1पतरुस 5:9 - Dhimal NT

⁹ नेलाइको इस्थिर खाङधुरिहोइ नेलाइ इङको को बिरोध पालि गोइखे। फोम पासु कि सुमिङ भरि दोङ हिका खान्धुराइगेलाइ बुङ इन्सिकाङ कस्टको आनुभब पातेङ हि।

धिमाल

⁹ नेलाइ झाराङ खान्‍धुरता बोल्‍याका जेङसु रो दियाबलसको खिलापता ए जेङसु। हाइदोनु नेलाइभाइपाङ दुनियाको चारबितङ हिका बो खान्‍धुरि दादाओने बाइओनेगेलाइ बुङ इसिकाङ तु: भोगितेङ हि दोअ्‌का काथा नेलाइ दोङ गेसुखेना।

1पतरुस 5:9 Iomraidhean Croise

लुका 22:32

कालाउ का प्रार्थाना पाका हिघा कि, नाङको खाङधुरि का ह्रुता नेलाइको खाङधुरि मागुमाइयाको दोअ्तेङ पाप पालि लाअ्सु कालाउ का दोफा घुरितेङ लोलाउ नाअ् इम्बालाइको का ह्रुता खाङधुरि पालि दादा-ओनेगेलाइहेङ बल्लियाका बानाइ।

युहन्‍ना 16:33

का नेलाइहेङ इदोइ काथा इदोइ कारनसो दोअ्का हिघा, कि नेलाइ सान्ति निङलि दोअ्सु, हाइपालिपानु नेलाइ काङको चात्या हिसुना। सुमिङता नेलाइहेङ दुख कस्टते जेनावा, कालाउ साहास पासु हाइपालिपानु का दोङ इदोइ सुमिङको सासक साइतानहेङ हारिपाका हिघा।

साल्न्हाका चात्या 14:22

कालाउ गोताङ नगरता जेङका चात्यागेलाइको आत्माहेङ बल्लियाका बानाइकाताङ ओबालाइहेङ खाङधुरिता हितेङ हिलि आर्ति पिहि, कालाउ हेन्जा कस्ट सहितेङ केलाइ परमेस्वरको सासनता दुल्लि गोयाङ दोअ्तेङ ओबालाइहेङ दोअ्हि।

1 कोरिन्थि 10:13

द्‍याङगेलाइहेङ आइ लागिका जाच बाहेक आरु जाचता नेलाइ परिका मान्थु सुन्हा। कालाउ परमेस्वर खाङधुरि योग्य हि, वा केलाइ सहिलि दोका खान्तेङ हेन्जा जाचता परिलि माप्याङ, जेलाउ केलाइ जाचता परिन्हाखे, वा केलाइहेङ जेलाउ बुङ खाअ्का दामा बुङ प्यावा। कालाउकि केलाइ इदोङ सहिलि द्वाको।

एफिसि 4:27

कालाउ साइतानहेङ धोका पिलि माउका मापि।

एफिसि 6:16

कालाउ जेसाङ सिपाइ सतुरुको बानसो बान्चिलि ताइमि दोफा ढाल चुम्खे, एन्साङ दोङ ताइमिहेङ साइतानको हान्तिसो बान्चिलि ख्रिस्टता बल्लियाका खाङधुरि पातेङ हिसु।

कलस्सि 2:5

हाइपालिपानु का नेलाइसो दुरे जेङलाउ बुङ का नेलाइको बारेता सोचितेङ हिघा। कालाउ ख्रिस्टता नेलाइको खाङधुरि बल्लियाका तिङतेङ कासेहेङ हेन्जा खुसि जेङका हि।

1 थेस्लोनिकि 3:3

कालाउकि इदोइ कस्टगेलाइहोइ हासु बुङ हारेस माचाको। हाइपालिपानु नेलाइ ताइमिहेङ दोङ थाहा हि, कि केलाइ कस्ट भोगिलि गोइका हि। हाइपालिपानु या केलाइको भाअ्सिङ परमेस्वरको इच्छा दोङ हि।

1तिमोथि 6:12

परमेस्वरता खाङधुरि पालि मालाअ्सु कालाउ वाको आग्या केम्सु जेसाङ एमि आसल आर्मि धुम पालि हार मामानिखे। कालाउ इङको आनान्त जिबनहेङ चातेङ ताअ्सु, हाइपालिपानु याकोङ भाअ्सिङ परमेस्वर नासेहेङ काइका हि। कालाउ नाअ् बुङ हेन्जा द्‍याङगेलाइको आगाता नाङको खाङधुरिको रेम्का साक्सि पिका हिघाखेना।

2 तिमोथि 3:12

परमेस्वरहेङ खुसि बानाइलि भोका कालाउ येसु ख्रिस्टता खाङधुरि पाका झाराङहेङ साताइयाङ।

