1तिमोथि 3:16 - Dhimal NT

¹⁶ हिदोइ बुङ साङखा माकोसिङ केलाइ मानिन्हाखे, कि केलाइको खाङधुरिको रहस्य हेन्जाङ माहान हि: ख्रिस्ट एमि द्‍याङको रुपता देखाल जेङहि, वा पबित्तरो आत्मासो परमेस्वरको चान साबित जेङहि, स्वर्गदुतगेलाइ वासेहेङ तिङहि, गोताङ सारभिगेलाइता वाको बारेता सुसमाचार हिङपाहि, सुमिङको गोताङ द्‍याङगेलाइ वाको ह्रुता खाङधुरि पाहि, कालाउ परमेस्वर वासेहेङ महिमाको स्वर्गता चुम्पुहि।

धिमाल

¹⁶ केलाइ इदोइ काथा साङखा मापासिङ इदोइ भेद हेथे बाराका हि दोअ्‌तेङ खान्‍धुर पान्‍हाखे। ख्रिस्‍ट द्‍याङ जेङतेङ लोहि, पुनित हाङसाहोइ धरमाति द्‌याङ ठहर्‍हाइन्‍हाहि कालाउ वासेहेङ सादेलचरगेलाइ तिङहि। मुलुकमुलुकता वाको पारचार जेङहि, दुनियाको द्‌याङगेलाइ वासेहेङ खान्‍धुर पाहि कालाउ वा प्रतापता सादेल चुम्‍पुन्‍हाहि।

1तिमोथि 3:16 Iomraidhean Croise

मत्‍ति 1:23

“खाङसु, एमि धानि बेजान गान्धि तेअ्तावा, कालाउ वा एमि जामालहेङ जोलोम प्यावा, कालाउ वा वाको मिङ इम्मानुएल ताअ्पियावा।” जेदोङको माने हि, “परमेस्वर केलाइ दोफा हि।”

मत्‍ति 13:11

वा इम्बालाइहेङ जोबाफ पिहि, नेलाइहेङते परमेस्वरको सासनको रहस्य पिका हि। जाइ परमेस्वरको सासनको बाहार हिकालाइहेङ निङपिका पाहासो गोताङ काथा दोअ्पिका मान्थु।

मत्‍ति 28:2

बारका भुइचाल हानेहि, हाइपालिपानु परमप्रभुको एमि स्वर्गदुत स्वर्गसो लेता खुहि, कालाउ लोतेङ तोमको उन्ठुइ लाअ्पातेङ इङको ह्रुता योम्हि।

मत्‍ति 3:16

कालाउ येसु बप्तिस्ता ह्रुतेङ ओदोङ घुरि चिसो ओल्लेतेसाङ आकास फाङगिल्हि, कालाउ ताइ ह्रुता परमेस्वरको आत्माहेङ कुर्जा भाइपा खुअ्काताङ पाका तिङहि।

मत्‍ति 4:11

कालाउ साइतान येसुहेङ लाअ्तेङ हानिहि, कालाउ स्वर्गदुतगेलाइ लोतेङ येसुको सेवा पाहि।

मर्कुस 1:13

साइतानसो जाचितेङ वा न्हे कुरि दिना थेकापा चाका-मान्दा थामेता जिहाँ-जुइलेङ कालाउ गुपुस दोफा हिघाहि, वासेहेङ स्वर्गदुतगेलाइ दोङ इन्ता हिपा भरि सेवा पाहि।

मर्कुस 16:19

जेलाउ येसु ताइको चात्यागेलाइहेङ इदोइ काथा दोअ्लि दोलाउ परमेस्वरसो वासेहेङ स्वर्ग तोल्हेपुहि कालाउ वा परमेस्वरको दाम्पाहा खुरपाहा सासन पालिको भाअ्सिङ योम्हि।

मर्कुस 16:5

जेलाउ तोम लिता जेका धाबा होङतेङ हिका एमि वाजान द्‍याङहेङ वाको दाम्पाहा योम्तेङ हिका तिङहि। कालाउ इम्बालाइ झाराङ आवाइतुहि।

लुका 2:32

वा दोङ गैर-यहुदिगेलाइको भाअ्सिङ परमेस्वरहेङ देखाल पाका फाइसालामका हिका हि। कालाउ इस्राएल सारभिको द्‍याङगेलाइको महिमा हिका हि।

लुका 20:44

जेलाउ राजा दाउद ताइमि दोङ वासेहेङ प्रभु, ख्रिस्ट दोअ्खे, कुनु वा हेसापा राजा दाउदको चान जेङहि?

