2 तिमोथि 4:8 - Dhimal NT

⁸ एला प्रभु कासेहेङ एनोङ इनाम प्याङ, जेदोङ चाहि काङको आसल पाका कामको इनाम हि। ठिकसो न्याय पाका प्रभु दोङ कासेहेङ इङको इनाम प्याङ जेलाउ वा आरोङ ल्वाङ। कालाउ का खिनिङ माको, कालाउ वाको लोका दामा खाङका झाराङहेङ इङको इनाम प्याङ।

धिमाल

⁸ एला ते परमेस्‍वरको आगा उचित ठार्‍हाइन्‍हाका ताज खिनिङ निङलि दाइका हि। उचित निया पाका प्रभु दोङ कासेहेङ वा लोका दिना इङको सिरपेच बिङपाप्‍यावा। कासेहेङ खिनिङ माको, वाको दामा खाङका झोको झाराङहेङ दोङ इङको बिङपाप्‍यावा।

2 तिमोथि 4:8 Iomraidhean Croise

मत्‍ति 24:36

इङको काथागेलाइ हिदोइ सोमोइ कालाउ हिदोइ दिना जेनाङ या हासुहेङ बुङ थाहा मान्थु, ना ते स्वर्गदुतगेलाइहेङ का चानहेङ बुङ थाहा मान्थु, आबाहेङ खिनिङ इङको दिना कालाउ सोमोइ थाहा हि।

मत्‍ति 7:22

न्यायको दिनाता हेन्जा द्‍याङगेलाइ कासेहेङ द्वावा, प्रभु-प्रभु, हाइ केलाइ नाङकोङ मिङता आगमबानि मादोअ्न्हाहि रो? कालाउ नाङकोङ मिङता केलाइ इङको भुत-आत्मागेलाइ माओल्लापानाहि रो? कालाउ नाङकोङ मिङता इस्तुङ भारबुसाइका कामगेलाइ मापानाहि रो?

लुका 10:12

का नेलाइहेङ दोअ्खा, न्यायको दिना इङको सहरता द्‍याङगेलाइको बेथा सोदोम सहरको द्‍याङगेलाइको खान्तेङ झन सहिलि मादोअ्का जेनावा।

रोमि 2:5

कालाउ नेलाइ ताइको ह्रदयहोइ थाङ पातेङ पाप पालि लाअ्तेङ परमेस्वर भारि घुरिलि माभोसुन्हा। ओदोङ भाअ्सिङ जेलाउ परमेस्वर द्‍याङगेलाइको न्याय पाङ, कालाउ वा ताइको चेरचुङ तिङपातेङ नेलाइहेङ आझाइ थाङका दन्ड प्याङ।

रोमि 8:23

इदोङ सिरजाइकाहोइ खिनिङ माको, कालाउ केलाइ जाइ दोफा पबित्तरो आत्मा भबिस्यता निङका महिमाको लाङ झलकको रुपता हि। कालाउ इङको दिनाको भाअ्सिङ एला लेङचातेङ ह्रुम्तेङ हिनाहि, जेलाउ परमेस्वर केलाइहेङ धर्म जामालाइको रुपता गोताङ खाबारा प्याङ, माकुनु केलाइहेङ नावा जिउ पितेङ पुर्ना जिउहेङ मुक्त पाप्याङ।

1 कोरिन्थि 2:9

जेसाङ धर्मसास्तरता लेखेका हि, “हिदोइ बुङ द्‍याङ हेलाउ बुङ मातिङका, कालाउ हासु बुङ माहिङका, हासु बुङ मासोचेका काथा दोङ परमेस्वर ताइमिहेङ प्रेम पाकालाइको भाअ्सिङ तियार पाका हि।”

1 कोरिन्थि 3:13

गोताङ द्‍याङको रेम्का मारेम्का काम परमेस्वर न्याय पाका दिनाता जाचिन्हाङ, हाइपालिपानु इङको दिना इम्बालाइको पाका काम हिसिका हि, मेता ह्वातेङ जाचियाङ।

1 कोरिन्थि 9:25

धाअ्काता भाग ह्रुलि गोइका खेलाडिगेलाइ जिउहेङ काबुता पालि आभ्यास पाखे। इम्बालाइते जितिलि कालाउ साम्मान निङलि एन्सा पाखे, इम्बालाइते चुतेङ हानिका ल्हाफाको माला निङखे जेदोङ हेन्जा सोमोइ थेकापा माहिखे। कालाउ केलाइ चाहि साम्मान कालाउ जेलाउ बुङ हिका आसिसको भाअ्सिङ इसिका पानाखे।

