2 तिमोथि 2:15 - Dhimal NT

¹⁵ ताइमिहेङ लेदेरपालि मागोइका कालाउ सत्येको सन्देसहेङ ठिक तरिकासो धिरपालि दोका काम पाकालाइ भाइपाङ नाअ् बुङ थाङका परिस्रोम पालि गोइखे कालाउकि परमेस्वर नासेहेङ पुर्न रुपता सुइकार पाको।

धिमाल

¹⁵ लेदेरलि मागोइका रो सतको बानालहेङ उचितसो चालाइका चाकरभाइपाङ परमेस्‍वरहेङ मोन्‍दाताका पातेङ वाको आगाता वाकोङ काथा धुइलि त्‍यार हितेङहिलि चेस्‍ता पा।

2 तिमोथि 2:15 Iomraidhean Croise

मत्‍ति 13:52

येसु आरोङ इम्बालाइहेङ दोअ्हि, ओदोङ भाअ्सिङ परमेस्वरको व्यवस्था धिरपाका द्‍याङ कालाउ काङको चात्यागेलाइ बुङ परमेस्वरको सासनता एमि साअ्को गिह्रि भाइका हिखे, जाइ ताइको भाकारसो मुल्यवान आनेमानेगेलाइ नावा कालाउ पुरना बाहार ओल्लेपाखे।

मर्कुस 4:33

कालाउ येसु ओबालाइ ग्याको दोअ्तेङ इदोइ खाल-खाल्को थुपरोङ निङपितेङ बचन हिङपाहि।

लुका 12:42

कालाउ प्रभु दोअ्हि, एनोङ इमान्दार कालाउ बुद्दिमान चाकारिया इसिका हिखे: जाइहेङ साअ्को गिह्रि आरु चाकारियागेलाइहेङ खाङलि नियुक्त पाखे। गिह्रि वासेहेङ दोअ्खे ओबालाइहेङ ठिक-ठिक सोमोइता चालि-आम्लि प्यावाको। कालाउ न्हुसो ह्रिङका दामा चाहि।

साल्न्हाका चात्या 2:22

ओइ इस्राएलको द्‍याङगेलाइ, इदोइ काथा हिङपिसु, जेलाउ नासरत देराको येसु नेलाइ दोफा हिघाहि, परमेस्वर नेलाइहेङ येसु वाकोसो दोङ दिङगिल्का हि दोअ्तेङ प्रमानित पाहि, जाइसो परमेस्वर सरबुङसाइका कामगेलाइ, कालाउ भारभुसाइका कामगेलाइ पाहि। नेलाइहेङ थाहा दोङ हि, कि इदोइ सत्ये हि।

साल्न्हाका चात्या 20:27

हाइपालिपानु का दोङ नेलाइहेङ गोताङ काथागेलाइ दोअ्का हिघा जेदोङ परमेस्वर चाहिखे, कि नेलाइ गिसु। का नेलाइसो हाइ दोङ काथा म्होका मान्थुघा।

रोमि 14:18

जाइ इदोइ खाल्होइ येसु ख्रिस्टको सेवा पाखे वा दोफा परमेस्वर खुसि हिखे कालाउ द्‍याङगेलाइ वाको बारेता बाखिनखे।

रोमि 16:10

आपेल्लेसहेङ सेउपाखा दोअ्पिसु जाइको खाङधुरि ख्रिस्टता जाच न्हुसो बुङ लागातार हि। आरिस्तोबुलोस कालाउ वाको जाहानगेलाइहेङ बुङ सेउपाखा दोअ्पिसु।

रोमि 6:13

नाङको जिउको आङगगेलाइहेङ दुस्ट कामगेलाइ पालि आर्पन मापासु। भरु सिकासो जिबनता चुमाका द्‍याङगेलाइ भाइपा ताइको जिबन परमेस्वरता सुम्पिसु। कालाउ नाङको आङगगेलाइहेङ ठिक काम पालिको भाअ्सिङ परमेस्वरहेङ सुम्पिसु।

1 कोरिन्थि 2:6

कालाउ बुङ परिपक्का खान्धुराइगेलाइको माझाता केलाइ बुद्दिको काथा पानाखे, कालाउ सुमिङको द्‍याङगेलाइको बुद्दि माको, ना ते इदोइ सुमिङको सासकगेलाइको बुद्दि भाइपा, जेदोङ नासातेङ हानावा।

2 कोरिन्थि 10:18

हाइपालिपानु ताइको बाखिन ताइमिङ पाका द्‍याङ सुइकार माजेनाङ, भरु परमेस्वर दोङ बाखिन पाका द्‍याङहेङ सुइकार पाङ।

2 कोरिन्थि 3:6

नावा कारारको सेवकगेलाइ जेङलि वा केलाइहेङ खुबि पिहि, इदोइ चाहि पबित्तरो आत्माको कारार हि, व्यवस्थाहोइ तेअ्पाका कारार माको, हाइपालिपानु मोसा लेखेका व्यवस्था माकिलिको परिनाम सिलि दोङ, भरु पबित्तरो आत्माते आनान्त जिबन पिखे।