लुका 22:43

कालाउ स्वर्गसो एमि स्वर्गदुत वासेहेङ बल कालाउ सहिलि दोका सरबुङ पिहि।

लुका 24:4

जेलाउ इम्बालाइ इङको बिसोइता आवाइतुतेङ हिघाहि, कालाउ जाहाँका धाबा होङतेङ हिका न्हेमि वाजानगेलाइ इम्बालाइको भेरपाङ जाअ्हि।

लुका 24:51

जेलाउ येसु ओबालाइहेङ आसिरबाद पिकाताङ पालाउ ओबालाइहेङ लाअ्हि कालाउ आकासता चुम्पुहि।

युहन्‍ना 1:14

कालाउ एमि हिघाहि जाइहेङ बचन दोअ्न्हाहि वा द्‍याङ जेङहि, कालाउ केलाइको माझाता बासा हि। केलाइ दोङ वाको महिमा तिङन्हाहि, वा इसिका हिघाहि जेसाङ आबासो लोका एमि खिनिङ चानको महिमा जेङखे, वा सत्ये कालाउ आनुग्रहहोइ भरि पुर्न हिघाहि।

युहन्‍ना 13:3

आबा परमेस्वर कासेहेङ गोताङ आनेमाने ह्रुता खाबारा पिका हि दोअ्का काथा येसुहेङ थाहा हिघाहि, कालाउ परमेस्वरसो लोतेङ परमेस्वरकोताङ घुरिदोङखा दोअ्का काथा बुङ येसुहेङ थाहा हिघाहि।

युहन्‍ना 15:26

का नेलाइको भाअ्सिङ आबासो साल्लाहाकार दिङगिल्लाङका वा इङको आत्मा हि जेदोङ आबासो लोखे, कालाउ जेदोङ सत्ये हि इङकोहेङ देखाल पाखे। जेलाउ वा ल्वाङ वा काङको बारेता दोअ्तावा। कालाउ नेलाइ इदोइ सुमिङको द्‍याङगेलाइहेङ काङको बारेता दोअ्स्वाना, हाइपालिपानु लाम्फासोङ नेलाइ का दोफा हिघासुखेना।

युहन्‍ना 16:28

का आबा पाहासो सुमिङता लोका हिघा, कालाउ आरोङ का सुमिङहेङ लाअ्तेङ आबाकोता घुरिदोङखा।

युहन्‍ना 17:5

एला हे आबा, नाअ् दोङ लोकाता काङको महिमा पि, जेदोङ महिमा सुमिङ सिर्जाइनालि खान्तेङ लाम्फाङ नाङको दोफा हिलाउ का दोफा हिघाना।

युहन्‍ना 20:12

कालाउ मरियम जे:का धाबा लागाइका न्हेमि स्वर्गदुतगेलाइहेङ तिङहि। इम्बालाइ जेता येसुको सिका जिउ ताअ्का हिघाहि। इन्ता एमि येसुको खिम्सु भारि कालाउ भेनेङ चाहि येसुको खोकोइ भारि योम्तेङ हिघाहि।

युहन्‍ना 6:62

नेलाइ का द्‍याङको चानहेङ जेता का लाम्फा हिघाखा इन्ता ताङकाताङ पाका तिङन्हा पानु हाइ पाना?

साल्न्हाका चात्या 1:19

कालाउ इङको काथा यरुसेलेमको गोताङ द्‍याङगेलाइहेङ थाहा जेङहि। ओदोङ भाअ्सिङ इम्बालाइ इङको मिलिङको मिङ ताइको भासाता आखेल्दामा ताअ्हि, जाइको माने हितिको मिलिङ।

साल्न्हाका चात्या 10:34

कालाउ पतरुस नुइ धुइलि तेङहि, “एला का जातिङ भारि बुझिखा, कि परमेस्वरको भाअ्सिङ झाराङ द्‍याङगेलाइ एनोङ दोङ साम्मान हि।

