्हाका हिनाहि, कालाउ केलाइ येसु ख्रिस्ट दोफाको सम्बन्ध हिकालाइ नावा द्‍याङको रुपता एल्का काम पालिको भाअ्सिङ सिरजाइन्हाका हि। केलाइ इङको आसल कामगेलाइ पाइने दोअ्तेङ वा लाम्फा दोङ तियार पाका हिघाहि।

एफिसि 2:10 Iomraidhean Croise

मत्‍ति 5:16

नेलाइको फाइसालामका द्‍याङगेलाइको आगाता एसा थाअ्साइताको, कालाउ ओबालाइ नेलाइको रेम्का काम तिनाको, कालाउ स्वर्गता हिका नेलाइको परमेस्वर आबाको महिमा जेनाको।

युहन्‍ना 3:21

कालाउ सत्येता तेअ्का द्‍याङ चाहि थास्साइकाता लोखे कालाउकि परमेस्वरको आग्या केम्तेङ पाका वाको कामगेलाइ द्‍याङगेलाइ खानाको।”

साल्न्हाका चात्या 9:31

एसापा द्‍यापाहाङ यहुदिया जिल्ला, गालिल जिल्ला कालाउ सामारिया जिल्लाको मन्डलिगेलाइता सान्ति लोहि कालाउ मन्डलि बल्लियाका जेङहि। प्रभुहेङ थितेङ कालाउ पबित्तरो आत्माहोइ हाउसाइतेङ हेन्जा द्‍याङगेलाइ येसु ख्रिस्टता खाङधुरि पाहि।

साल्न्हाका चात्या 9:36

जोप्पा नगरता तबिता दोअ्का एमि खान्धुराइ हिघाहि। वा जेलाउ आरुको भाअ्सिङ आसल काम पाघाखे कालाउ गरिबगेलाइहेङ साघाइघाखे।

रोमि 8:1

ओदोङ भाअ्सिङ, एला ख्रिस्ट येसु दोफा हिकालाइहेङ परमेस्वर मादुसिताङ।

रोमि 8:29

हाइपालिपानु जाइ-जाइहेङ परमेस्वर लाम्फासोङ चुनिका हि, वा इम्बालाइहेङ ताइको चान भाइपा जेङलि लाम्फासोङ चुनिहि, कालाउकि वाको चान गोताङ ओनेगेलाइ खान्तेङ जेठा ज्याको।

1 कोरिन्थि 3:9

हाइपालिपानु केलाइ झाराङ काम पाका परमेस्वरको खेतालागेलाइ हिन्हाहि, कालाउ नाअ् कोरिन्थ सहरको खान्धुराइगेलाइ चाहि परमेस्वरको मिलिङ भाइका हिसुन्हा, कालाउ का नेलाइको तुलाना इङको साअ् दोफा पालि द्वाङका जेदोङ साअ् परमेस्वर धाम्लि तोम्का हि।

2 कोरिन्थि 5:17

ओदोङ भाअ्सिङ जेसापा हासुकोङ बुङ ख्रिस्ट दोफा सम्बन्ध हि पानु वाको दोफा नावा स्वभाव हि, खाङसु पुर्ना माअ्तेङ हानिहोइ नावा स्वभाव लोका हि।

2 कोरिन्थि 5:5

एला केलाइहेङ इदोइ नावा जिउ तियार पापिका परमेस्वर दोङ हि, जाइ केलाइहेङ बाइनाको रुपता पबित्तरो आत्मा पिका हि। कालाउकि केलाइहेङ थाहा जेनाको कि केलाइ इङको गोताङ आमेने निनाङ जेदोङ परमेस्वर केलाइहेङ प्याङका दोअ्तेङ प्रतिग्या पाका हि।

2 कोरिन्थि 9:8

परमेस्वर नेलाइहेङ गोइका गोताङ खाल्को आसिस खान्तेङ हेन्जाङ पिलि द्वाङ, कालाउकि नेलाइ दोफा जेलाउ बुङ गोताङ काथा नुगामारि ह्याको, कालाउ गोताङ रेम्का कामको भाअ्सिङ नेलाइ गेनेगेल्पा पिलि दोसु।

गलाति 6:15

हाइपालिपानु ना ते खातानाको हाइ दोङ महत्व पुर्न हि, ना ते खाताना माजेङका कालाउ परमेस्वर पबित्तरो आत्मासो नेलाइहेङ नावा द्‍याङ बानाइका हि इङको चाहि महत्व पुर्न हि।

एफिसि 1:1

परमेस्वरको छाल्न्हाका चात्या जेङलि चुनिका का पावल, येसु ख्रिस्टता खाङधुरि पाका एफिसस सहरता हिका परमेस्वरको पबित्तरो जनगेलाइहेङ इदोइ पात्तारा लेखेदोङखा।