2 कोरिन्थि 4:2

केलाइ लेदेर लुका कालाउ सिका-सिकापा म्होतेङ कामगेलाइ मापानाखे, केलाइ धाताइका माकुनु परमेस्वरको बचनहेङ सारफेर पाका काम बुङ मापानाखे। भरु केलाइ परमेस्वरको आगाता सत्ये खिनिङ धिरपानाखे कालाउ गोताङ द्‍याङगेलाइ परमेस्वरको साक्सि पितेङ हि कि या सत्ये हि।

2 कोरिन्थि 5:9

ओदोङ भाअ्सिङ चाहे केलाइ वाको दोफा स्वर्गता ह्याइने, चाहे इदोइ प्रिथिबिता ह्याइने वासेहेङ लेङचापालि दोङ केलाइको लक्स्य हिखे।

गलाति 1:10

आबस्य बुङ का द्‍याङगेलाइहेङ खुसि पालि माभोखा, भरु का परमेस्वरहेङ खिनिङ खुसि पालि भोखा। जेसापा आझाइ बुङ द्‍याङगेलाइहेङ खुसि पालि कोसिस पाकानु का येसु ख्रिस्टको सेवक माजेङधाङघा।

एफिसि 1:13

नेलाइ दोफा बुङ इन्सिकाङ जेङहि। नेलाइ बुङ सत्ये सन्‍देस हिङसुन्हा, जेदोङ चाहि परमेस्वर नेलाइहेङ मुक्ति पिका बारेता सुसमाचार हि। जेलाउ नेलाइ ख्रिस्टता खाङधुरि पास्वाना, परमेस्वर नेलाइहेङ काङको दोङ दोअ्तेङ तिङपालि वा प्रतिग्या पाका पबित्तरो आत्मा प्याङ।

1 थेस्लोनिकि 2:4

कालाउ परमेस्वर केलाइहेङ योग्य थानितेङ सुसमाचार हिङपालि जिम्मा पिहि, ओदोङ भाअ्सिङ केलाइ द्‍याङगेलाइहेङ लेङचापालि माको, भरु केलाइको ह्रदय जाचिका परमेस्वरहेङ लेङचापालि केलाइ उपदेस पिनाखे।

1 थेस्लोनिकि 5:14

कालाउ खान्धुराइ ओनेगेलाइ, केलाइ नेलाइहेङ आर्ति पिनाखे, कि कुरियागेलाइहेङ चेताउनि पिसु, थिकालाइहेङ हाउसाइ पिसु, हुइका हिकालाइहेङ मद्दत पासु, कालाउ झाराङ दोफा धैर्य जेङतेङ तिङपासु।

1तिमोथि 4:6

जेसापा नाअ् का एलाङ दोअ्का काथागेलाइ खान्धुराइ ओनेगेलाइहेङ धिरपान्हा पानु, नाअ् येसु ख्रिस्टको खाङधुरि योग्य सेवक जेनाना, जेदोङ खाङधुरिको सन्देसता बल्लियाका जेङका हिखे कालाउ आसल सिक्स्याहेङ पिताइकाताङ लोका हिखे।

हिब्रु 4:11

ओदोङ भाअ्सिङ केलाइ झाराङ इङको माइसा चाका थामेता दुल्लि कोसिस पाइने, कालाउ हासु बुङ परमेस्वरको आग्या केम्लि इन्कार पाका द्‍याङगेलाइहेङ नामुना मा-मान्याको। कालाउ खिनिङ केलाइ इङको माइसा चाका थामेता दुल्लि द्वाङ।

याकुब 1:12

उङको द्‍याङ धन्यको हि, जाइ जाचता स्थिर हिखे, हाइपालिपानु ताइको खाङधुरि प्रमानित पालि दोतेङ वा आनान्त जिबनको इनाम निनावा, जाइ परमेस्वर वासेहेङ प्रेम पाका झाराङहेङ पिका प्रतिग्या पाका हि।

याकुब 1:18

वा ताइकोङ इच्छासो सत्येको बचनसो केलाइहेङ नावा जिबन पिहि, कालाउकि केलाइ वा दोङ सिरजाइका सेकाको लाङ फल भाइपा जेङलि द्वाइने।

२ पत्‍रुस 1:10

ओदोङ भाअ्सिङ खान्धुराइ ओनेगेलाइ, ताइमिहेङ कालाउ बो द्‍याङगेलाइहेङ इदोइ तिङपालि आझाइ आसल ब्यभार पालि कोसिस पासु कि परमेस्वर नेलाइहेङ ताइको द्‍याङ जेङलि साल्का कालाउ काइलि थानिका हि। जेसापा नेलाइ इन्सिका पासुखेना पानु नेलाइ पाक्का दोङ परमेस्वरसो हेलाउ बुङ माखेङन्हा स्वाना।

२ पत्‍रुस 1:15

ओदोङ भाअसिङ का नेलाइहेङ इदोइ काथागेलाइ एला लेखेतेङ थाङका मेहेनत पादोङखा, कालाउकि का सितेङ नेलाइ इदोइ काथागेलाइ जेलाउ बुङ फोम पालि दोसु।

२ पत्‍रुस 3:14

ओदोङ भाअ्सिङ आनाउगेलाइ, नेलाइ इदोङ काथागेलाइ जेङका आस पाकाताङ पाका कारन परमेस्वरहेङ लेङचापालि, पबित्तरो कालाउ मादुसिका जिबन जियाइसु कालाउ एमिसो-भेनेङ दोफा सान्तिसो हिसु।