2 तिमोथि 4:7

खाङधुरिको रेम्का धुम पासु, जेसाङ एमि आर्मि धुम पालि हार मामानिखे, का बुङ ख्रिस्टको भाअ्सिङ थाङका मेहेनत पाका हिघा। का येसु ख्रिस्टको पिका कामहेङ पुरा पाका हिघा। कालाउ आखिरि दिना थेकापा खाङधुरि योग्य जेङतेङ हिघा।

हिब्रु 11:33

खाङधुरि पाहासोङ इम्बालाइ राइजिगेलाइ कब्जा पाहि, कालाउ न्याय दोफा राज्य पाहि, कालाउ परमेस्वर दोङ प्रतिग्या पाका काथागेलाइ बुङ निङहि, खुहाँगेलाइ इम्बालाइहेङ माचाहि।

हिब्रु 12:8

कालाउ जेसापा झाराङ जोम्काता जेङका इङको आनुसासन नेलाइ निङका मान्थु सुन्हा पानुते नेलाइ ताइको आबाको हेलाउ बुङ खास चानगेलाइ माको, कालाउ नेलाइ बास्ताबता परमेस्वरको चान-चामिन्दिगेलाइ माको।

याकुब 4:7

ओदोङ भाअ्सिङ ताइमिहेङ परमेस्वरको खाबाराता ताअ्सु। साइतानको बिरोध पासु, कालाउ इङको नेलाइसो थितेङ खातावा।

1पतरुस 1:6

नेलाइ इदोइ गोताङ काथागेलाइको बारेता लेङचालि गोइखे, जेसाङ एला आतुइसा सोमोइको भाअ्सिङ नेलाइ खाल-खाल्को कस्ट भोगिलि गोइखे।

1पतरुस 2:21

परमेस्वर नेलाइहेङ काइका को कारन एनोङ कारन इदोइ हि कि नेलाइ वाको भाअ्सिङ कस्ट भोगिलि गोइस्वाना। ख्रिस्ट, जाइ नेलाइको भाअ्सिङ कस्ट भोगिहि। वा नेलाइको उधारन हि। ओदोङ भाअ्सिङ नेलाइ वाको पाका काम आनुकरन पालि गोइखे।

1पतरुस 3:14

कालाउ जेसापा केलाइको धर्मि ब्यभारहोइ केलाइ दुख निङन्हाखे पानु, केलाइ बास्ताबता आसिस जेङन्हाखे। ओदोङ भाअ्सिङ, जेसापा केलाइहेङ धम्कि पिका द्‍याङगेलाइ हि पानु, इम्बालाइ दोफा माथिसु कालाउ मापिरसु।

1पतरुस 4:13

याको बारेता लेङचासु, कालाउकि नेलाइ ख्रिस्ट भोगिका क्रुस्टता झ्वाइनाका हिसुना। ओदोङ भाअ्सिङ जेलाउ ख्रिस्ट गोताङ द्‍याङगेलाइहेङ ताइको महिमाता देखाल पिलि आरोङ ल्वाङ, कालाउ नेलाइको आनान्द जातिङकोङ बार्का जेनाङ।

प्रकास 1:9

का युहान्‍ना, नाङको दोफाङ खान्धुराइ, नेलाइ येसुता हिकागेलाइ झाराङ परमेस्वरको सासनको सहभागि जेङस्वाना, कालाउ केलाइ झाराङ दुख-कस्ट भोगिन्हाखे कालाउ येसुको भाअ्सिङ धैर्य दोफा सहिलि बुङ गोइखे। परमेस्वरको बचन कालाउ येसु ख्रिस्टको साक्सि दोअ्नाङ का पत्मोस दोअ्का टापुता हिघा।

प्रकास 6:11

कालाउ न्हुसो इङको झाराङहेङ जे:का होङका धाबा पिहि। परमेस्वर इम्बालाइहेङ आले सोमोइ आरोङ ह्रुम्लि दोअ्हि। हाइपालिपानु इम्बालाइ भाइपा माकुनु आरोङ बुङ प्रभुको आरु सेवकगेलाइ कालाउ ओनेगेलाइ जाइ येसुको सेवा पाघाखे इम्बालाइ भाइपाङ सेअ्न्हालि गोयाङ। जेलाउ सेअ्न्हाका द्‍याङगेलाइको गान्दिका पुरा माजेङका थेकापा, इम्बालाइको भाअ्सिङ हुम्लि गोइका हि।

प्रकास 7:14

कालाउ का वासेहेङ दोअ्घा, “कासेहेङ थाहा मान्थु भरु नेउ, नासेहेङ दोङ थाहा हि।” वा कासेहेङ दोअ्हि, “इदोइ द्‍याङगेलाइ हि जाइ दुख भोगिका हि। इम्बालाइ ताइको धाबा थुमाको हितिता झाअ्हि कालाउ जे:का जेङहि, याको मतलब हि कि इम्बालाइको पाप लाअ्पाका हि।