साल्न्हाका चात्या 14:27

जेलाउ इम्बालाइ एन्टिओक सहरता थुकालि लोहि, कालाउ खान्धुराइगेलाइहेङ जोम्पाहि, कालाउ परमेस्वर इम्बालाइ दोफा पाका गोताङ कामगेलाइको बयान पाहि, कालाउ हेसा परमेस्वर गैर-यहुदिगेलाइहेङ येसु ख्रिस्टता खाङधुरि पालि सक्स्यम बानाइहि।

साल्न्हाका चात्या 20:28

नेलाइ ताइको कालाउ ताइको गोताङ हुलको भाअ्सिङ चङख हिसु, पबित्तरो आत्मा नेलाइहेङ मन्डलिको आगुवा बानाइकानाङ हि। वा ताइकोङ हितिहोइ चोल्का परमेस्वरको मन्डलिहेङ नेलाइ सामाराइसु।

रोमि 10:12

हाइपालिपानु यहुदि कालाउ गैर-यहुदिता हाइ दोङ फरक मान्थु। वा एनोङ दोङ प्रभु झाराङको प्रभु हि, कालाउ वासेहेङ साघाइलिको भाअ्सिङ काइका झाराङहेङ बान्चि पावा।

रोमि 10:18

कालाउ का दोअ्खा कि, यहुदि द्‍याङगेलाइ पाक्का दोङ येसु ख्रिस्टको बिसोइता बचन हिङका हि। हाइपालिपानु इदोइ धर्मसास्तरता लेखेका हि, “इम्बालाइको बचन सारा प्रिथिबि भरि थुकाका हि, कालाउ इम्बालाइको दोअ्का काथा सुमिङको गोताङ थामेगेलाइता थुकाका हि।”

रोमि 16:25

एला वासेहेङ, जाइ नेलाइहेङ का हिङपाका सुसमाचार येसु ख्रिस्टको बिसोइता नेलाइहेङ खाङधुरिता बल्लियाका बानाइखे, इङको रहस्यको थाअ्साइका जेदोङ जुगौजुगसोङ म्होनाका हिघाहि।

रोमि 16:26

कालाउ एला आनान्तको परमेस्वरको आग्या आन्सार परमेस्वरको बक्तागेलाइ लेखेका काथा देखाल जेङका हि, कालाउकि गोताङ जातिगेलाइ खाङधुरि पाको कालाउ परमेस्वरको आग्या केमाको।

रोमि 3:4

मिधुलाउ बुङ माको, परमेस्वर जेलाउ बुङ सत्ये धुइखे कालाउ गोताङ द्‍याङगेलाइ धाताइखे। जेसाङ धर्मसास्तरता परमेस्वरको बारेता लेखेका हि, “नाअ् ताइको बचनता ठिक जेङपि, कालाउ न्याय जेङलाउ नाअ् जितिपि।”

रोमि 8:3

हाइपालिपानु केलाइको पापमय स्वभाबको कारनहोइ जेदोङ काम मोसाको व्यवस्था बुङ पालि मादोहि, इङको ताइमिङ परमेस्वर दोङ पाहि। वा ताइको चानहेङ केलाइकोङ पापमय जिउको स्वरुपता भाइकाङ केलाइको पापको भाअ्सिङ भोग भाइपाङ दिङगिल्हि। कालाउ एसापा परमेस्वर ताइको चानको जिउपाहासो पापको सरबुङ नासा पाहि।

रोमि 9:5

आब्राहाम, इसाहाक कालाउ याकुब इम्बालाइको पुर्खागेलाइ दोङ हि, कालाउ ख्रिस्ट बुङ जिउ आन्सार इम्बालाइकोङ हारागुटिया पाहासो हि। परमेस्वर जाइ झाराङ ह्रुता सासन पाखे, वाको बाखानाइ जेलाउलाउको भाअ्सिङ ज्याको। आमेन।

1 कोरिन्थि 15:47

लाङ द्‍याङ आदम चाहि प्रिथिबिको भोनोइसो बनिका हिघाहि, कालाउ न्हेतेङ आदम जाइ ख्रिस्ट हिका हि वा स्वर्ग पाहासो लोहि।

1 कोरिन्थि 2:7

कालाउ केलाइ परमेस्वरको म्होनाका ग्यान कालाउ बुद्दिको काथा पानाखे। जेदोङ आझाइ थेकापा हासुहेङ बुङ थाहा मान्थु, परमेस्वर केलाइको साम्मानको भाअ्सिङ सुमिङ सिरजाइन्हाका खान्तेङ लाम्फा थोहोराइका हिघाहि।

