1तिमोथि 2:1 - Dhimal NT

¹ झाराङ खान्तेङ लाम्फा का आनुरोध पाङका, कि गोताङ द्‍याङको भाअ्सिङ परमेस्वर दोफा मोनोइ निबेदन, प्रार्थाना, बिन्ति कालाउ धन्यबाद पासु।

धिमाल

¹ एला का नेलाइहेङ दोअ्‌ताङका, झाराङ खान्‍तेङ लाम्‍फा झाराङ द्‌याङगेलाइको भाअ्‌सिङ पुकार पासु। परमेस्‍वरता द्‌याङगेलाइहेङ साघाइलिको भाअ्‌सिङ पुकार पासु, एम्‍बालाइको भाअ्‌सिङ पुकार रो च्‍याबास चार्‍हाइसु।

1तिमोथि 2:1 Iomraidhean Croise

साल्न्हाका चात्या 17:30

ओदोङ भाअ्सिङ लाम्फा द्‍याङगेलाइ मागिसिङ पाका कामहेङ परमेस्वर वास्ता मापापिहि। कालाउ एला परमेस्वर गोताङ थामेता हिका झाराङ द्‍याङगेलाइहेङ पाप पालि लाअ्लि आग्या पिका हि।

रोमि 1:8

झाराङ खान्तेङ लाम्फा का काङको परमेस्वर येसु ख्रिस्ट पाहासो दोङ नेलाइ झाराङको भाअ्सिङ धन्यबाद पिखा, हाइपालिपानु नेलाइ येसु ख्रिस्टता खाङधुरि पाका काथा गोताङ थामेता द्‍याङगेलाइ काथा पातेङ हि।

रोमि 6:17

नेलाइ लाम्फा पापको बान्धाइति हिघासुखेना, कालाउ एला नेलाइ निङका सिक्स्या किलि केम्का जेङका हिसुना। कालाउ का वाको भाअ्सिङ परमेस्वरहेङ ह्रदयसोङ धन्यबाद पिखा।

1 कोरिन्थि 15:3

हाइपालिपानु जेदोङ महत्वय पुर्न सन्‍देस का परमेस्वरसो निङघा, इङको मुख्य सन्‍देस का नेलाइहेङ दोअ्घा। इङको सन्‍देस चाहि धर्मसास्तर दोनाङ भाइपा ख्रिस्ट केलाइको पापको भाअ्सिङ सिपिहि।

2 कोरिन्थि 8:6

ओदोङ भाअ्सिङ तितस आन्चासोङ नेलाइको माझाता इदोइ दान ल्होपाका काम सुरु पानाङ इङको पुरा बुङ पाको दोअ्तेङ केलाइ तितसहेङ बिन्ति पानाहि।

एफिसि 3:13

एन्साङ दोङ का नेलाइहेङ सेउपाखा, कि नेलाइको भाअ्सिङ का दोङ कस्ट ल्होपाका तिङतेङ नेलाइ हारेस माचासु। हाइपालिपानु इदोइ गोताङ नेलाइको फाइदाको भाअ्सिङ हि।

एफिसि 5:20

केलाइको परमप्रभु येसु ख्रिस्ट पाका गोताङ कामको भाअ्सिङ जेलाउलाउ बुङ केलाइको आबा परमेस्वरहेङ धन्यबाद पिसु।

एफिसि 6:18

कालाउ जेलाउ बुङ गोताङ प्रार्थाना कालाउ बिन्ति पबित्तरो आत्माता पासु। कालाउ इदोइ गोताङ काथागेलाइ मनता ताअ्तेङ गोताङ जनगेलाइको भाअ्सिङ जेलाउ बुङ प्रार्थाना पासु।

फिलिप्पि 1:3

का जेलाउ बुङ नेलाइको बारेता सोचिखा कालाउ परमेस्वरहेङ धन्यबाद पिखा।

फिलिप्पि 4:6

हिदोइ बुङ काथाको फिकिरि मापासु, भरु गोताङ परिस्थितिता प्रार्थाना कालाउ निबेदनसो धन्यबाद दोफाङ नेलाइको बिन्ति परमेस्वरता प्रस्तुत पासु।

1 थेस्लोनिकि 3:12

केलाइ प्रार्थाना पाङ कि जेसाङ केलाइ नेलाइहेङ प्रेम पानाखे, एन्साङ दोङ प्रभु नेलाइहेङ बुङ एमिसो-भेनेङ दोफा कालाउ गोताङ द्‍याङगेलाइ दोफा प्रेमता आझाइ बाढेपाको।

2 थेस्लोनिकि 1:3

खान्धुराइ ओनेगेलाइ, नेलाइको भाअ्सिङ परमेस्वरहेङ जेलाउ बुङ धन्यबाद पिनाखे। एन्सा पालि केलाइहेङ ठिक हि, हाइपालिपानु नेलाइको खाङधुरि येसु ख्रिस्टता बाढेतेङ हानिका हि। कालाउ नेलाइको प्रेम बुङ एमिसो-भेनेङ दोफा झन बाढेतेङ हि।

1तिमोथि 2:4

गोताङ द्‍याङगेलाइ मुक्ति निनाको कालाउ इम्बालाइ सत्येको ग्यानता ल्वाको दोअ्का इच्छा वा पाखे।

1तिमोथि 5:5

कालाउ जाइ जातिङको के सिका बेबाल हि, कालाउ वाको हासु बुङ मान्थुनु, कालाउ वा ताइको भोरोसा परमेस्वरता खिनिङ ताअ्खे, कालाउ झेङपाङ-लिपाङ परमेस्वर दोफा ताइमिहेङ साघाइलिको भाअ्सिङ प्रार्थाना पाखे।

2 तिमोथि 2:24

कालाउ प्रभुको बान्धाइति चेरसुलि माएल, कालाउ वा झाराङहेङ दायाका हिलि गोइखे, कालाउ परमेस्वरको बचन रेम्फासो धिरपालि दोका कालाउ बिरोधि द्‍याङगेलाइ दोफा गोताङ काथा सहिलि दोका हिलि गोइखे।

तितस 2:11

खान्धुराइगेलाइहेङ एसापा धिरपा, हाइपालिपानु गोताङ द्‍याङगेलाइहेङ पापसो लाअ्पालि परमेस्वर ताइको आनुग्रह तिङपाका हि।

तितस 3:2

इम्बालाइ हासुको बुङ बिरोध मापाको कालाउ माचेरस्वाको, मोनोइ कालाउ गोताङ द्‍याङगेलाइ दोफा मिलितेङ हिका जेनाको।

हिब्रु 6:11

केलाइको बार्का चाहाना इदोइ हि कि, नेलाइ बान्चिपा भरि दाया कालाउ मायारुको कामगेलाइ पातेङ हिसु, इदोइ निसित पालिको भाअ्सिङ कि, नेलाइको आस पाका काथा पुरा जेनावा। कालाउ नेलाइ आल्सि माजेङस्वाना। भरु नेलाइ इङको द्‍याङगेलाइको उधारन आनुसरन पास्वाना, जाइ खाङधुरि कालाउ ह्रुमतेङ हिका कारन नेलाइ परमेस्वरको प्रतिग्या निङस्वाना।

याकुब 5:16

ओदोङ भाअ्सिङ नेलाइ एमिसो-भेनेङ दोफा ताइ-ताइको पाप सुइकार पासु। नेलाइ एल्लिको भाअ्सिङ एमिसो-भेनेङको भाअ्सिङ प्रार्थाना पासु। धर्मि द्‍याङको प्रार्थाना सरबुङसाइका कालाउ हेन्जाङ प्रभाबसालि जेङखे।