2 थेस्लोनिकि 2:9 - Dhimal NT

⁹ इङको दुस्ट द्‍याङ साइतानको सरबुङ दोफा ल्वाङ, कालाउ वा गोताङ खाल्को धाताइका चिन्हा, चामात्कार कालाउ भारभुसाइका कामगेलाइ पावा, कालाउ इदोइ गोताङ कामगेलाइ परमेस्वर पातेङ हि दोअ्तेङ द्‍याङगेलाइ सोचियावा।

धिमाल

⁹ इङको नियम मासाअ्‌का दियाबलसको सरबङदोफा ल्‍वावा रो इङको गोताङ खाल्‍को असत चिनो रो भारभुसाइका कामगेलाइ पावा।

2 थेस्लोनिकि 2:9 Iomraidhean Croise

मत्‍ति 12:22

भुत-आत्मा धेल्का एमि कान्हाँ कालाउ लाता द्‍याङहेङ येसुकोता चुमाहि। येसु वासेहेङ एल्पाहि, उङको नुइ धुइलि कालाउ तिङलि तेङहि।

मत्‍ति 24:24

हाइपालिपानु धाताइका ख्रिस्टगेलाइ कालाउ धाताइका बक्तागेलाइ ल्वावा, बारका चिन्हागेलाइ कालाउ भारभुसाइका कामगेलाइ परमेस्वरको साल्का द्‍याङगेलाइहेङ धोका पिलिको भाअ्सिङ पावा।

मत्‍ति 4:10

जेलाउ येसु साइतानहेङ दोअ्हि, “साइतान, इतासो हाने! हाइपालिपानु धर्मसास्तरता इसिका लेखेका हि।” नाअ् दोङ परमप्रभु ताइको परमेस्वरहेङ खिनिङ तुघुरतेङ आराधाना पालि कालाउ वाको खिनिङ सेवा पालि।

मर्कुस 13:22

हाइपालिपानु धातुवा ख्रिस्टगेलाइ कालाउ धातुवा बक्तागेलाइ ल्वावा, चिन्हागेलाइ कालाउ भारभुसाइका कामगेलाइ परमेस्वरको छाल्का द्‍याङगेलाइहेङ धोका पिलिको भाअ्सिङ पावा।

लुका 11:25

जेलाउ वा इन्सिका थामे हिसो बुङ मानिङलाउ लाम्फाको हिका द्‍याङकोता हानाङका दोअ्तेङ वा घुरिखे। इन्ता लोलाउ उङको द्‍याङको जिबन एनोङ साफा साअ् भाइका निङखे।

युहन्‍ना 4:48

येसु उङकोहेङ दोअ्हि, “नेलाइ चिन्हा कालाउ आचाम्माको कामगेलाइ मातिम्पाभरि नेलाइ हेलाउ बुङ खाङधुरि मापास्वाना।”

युहन्‍ना 8:41

नेलाइको आबा जेदोङ पाहि नेलाइ ओदोङ काम पासुखेना।” इम्बालाइ येसुहेङ दोअ्हि, “केलाइ कासिबिरिसो जोलोम जेङका माको! केलाइको आबा एमि खिनिङ कालाउ वा परमेस्वर हि।”

युहन्‍ना 8:44

नेलाइ ताइको आबा साइतानसो हिसुना, कालाउ नेलाइ ताइको आबाको इच्छा पुरा पालि खाङसुखेना। इङकोते लाम्फासोङ ज्यान मारा हिघाहि, कालाउ वा हेलाउ बुङ सत्येबादि मान्थुघाहि। हाइपालिपानु वाकोता सत्ये मान्थुघाहि। ताइको स्वभाव आन्सार धाताइखे, हाइपालिपानु इङको धातुवा दोङ हि, हाइपालिपानु वाते धातुवाको आबा दोङ हि।

साल्न्हाका चात्या 13:10

“नाअ् साइतानको चान, सारा धार्मिकताको सतरु गोताङ छलि कालाउ दुस्टहोइ पोङघाका! हाइ नाअ् प्रभुको सिधाका दामाहेङ केउपालि मालाताना?