2 कोरिन्थि 1:19

हाइपालिपानु सिलास, तिमोथि कालाउ का नेलाइको माझाता प्राचार पाका परमेस्वरको चान येसु ख्रिस्ट धातुवा मान्थुघाहि, भरु वाकोता जेलाउ बुङ सत्ये खिनिङ हि।

गलाति 2:8

हाइपालिपानु जेसाङ परमेस्वर पतरुसहेङ यहुदिगेलाइको माझाता छाल्न्हाका चात्या जेङतेङ काम पालि लागाइहि, कालाउ वा दोङ कासेहेङ गैर-यहुदिगेलाइको माझाता छाल्न्हाका चात्या जेङतेङ काम पालि लागाइहि।

गलाति 4:4

कालाउ जेलाउ ठिक सोमोइ लोहि, परमेस्वर ताइको चानहेङ इदोइ सुमिङता दिङगिल्हि, कालाउ वाको जोलोम एमि बेजानसो जेङहि। कालाउ वा यहुदि जेङतेङ जोलोमहि, कालाउ मोसाको व्यवस्था केम्हि।

एफिसि 1:9

परमेस्वर ताइको योजाना आन्सार पाहि, कालाउ केलाइहेङ म्होन्हाका योजाना तिङपाहि, जेदोङ वा लाम्फाङ ख्रिस्ट पाहासो पुरा पालि योजाना पाका हिघाहि।

एफिसि 6:19

कालाउ काङको भाअ्सिङ बुङ प्रार्थाना पापिसु, कि जेलाउ का नुइ धुइलि तोम्लाउ परमेस्वर कासेहेङ बचनगेलाइ प्याको कालाउ का माअ्थिसिङ परमेस्वरको सुसमाचारको म्होनाका सत्येहेङ गोताङ द्‍याङगेलाइहेङ दोअ्लि द्वाको।

कलस्सि 1:23

जेसापा नेलाइ ताइको खाङधुरिता दिगो कालाउ बल्लियाका जेङतेङ कालाउ नेलाइ हिङका सुसमाचारको आस माअ्लासुन्हा पानु, इदोइ दोङ इङको सुसमाचार हि, जाइ सुमिङता गोताङ द्‍याङगेलाइहेङ प्राचार पाका हि। कालाउ जाइको का पावल सुसमाचार प्राचार पालि सेवक जेङघा।

कलस्सि 1:27

परमेस्वर ताइको द्‍याङगेलाइहेङ इदोइ सम्पति कालाउ महिमामय रहस्यको काथा बाताइलि निर्नय पाहि, जेदोङ वाको दोफा सुमिङको गोताङ द्‍याङगेलाइको भाअ्सिङ हि। कालाउ या रहस्य ख्रिस्ट ताइमिङ हि, वा नेलाइ दोफा हि। जाइ महिमाको भाअ्सिङ केलाइको एमि खिनिङ आस हि।

कलस्सि 1:6

इङको सुसमाचार नेलाइकोता लोका हि कालाउ गोताङ सुमिङता फाइलाइका हि कालाउ हेन्जा द्‍याङगेलाइ खान्धुराइ जेङका हि, कालाउ इम्बालाइको जिबन बद्लिका हि। जेसाङ इदोइहोइ नेलाइको जिबन बदलिहि, जेलाउ नेलाइ लाङ पोल्ति नेलाइ सन्‍देस हिङका हिघासुन्हा। कालाउ इदोइ सत्ये बुझेका हिसुन्हा, कि परमेस्वर ताइको आनुग्रह पाहासो ख्रिस्टता खाङधुरि पाकालाइको पाप स्यामा पापिखे।

कलस्सि 2:2

का थाङका परिस्रोम पाखा हाइपालिपानु का इम्बालाइहेङ खाङधुरिता बल्लियाका बानाइलि भोखा, कालाउ इम्बालाइ ता-ताइमिको प्रेमहोइ इम्बालाइता एकता ता चुमावा। का चाहिखा कि इम्बालाइता पुर्न समझ ह्याको कालाउ परमेस्वरको रहस्यमय योजानाको पुरा जानकारि ह्याको, जाइ ख्रिस्ट ताइमिङ दोङ हि।