एफिसि 1:4

परमेस्वर सुमिङ सिरजाइका खान्तेङ लाम्फा केलाइको ख्रिस्ट दोफाको सम्बन्धको कारन केलाइहेङ चुनिहि। कालाउकि केलाइ वाको आगाता पबित्तरो कालाउ निस्कलङ जेङलि द्वाको।

एफिसि 2:13

ए सोमोइता नेलाइ परमेस्वरसो दुरे हिघासुखेना, कालाउ एला नेलाइको येसु ख्रिस्ट दोफाको सम्बन्धको कारन ख्रिस्टको हिति पाहासो नेलाइहेङ परमेस्वर ताइको भेरपाङ चुमाका हि।

एफिसि 2:15

वाको सिकासो, वा मोसाको व्यवस्थाता हिका गोताङ आग्यागेलाइ कालाउ नियमगेलाइ मोअ्पाहि। कालाउकि वा यहुदि कालाउ गैर-यहुदिगेलाइको माझाता सान्ति चुमालि द्वाको कालाउ एनोङ नावा समुह बानाइलि द्वाको।

एफिसि 2:2

लाम्फा नेलाइ इदोइ सुमिङको द्‍याङगेलाइ कोनिङ हिगिल्घासुखेना कालाउ नेलाइ सुमिङको सासक साइतानहेङ मानिघासुखेना। कालाउ साइतान एला बुङ परमेस्वरको आग्या माकिलाइको माझाता काम पाखे।

एफिसि 2:6

केलाइको येसु ख्रिस्ट दोफाको सम्बन्धको कारन परमेस्वर केलाइहेङ बुङ सिकासो सिन्चाल पाहि, कालाउ वाको दोफाङ स्वर्गता सासन पालि पिहि।

एफिसि 4:1

प्रभुको सेवा पानाङ का एमि कैदि जेङका हिघा, कालाउ का नेलाइहेङ बिन्ति पाखा, परमेस्वर ताइको सान्तान जेङलि काइका को योग्यता आन्सार ताइको जिबन जियाइसु।

एफिसि 4:24

कालाउ परमेस्वर नेलाइहेङ नावा स्वभाव पिका हि, जेदोङ वाको ताइकोङ स्वभाव भाइका हि। ओदोङ भाअ्सिङ इङको नावा स्वभाव भाइपा जियाइसु कालाउ जातिङकोङ धर्मि कालाउ पबित्तरो जेङसु।

फिलिप्पि 1:6

का इदोइ काथाता पुरा खाङधुरि पाखा, कि परमेस्वर नेलाइकोता जेदोङ आसल काम सुरु पाहि, इङको वासेहेङ दोङ जेलाउ येसु ख्रिस्ट आरोङ ल्वाङ कालाउ पुरा पावा।

फिलिप्पि 2:13

हाइपालिपानु परमेस्वर नेलाइकोता काम पादोङखे, जेदोङ कामहोइ वासेहेङ लेङचापाखे इङको काम पाका इच्छा कालाउ सरबुङ नेलाइहेङ वा दोङ पिखे।

कलस्सि 1:10

केलाइ प्रार्थाना पानाखे, कालाउकि नेलाइ प्रभुहेङ आदार पिका कालाउ हाउसाइपाका जिबन जियाइलि दोसु, कालाउ नेलाइ लागातार आसल कामगेलाइ पासु, आरुको भाअ्सिङ भलाइ पालि दोसु। कालाउकि नेलाइ परमेस्वरहेङ आझाइ रेम्फासो गिलि दोसु।

कलस्सि 3:10

परमेस्वर एला नेलाइहेङ नावा द्‍याङ बानाइका हि, कालाउ वा नेलाइहेङ आझै हेन्जा ताइमिङ कोनिङ बानाइदोङखे। कालाउकि नेलाइ वासेहेङ आझै रेम्फासो बुझिलि दोसु।

2 थेस्लोनिकि 2:17

केलाइ या बुङ प्रार्थाना पाङ, कि इम्बालाइ नेलाइको हृदयहेङ सान्तावाना प्याको, कालाउ गोताङ रेम्का काम कालाउ बचनता नेलाइहेङ बल्लियाका बानाइयाको।

1तिमोथि 2:10

कालाउ रेम्का कामगेलाइ पातेङ ताइमिहेङ सोबाइका बानाइलि, जाइ परमेस्वरको भक्ति पाका बेबालाइहेङ सोबाइखे।

1तिमोथि 5:10

गोताङ वा आसल काम पाका, चान-चामिन्दिगेलाइहेङ रेम्फा पोसेका, बान्सालाइहेङ ताइको साअ्ता सेवा सात्कार पाका, प्रभुको दासगेलाइको सेवा पाका, दुख परिकालाइहेङ साघाइका, कालाउ इसिकाङ ताइको जिबनता आसल काम पाका हिलि गोइखे।

1तिमोथि 5:25

एसापाङ पातेङ जेलाउ हिदोइ बुङ द्‍याङ रेम्का काम पाखे, इङको बो खन्धुराइगेलाइ झालाफालापा तिङखे। कालाउ जेसापा द्‍याङलाइ इङको रेम्का कामगेलाइ तिङलि मादोलाउ बुङ न्हुसो इम्बालाइ इङको कामगेलाइ तिनावा।