2 कोरिन्थि 11:14

कालाउ इङको हिदोइ बुङ भारभुसाइका काथा माको, हाइपालिपानु साइतान बुङ महिमित स्वर्गदुतको भेस भाङगाइतेङ धोका पिखे।

2 कोरिन्थि 11:3

कालाउ जेसाङ साइतान पुय्याँको रुपता ताइको चातुराइको काथासो लाङ बेबाल हब्बाहेङ धाताइहि, एन्साङ दोङ ख्रिस्ट दोफा नेलाइको धाताइका मान्थुका कालाउ ख्रिस्टको सेवासो नेलाइको बिचारगेलाइ आवाइ तुगिल्स्वाना कि दोअ्तेङ का थितेङ हिघा।

2 कोरिन्थि 4:4

कालाउ इदोइ सुमिङको दिर साइतान उङको खाङधुरि मापाकालाइको बिद्दिहेङ कान्हाँ बानाइ पिका हि, ओदोङ भाअ्सिङ इम्बालाइ ख्रिस्टको बारेता सुसमाचार कालाउ वाको महिमाको बारेता बुझिलि मादोखे, हाइपालिपानु ख्रिस्ट परमेस्वरको स्वरुप हि।

एफिसि 2:2

लाम्फा नेलाइ इदोइ सुमिङको द्‍याङगेलाइ कोनिङ हिगिल्घासुखेना कालाउ नेलाइ सुमिङको सासक साइतानहेङ मानिघासुखेना। कालाउ साइतान एला बुङ परमेस्वरको आग्या माकिलाइको माझाता काम पाखे।

2 तिमोथि 3:8

इदोइ धाताइका सिक्स्यकगेलाइ ख्रिस्टको सत्ये सन्देसहेङ घोसाना पालिसो रोकिलि कोसिस पाखे, जेसाङ यान्नेस कालाउ याम्ब्रेस मोसाको बिरोध पाका हिघाहि। इदोइ द्‍याङगेलाइको बुद्दि बिगिरका हि इङको द्‍याङगेलाइ ख्रिस्टको खाङधुरिता आसफल जेङका हि।

याकुब 3:15

या बुद्दि परमेस्वरसो लोका बुद्दि माको, कालाउ याते सुमिङ, द्‍याङको बिचारसो कालाउ साइतानसो दोङ लोका हि।

प्रकास 12:17

याको कारान इङको बारका आजिङगर बेबाल दोफा हेन्जा चेर ताम्पाहि। ओदोङ भाअ्सिङ, वा उङको बेबालको सान्तानको बिरोधता धुम पालि घोसाना पाहि। इङको या द्‍याङ हि जाइ परमेस्वरको आग्या केम्खे। कालाउ जेलाउ बुङ थुमा दोङ प्रभु हि दोअ्तेङ इङको इस्थिर हिखे।

प्रकास 18:23

नाङकोता द्‍याङगेलाइ आरोङ हेलाउ बुङ गेसाको जोल्तेङ हिका फाइसालामका मातिनाङ, इम्बालाइ आरोङ हेलाउ बुङ वाजान कालाउ बेजानको बिहु पाकाको गाला माहिनाङ। इन्ताको ब्यापारिगेलाइ गोताङ सुमिङता झाराङ खान्तेङ प्रभाबसालि हिघाहि। कालाउ इन्ताको जादुगरगेलाइ सुमिङको गोताङ द्‍याङगेलाइहेङ धोका पिहि।

प्रकास 19:20

कालाउ इङको लाङति राक्सेस कालाउ वाको दोफा भेनेङ राक्सेस जाइ धाताइका आगमबानि पाघाखे इङको न्हेमि रिम निन्चाहि। इदोइ धाताइका आगमबक्ता राक्सेसको भाअ्सिङ आचाम्माको चिन्हा तिङपाघाहि कालाउ झाराङ द्‍याङगेलाइहेङ धोका पिहि जाइ राक्सेसको चिन्हा ताइको कापाल ह्रुता ताअ्का हिघाहि कालाउ जाइ वाको मुर्तिहेङ पुजा पाका हिघाहि। इदोइ न्हेमिहेङ सिन्हु पाङ गन्धकहोइ ओतेङ हिका ताल भाइका बारका मेता थाइगिल्याङ।

प्रकास 20:10

कालाउ न्हुसो साइतानहेङ रिमाङ, जाइ प्रिथिबिता हिका द्‍याङगेलाइहेङ धोका पिका हिघाहि। साइतानहेङ गन्धकको मेता थाइगिल्प्याङ, इङको मे जेदोङ ताल भाइका बारका ह्याङ। राक्सेस कालाउ धातुवा आगमबक्तागेलाइहेङ लाम्फाङ दोङ थाइगिल्पिका हिघाहि। कालाउ इन्ता नितिम न्हिसिन जेलाउलाउ बुङ इम्बालाइ मेता कस्ट भोगियावा।

प्रकास 9:11

एमि राजा हि, जाइ वाको नियन्तरोनता ताअ्खे। वा इङको दुत हि जाइ वाङखाराका खारा खोलेका हिघाहि। कालाउ हिब्रु भासाता वाको मिङ आबाडोन हि, कालाउ ग्रिक भासाता आपोल्लियोन हि। इदोइ मिङको मतलप “जाइहेङ वा नासा पाखे।”