2 थेस्लोनिकि 1:10

इदोइ एन्सालाउ जेनावा जेलाउ प्रभु येसु ताइको द्‍याङगेलाइसो आदार निङलि ल्वाङ। नेलाइ बुङ इम्बालाइ दोफाङ हिस्वाना हाइपालिपानु नेलाइ केलाइको सन्‍देस साअ्सुना जेदोङ नेलाइहेङ वाको बिसोइता दोअ्का हिघान्हाहि

2 थेस्लोनिकि 2:7

हाइपालिपानु इङको दुस्ट द्‍याङको सरबुङ सुमिङता सिकापा काम पातेङ हि, कालाउ इन्ता एमि हि जाइ इङको दुस्ट द्‍याङको सरबुङहेङ रोकितेङ ताअ्का हि। कालाउ जेलाउ थेकापा इङको दुस्ट द्‍याङहेङ दामासो मालाअ्पावा एन्सालाउ थेकापा वा रोकितेङ ह्यावा।

1तिमोथि 3:9

कालाउ इम्बालाइ सुद्द बिबेकता परमेस्वर तिङपाका सत्ये सन्देसता खाङधुरि पातेङ हितेङ हिलि गोइखे।

हिब्रु 1:3

वा दोङ परमेस्वरको महिमाको रुप कालाउ वा दोङ परमेस्वरकोङ स्वभाबको जातिङकोङ प्रति रुप हि, कालाउ गोताङ सुमिङहेङ ताइको सरबुङसाइका बचनहोइ सामाराइखे। कालाउ वा दोङ द्‍याङगेलाइहेङ ओबालाइको पापगेलाइसो स्यामा पापाका काम पालि दोतेङ वा स्वर्गता परमेस्वरको महिमाको दाम्पाहा खुर भारि झाउका साम्मानको थामेता योम्हि।

हिब्रु 12:2

केलाइको खाङधुरि सुरु पाका कालाउ सिद्द बानाइका येसुहेङ खाङतेङ ह्याइने, वा दोङ भबिस्यता निङका आनान्दको भाअ्सिङ आपामानहेङ हाइ दोङ भाइपा माथानिसिङ क्रुसको कस्ट भोगिहि कालाउ परमेस्वरको सिङहासनको दाम्पाहा भारि झाउका साम्मानको थामेता बिराजमान हितेङ हि।

हिब्रु 7:7

कालाउ केलाइ इदोइ पक्का गिनाखे कि आसिस पिका, आसिस निङका खान्तेङ बार्का हिखे।

हिब्रु 8:1

एला केलाइ दोअ्लि खाङका काथा चाहि इदोइ दोङ हि: केलाइको बुङ इसिका प्राधान पुजारि हि, जाइ स्वर्गता माहान परमेस्वरको सिङहासनको दाम्पाहा भारि झाउका साम्मानको थामेता बिराजमान हि।

1पतरुस 1:12

कालाउ परमेस्वर इङको बक्तागेलाइहेङ दोअ्हि कि इम्बालाइको सन्देसगेलाइ ताइको भाअ्सिङ माको भरु नेलाइको भाअ्सिङ दोङ हि। इङको सन्‍देस येसु ख्रिस्टको बारेता सुसमाचार दोङ जेदोङ नेलाइ एला हिङका हिसुना। परमेस्वर स्वर्गसो ताइको पबित्तरो आत्मा पाहासो द्‍याङगेलाइहेङ नेलाइको भाअ्सिङ सुसमाचार प्राचार पालि साघाइलि दिङगिल्हि। या गोताङ इदोइ झोको आचाम्माको हि कि स्वर्गदुतगेलाइ बुङ उत्सुकता दोफाङ इङको काथागेलाइ जेङका खाङतेङ हि।

1पतरुस 1:20

इदोइ सुमिङ सिरजाइन्हाका खान्तेङ लाम्फाङ, येसु ख्रिस्ट मुक्ति दाता हिका ह्याङ दोअ्तेङ परमेस्वर सोमोइ खान्तेङ लाम्फाङ दोङ पाक्का पाका हिघाहि। कालाउ वा इदोइ आम्तिम दिनागेलाइता इदोइ सुमिङता नेलाइको फाइदाको भाअ्सिङ लोहि।