1तिमोथि 6:18

कालाउ इम्बालाइहेङ आसल काम पासु दोअ्सु, कालाउ हेन्जा रेम्का कामगेलाइ पाको, कालाउ आवस्यक परिकालाइहेङ खुल्ला मनहोइ साघाइलि तियार जेङसु दोसु।

2 तिमोथि 2:21

एन्साङ पातेङ जेदोङ खान्धुराइ ताइमिहेङ मारेम्का कामगेलाइसो खेङखे, इङको एनोङ जाङका भान्डा भाइका जेनावा जेदोङ बिसेस कामको भाअ्सिङ चालाइखे। कालाउ जाइको जिबन सुद्द जेनावा वाको गिह्रि वासेहेङ आसल कामता लागाइलि द्वावा।

2 तिमोथि 3:17

कालाउकि परमेस्वरको जनगेलाइ गोताङ खाल्को आसल काम पालि तियार कालाउ सक्स्यम जेङलि द्वाको दोअ्तेङ इदोइ धर्मसास्तर पिका हि।

तितस 2:14

केलाइहेङ पापको सरबुङसो बान्चिपालि कालाउ पबित्तरो बानाइलि येसु ख्रिस्ट ताइमिहेङ बलिदान पिहि, कालाउकि केलाइ वाकोङ द्‍याङ जेङलि द्वाको। कालाउ आसल कामगेलाइ पालि द्वाको।

तितस 2:7

नाअ् गोताङ काथाता जेलाउ बुङ आसल काम पाअ्‌ कालाउ आरुको भाअ्सिङ नामुना जेङतेङ तिङपा। जेलाउ नाअ् खान्धुराइगेलाइहेङ धिरपाना रेम्का मनसायहोइ धिरपा। कालाउकि इम्बालाइ नासेहेङ आदार पाको।

तितस 3:1

सासकगेलाइ कालाउ आधिकारिगेलाइको आदार पाअ्‌ कालाउ इम्बालाइको आग्या किलि दोअ्तेङ इन्ताको खान्धुराइगेलाइहेङ फोम पा-पाअ्‌, कालाउ आरुको भाअ्सिङ रेम्का काम पालि दोअ्।

तितस 3:14

इङको खिनिङ माको, कालाउ खान्धुराइगेलाइहेङ रेम्का काम पातेङ हि दोअ्तेङ धिरपा, कालाउकि इम्बालाइ खाचोता परिका द्‍याङगेलाइहेङ साघाइलि द्वाको, कालाउ इदोइ कामसो खान्धुराइगेलाइ जिबनको उदेस्य हाइ दोअ्तेङ गिलि द्वाको।

तितस 3:8

इदोइ भनाइ सत्ये हि, जेदोङ एलाङ खिनिङ का नासेहेङ दोअ्का हिघा, का भोखा कि जेलाउ नाअ् खान्धुराइगेलाइहेङ धिरपाखेना इदोइ काथागेलाइता जोर पिसु, कालाउकि जाइ परमेस्वरता खाङधुरि ताअ्का हि ताइमिहेङ रेम्का काम पालि मन लागाइलि द्वाको। हाइपालिपानु इदोइ सिक्स्यागेलाइ गोताङ द्‍याङगेलाइको भाअ्सिङ रेम्का कालाउ फाइदा जनक बुङ हि।

हिब्रु 10:24

केलाइ ता-ताइमिता एमिसो-भेनेङहेङ प्रेम कालाउ भलाइ पाका कामता एमिसो-भेनेङहेङ हाउसाइ पाइने।

1पतरुस 2:12

परमेस्वरता खाङधुरि मापाका द्‍याङगेलाइ नेलाइको द्‍यापाहाङ हिखे कालाउ नेलाइ गलत पातेङ हिसुना दोअ्लि द्वावा। इसिका रेम्का जिबन बितिपासु कि इम्बालाइ नेलाइहेङ पाका आसल कामगेलाइ तिनावा कालाउ ख्रिस्ट घुरितेङ लोका दिना परमेस्वरहेङ महिमा प्यावा।

१ युहन्‍ना 1:7

कालाउ जेसाङ परमेस्वर ताइको पबित्तरोता आन्सार जेलाउ बुङ आसाल काम पाखे। एन्साङ जेलाउ केलाइ परमेस्वरको फाइसालामकाहोइ तिङपाका आसल काम पाखे कालाउ केलाइको सङगति एमिसो-भेनेङ दोफा हिखे, कालाउ वाको चान येसुको हितिहोइ केलाइ झाराङहेङ पापसो सुद्द पाखे।

१ युहन्‍ना 2:6

परमेस्वर दोफा ए हिनाहि दोअ्का द्‍याङ ताइमिङ बुङ येसुको भाइपा जिबन जियाइलि गोइखे।