2 कोरिन्थि 5:2

जातिङकोङ केलाइ इदोइ जिउता हिलि गोइलाउ दुखि हिनाहि, कालाउ केलाइको स्वर्गिय साअ् कोनिङ जिउ निङलि ओसारापाङ इच्छा पानाखे।

फिलिप्पि 3:11

कालाउकि का बुङ सिकालाइसो आरोङ सिन्चाल्लि द्वाको।

कलस्सि 1:5

नेलाइ इङको पासुखेना हाइपालिपानु नेलाइको आस स्वर्गता ताअ्का काथाता हि। जेदोङको येसु ख्रिस्टको सत्ये सन्देसको बिसोइता नेलाइ लाम्फाङ सुसमाचार हिङका हिसुना।

1 थेस्लोनिकि 1:10

कालाउ इम्बालाइ दोअ्खे नेलाइ हेसा वाको चान स्वर्गसो आरोङ ल्वाङ दोअ्तेङ नेलाइ दामा खाङतेङ हिसुना, जाइहेङ परमेस्वर सिकासो आरोङ सिन्हु पाका हि, येसु जाइ केलाइहेङ परमेस्वरसो लोलि तोम्का चेरचुङसो बान्चि पावा।

1 थेस्लोनिकि 5:4

कालाउ खान्धुराइ ओनेगेलाइ, नेलाइ इदोइ दुस्ट सुमिङको माको, ओदोङ भाअ्सिङ प्रभु लोका दिना नेलाइकोता चोर लोका भाइपा आचानाक ल्वाङ।

2 थेस्लोनिकि 2:8

कालाउ न्हुसो इङको दुस्ट द्‍याङ देखाल जेनावा। कालाउ आरोङ न्हुसो जेलाउ प्रभु येसु ल्वाङ, वा इङको दुस्ट द्‍याङहेङ ताइको नुइसो ओल्लेका आदेसहोइ कालाउ वाको लोलि तोम्का महिमाहोइ इङकोहेङ सेअ्तावा।

1तिमोथि 6:19

एसा पातेङ इम्बालाइ स्वर्गता ताइको भबिस्यको भाअ्सिङ रेम्का कामगेलाइ खाजाना भाइपा जोम्पावा, जेदोङ इम्बालाइको भाअ्सिङ भबिस्यता बल्लियाका जोग भाइका जेनावा, कालाउकि इम्बालाइ पाक्का ह्याको इम्बालाइ जेलाउ बुङ सत्ये जिबन निनावा।

2 तिमोथि 1:10

कालाउ एला परमेस्वर ताइको चान येसु ख्रिस्टहेङ दिङगिल्तेङ ताइको आनुग्रह तिङपाका हि। वा दोङ सिका सरबुङहेङ नासा पाहि कालाउ केलाइहेङ सुसमाचार पाहासो आनान्त जिबनको दामा तिङपाहि।

2 तिमोथि 1:12

ओदोङ सुसमाचार प्राचार पालिको भाअ्सिङ का झ्यालखानाता कस्ट भोगिलि गोइतेङ हिघा। कालाउ बुङ का मालेदेरखा, हाइपालिपानु का ख्रिस्टहेङ नाल्खा जाइ ह्रुता का भोरोसा बुङ ताअ्का हिघा। कालाउ कासेहेङ इदोइ निसित हि, कि परमेस्वर कासेहेङ जिम्मा पिका काथाहेङ ख्रिस्ट ताइमिङ आरोङ घुरितेङ मालोपा धाउ इङको काथा जोगाइतेङ ताअ्ताङ।

2 तिमोथि 1:18

प्रभु आन्सिफोरसहेङ न्याको दिनाता माहान क्रिपा तिङपाको। नासेहेङ रेम्फा थाहा हि, कि एफिसस सहरता वा कासेहेङ हेन्जाङ प्रकारसो साघाइका हिघाहि।

2 तिमोथि 2:5

एन्साङ दोङ हिदोइ बुङ खेलाडि खेलता भाग ह्रुखे पानु, वा खेलको नियम आन्सार माघापा धाउ इनाम निङलि मादोखे।

2 तिमोथि 4:1

जेलाउ येसु ख्रिस्ट राजा भाइपाङ सासन पालि ल्वाङ, कालाउ वा सिन्हुका कालाउ सिकालाइको न्याय पावा। ओदोङ भाअ्सिङ परमेस्वर कालाउ ख्रिस्टको साक्सिको रुपता का नासेहेङ थाङका आदेस प्याङका।

तितस 2:13

कालाउ केलाइ आस पाका दिनाको दामा खाङतेङ हिनाखे: जेदोङ दिना येसु ख्रिस्ट, जाइ केलाइको माहान परमेस्वर मुक्ति दाता हि, वा ताइको गोताङ महिमा दोफाङ इदोइ प्रिथिबिता ल्वाङ।