1पतरुस 1:21

हाइपालिपानु ख्रिस्टको पाका कामको कारनहोइ, नेलाइ एला परमेस्वरता खाङधुरि पासुखेना। कालाउ नेलाइ ताइको खाङधुरि कालाउ आस परमेस्वरता ताअ्का हिसुना, हाइपालिपानु वा ख्रिस्टहेङ सिकासो सिन्चाल पाहि कालाउ वासेहेङ बारका महिमा पिहि।

1पतरुस 3:18

का एसा दोअ्खा हाइपालिपानु केलाइको पापको कारन ख्रिस्ट बुङ कस्ट भोगिहि। कालाउ सिहि। वा एखे खिनिङ सिहि कालाउ यासेहेङ आरोङ घुरितेङ सिलि मागोइयाङ। वा एमि धर्मि द्‍याङ हिघाहि, जाइ पापि द्‍याङगेलाइको भाअ्सिङ सिहि कालाउकि वा केलाइहेङ परमेस्वरको भेरपा चुमालि दोका हि। इम्बालाइ वाको जिउ ते सेअ्हि कालाउ वाको आत्मा सिन्हुका हि।

1पतरुस 3:22

कालाउ वा स्वर्गता हानिका हि। वा एला परमेस्वरको दाम्पाहा खुर भारि झाराङ खान्तेङ महत्वय पुर्न थामेता हि, कालाउ वा स्वर्गदुतगेलाइ कालाउ गोताङ आधिकारिगेलाइ कालाउ सरबुङगेलाइ ह्रुता सासन चालाइखे।

१ युहन्‍ना 1:2

परमेस्वर जाइ जातिङको जिबन पिखे, कालाउ द्‍याङगेलाइहेङ तिङपाहि, ओदोङ भाअ्सिङ केलाइ वाको सत्येताको बारेता दोअ्न्हाखे, कि जिबन पिका द्‍याङ जेलाउलाउको भाअ्सिङ ह्याङ कालाउ हेन्जाङ लाम्फासोङ आबा परमेस्वर दोफा हिघाहि, कालाउ एला परमेस्वर वासेहेङ केलाइकोता तिङपाका हि।

१ युहन्‍ना 3:5

पापको आनान्त दन्ड मोअ्पालि ख्रिस्ट इदोइ सुमिङता लोहि दोअ्का काथा नेलाइ गिसुखेना। कालाउ वा हेलाउ बुङ पाप मापाहि।

१ युहन्‍ना 3:8

जाइ लागातार पाप पाखे वा साइतान पाहासो हि। हाइपालिपानु साइतानते लाम्फासोङ पाप पाकाताङ लोका हि। साइतानको कामगेलाइ नासा पालिको भाअ्सिङ परमेस्वरको चान लोहि।

प्रकास 17:5

वाको कापालता, म्होन्हाका को आर्था ताअ्का एनोङ मिङ इसिका लेखेका हिघाहि, “का माहान सहर बेबिलोन हिघा। का गोताङ वेस्यागेलाइको आमाइ हिघा कालाउ सुमिङता हिका गोताङ द्‍याङगेलाइहेङ का सिद्रिका कामगेलाइ पापाका।”

प्रकास 17:7

इङको सोमोइ, इङको स्वर्गदुत कासेहेङ दोअ्हि, “माभाङभाङसु! का नासेहेङ उङको बेबालको कालाउ इङको राक्सेसको जाइको न्हि लोङ पुरिङ कालाउ तेलोङ दाङ हिघाहि, वाको म्होनाका आर्था बाताइयाङका। इङको बेबाल राक्सेसको ह्रुता योम्तेङ हिघाहि।

प्रकास 7:9

कालाउ न्हुसो, का इन्ता वथे बार्का द्‍याङको जेर तिङघा कालाउ हासु बुङ इङको गोताङहेङ गान्दिलि मादोघाहि। इम्बालाइ सुमिङको गोताङ जाति कुल, रास्ट, कालाउ गोताङ भासासो लोका हिघाहि। इम्बालाइ सिङहासन कालाउ थुमाको आगाता जाअ्हि। इम्बालाइ जे:का धाबा लागाइका हिघाहि, कालाउ गोताङ द्‍याङगेलाइ ताइको खुरता लाब्रा सिङको डालेङ चाअ्का हिघाहि, जेदोङ इङको साम्मानको चिन्हाको रुपता हिघाहि।