2 कोरिन्थि 3:3 - Dhimal NT3 नेलाइ दोङ तिङपासुखेना, कि नेलाइको बद्लिका जिबन ख्रिस्टको लेखेका पात्तारा भाइका हि, या पात्तारा वा केलाइको सेवाको माध्यामसो लेखेका हिघाहि। जेदोङ मसिहोइ लेखेका माको, भरु बान्चिका परमेस्वरको आत्माहोइ लेखेका हि, उन्ठुइको पाटिता माको, कालाउ द्याङको ह्रदयको पाटिता लेखेका हि। Faic an caibideil |
2 कोरिन्थि 3:3
35 Iomraidhean Croise
जेलाउ मोसाको व्यवस्था उन्ठुइको पाटिगेलाइता लेखेका हिघाहि, इङको बेला परमेस्वरको महिमा तिङहि, इस्राएल सारभिको द्याङगेलाइ हेन्जा सोमोइ थेकापा मोसाको ह्राइ खाङलि मादोहि, हाइपालिपानु इङको चिल्कातेङ हिघाहि जेलाउ कि इङको चिल्काका ह्रिङका सोमोइ थेकापा माहिहि, ओदोङ भाअ्सिङ जेसापा मोसाको व्यवस्थाको आधारित सेवाहोइ सिका चुमाखे, जेदोङता इन्सिका महिमा हिघाहि पानु,
मुर्तिगेलाइहेङ परमेस्वरको मुन्दिरको हिदोइ बुङ थामे मान्थु, कालाउ केलाइ सिन्हुका परमेस्वरको मुन्दिरगेलाइ दोङ हिनाहि जेसाङ परमेस्वर धर्मसास्तरता दोअ्का हि, “का उङको द्याङगेलाइकोता बासा ह्याङका, कालाउ इम्बालाइको माझाता हिगिल्लाङका, कालाउ का इम्बालाइको परमेस्वर जेनाङका, कालाउ इम्बालाइ काङको द्याङगेलाइ जेनावा।”
येसु कासेहेङ एसा बुङ दोअ्हि, स्मुरना सहरको मन्डलिको स्वर्गदुतहेङ या सन्देस लेखे: का वाआङ हिघा जाइ गोताङ आमेने सुरु पाहि, कालाउ का आवाङ हिघा जाइ गोताङ आमेने आन्त्य बुङ पाहि। का सिका हिघाखा, कालाउ एला सिन्हुका हिघा कालाउ जेलाउलाउको बुङ भाअ्सिङ सिन्हुतेङ ह्याङका। जेदोङ का नेलाइहेङ दोअ्खा वासेहेङ हिङसु।
येसु कासेहेङ एसा बुङ दोअ्हि, सार्दिस सहरको मन्डलिको स्वर्गदुतहेङ या सन्देस लेखे: का वाआङ हिघा, जाइ ताइको खुरता न्हि लोङ फुरुगेलाइ चाअ्तेङ ताअ्का हि। कालाउ जाइ परमेस्वरको न्हि लोङ आत्मागेलाइहेङ दिङगिल्पिहि। कासेहेङ नाङको काम थाहा हि कि, नेलाइ का दोफा खाङधुरि योग्य खान्धुराइगेलाइ भाइका तिङसुखेना। कालाउ बास्तबता नेलाइ एला कासेहेङ मापिताइस्वाना।
येसु कासेहेङ एसा बुङ दोअ्हि, फिलाडेलफिया सहरको मन्डलिको स्वर्गदुतहेङ या सन्देस लेखे: का वाआङ हिघा, जाइ पबित्तरो कालाउ सत्ये हि, जाइ दोफा राजा दाउदको ताल्चा हि, जेलाउ का इङको ताल्चाहोइ फिनु हेअ्खा, हासु बुङ इङकोहेङ गि:लि माद्वाङ, कालाउ जेलाउ का इङको ताल्चाहोइ फिनु गि:ताङका हासु बुङ इङकोहेङ हेअ्लि माद्वाङ। जेदोङ नेलाइहेङ दोअ्खा वासेहेङ हिङसु।
Sanasan