हिब्रु 12:11

कालाउ केलाइहेङ आनुसासनता ताअ्का मन मापरिखे, भरु दुख पिका भाइका लागिखे, कालाउ ओदोङ कस्टगेलाइसो धिरलि दोतेङ न्हुसो इम्बालाइ सान्ति कालाउ धार्मिकता दोअ्का फल निनावा।

हिब्रु 9:28

एसा पासोङ हेन्जा द्‍याङगेलाइको पाप ल्होपातेङ चुम्पुलिको भाअ्सिङ ख्रिस्ट ताइमिहेङ एखे भोग पिहि, कालाउ वा आरोङ ल्वाङ, इङको बेला ताइमिहेङ पापको भोगको भाअ्सिङ माको, भरु वाको लोका दामा खाङतेङ हिकालाइहेङ बान्चिपालिको भाअ्सिङ ल्वाङ।

याकुब 1:12

उङको द्‍याङ धन्यको हि, जाइ जाचता स्थिर हिखे, हाइपालिपानु ताइको खाङधुरि प्रमानित पालि दोतेङ वा आनान्त जिबनको इनाम निनावा, जाइ परमेस्वर वासेहेङ प्रेम पाका झाराङहेङ पिका प्रतिग्या पाका हि।

1पतरुस 1:4

परमेस्वर ताइको द्‍याङगेलाइको भाअ्सिङ ताअ्का नुगामारि आसिस निङका आस पानाखे। वा इम्बालाइको भाअ्सिङ इङको आसिस स्वर्गता ताअ्खे, जेता इङको आसिस नासालि माकुनु बिगिरलि माकुनु राम्लि माद्वाङ।

1पतरुस 5:4

जेलाउ येसु ख्रिस्ट धुरितेङ ल्वाङ, जाइ केलाइको मुख्य लाखुरिया हिका हि, कालाउ नेलाइहेङ एनोङ कोइनाका मुकुट प्याङ। जाइको चिल्काका हेलाउ बुङ कम माजेनाङ।

प्रकास 1:7

हिङसु, वा बादेलगेलाइ दोफा लोदोङखे, कालाउ झाराङ वासेहेङ तिनावा। ओबालाइ बुङ जाइ वासेहेङ भालाहोइ बाहि कालाउ वासेहेङ सेअ्हि। कालाउ प्रिथिबिता हिका गोताङ द्‍याङगेलाइ जेलाउ वासेहेङ तिनावा, इम्बालाइ जिउधाइ लोपाङ खारावा कालाउ तुम्ता थेकावा। एसाङ जेनाको। आमेन।

प्रकास 19:11

आरोङ का स्वर्गहेङ हेअ्नाका तिङघा, इन्ता काङको आगाता एनोङ जे:का ओह्याँ हिघाहि। जाइ वाको ह्रुता दोल्हि, वा इसिका हि वासेहेङ खाङधुरि पालि द्वास्वाना कालाउ वा माधाताइखे। कालाउ वा धार्मिक दोफाङ वा ताइको सतुरुगेलाइको न्याय पाखे कालाउ इम्बालाइको बिरोधता फेसुखे।

प्रकास 2:10

नाअ् भोगिलि तोम्का कस्टसो माअ्थि। साइतान नेलाइ मध्ये हेथेहेङ द्‍याङगेलाइसो रिम्पाखे कालाउ नेलाइहेङ जाचिलिको भाअ्सिङ झ्यालखानाता पिगिल्खे। नाअ् ते दिनाको भाअ्सिङ बार्का समस्याको आनुभब पान्हा। कालाउ नेलाइहेङ सेअ्लाउ बुङ नेलाइ हेलाउ बुङ हारेस माचासु काङकोता खाङधुरि पासु, हाइपालिपानु का नेलाइहेङ आनान्त जिबन प्याङका, इङको चाहि नाङको जिति का को इनाम जेनाङ।

प्रकास 22:20

इदोइ कितापता लेखेका काथागेलाइको साक्सि येसु दोङ हि। वा दोअ्हि, “निस्चय, का धेमाङ लोदोङखा।” का, युहान्‍ना वासेहेङ जोबाफ पिघा, “आमेन! प्रभु येसु लौउ।”

प्रकास 4:4

इङको सिङहासनको कोरपाहाङ ए कुरि द्‍या आरु सिङहासनगेलाइ हिघाहि। कालाउ पुरिङता सोनाको मुकुटगेलाइ कालाउ जे:का धाबागेलाइ लागाइतेङ ए कुरि द्‍यामि आगुवागेलाइ इङको सिङहासनगेलाइता योमतेङ हिका का तिङघा।