१ युहन्‍ना 5:6 - Dhimal NT

⁶ या येसु ख्रिस्ट हि, जाइहेङ परमेस्वर इदोइ सुमिङता दिङगिल्हि, कालाउ चिता बप्तिस्ता ह्रुहि, कालाउ न्हुसो जेलाउ वा सिहि वाको हिति होहि, माकुनु येसु ख्रिस्ट जाइ चिसो खिनिङ बप्तिस्ता ह्रुका माको, भरु ताइको हिति होपातेङ क्रुस्टता बुङ सिहि। कालाउ पबित्तरो आत्मा साक्सि पिखे कि येसु ख्रिस्ट परमेस्वरसो लोका हि कालाउ पबित्तरो आत्मा जेलाउ बुङ सत्ये काथा दोअ्खे।

धिमाल

⁶ इसु ख्रिस्‍ट दोङ चिको भुअ्‌का र्‍हुतेङ रो कुरुसता हिति ह्‍याअ्‌पातेङ लोहि। वा चिसो खिनिङ माको, चि रो हितिसो लोहि। दासि पिका ते पुनित हाङसा दोङ हि। हाइपानु पुनित हाङसा सत हि।

१ युहन्‍ना 5:6 Iomraidhean Croise

मत्‍ति 26:28

इदोइ काङको आङगुरको रस काङको हिति, काङको हिति परमेस्वर पाहासो वाको द्‍याङगेलाइको भाअ्सिङ नावा बाचा सुरु जेनावा। इदोइ हिति हेन्जाङ द्‍याङगेलाइ ओबालाइको पाप स्यामाको भाअ्सिङ होपावा।

मत्‍ति 3:16

कालाउ येसु बप्तिस्ता ह्रुतेङ ओदोङ घुरि चिसो ओल्लेतेसाङ आकास फाङगिल्हि, कालाउ ताइ ह्रुता परमेस्वरको आत्माहेङ कुर्जा भाइपा खुअ्काताङ पाका तिङहि।

मर्कुस 14:24

कालाउ इम्बालाइहेङ येसु दोअ्हि, “इदोइ काङको आङगुरको रस काङको हितिको कारार दोङ। काङको हिति हेन्जा द्‍याङको भाअ्सिङ बलिको रुपता होपाङ। इदोइ इङको बाचाहेङ जानाइखे जेदोङ परमेस्वर ताइको द्‍याङगेलाइ दोफा होपातेङ हि।

लुका 22:20

एसापाङ चाअ्लि दोअ्तेङ, येसु बात्ति तोल्हेतेङ दोअ्हि, या बात्तिको माने नेलाइको भाअ्सिङ होपाका काङको हितिता परमेस्वर कालाउ वाको द्‍याङगेलाइको माझाता एनोङ नावा बाचा हि।

युहन्‍ना 14:17

वा पबित्तरो आत्मा हि, जाइ सत्येता थोङपुखे। सुमिङको द्‍याङगेलाइ इङकोहेङ ग्रहन पालि मादोअ्खे, हाइपालिपानु सुमिङते वासेहेङ ना ते तिङखे ना ते नाल्खे। कालाउ नेलाइ पबित्तरो आत्माहेङ नाल्सुखेना, हाइपालिपानु वा नेलाइ दोफा हिखे, कालाउ वा नेलाइता हिखे।

युहन्‍ना 14:6

येसु थोमाहेङ दोअ्हि, दामा, सत्ये, कालाउ जिबन पिका का दोङ हिघा। का बाहेक हासु बुङ आबाकोता हानिलि माद्वाङ।

युहन्‍ना 15:26

का नेलाइको भाअ्सिङ आबासो साल्लाहाकार दिङगिल्लाङका वा इङको आत्मा हि जेदोङ आबासो लोखे, कालाउ जेदोङ सत्ये हि इङकोहेङ देखाल पाखे। जेलाउ वा ल्वाङ वा काङको बारेता दोअ्तावा। कालाउ नेलाइ इदोइ सुमिङको द्‍याङगेलाइहेङ काङको बारेता दोअ्स्वाना, हाइपालिपानु लाम्फासोङ नेलाइ का दोफा हिघासुखेना।

युहन्‍ना 16:13

जेलाउ वा पबित्तरो आत्मा हिका हि, सत्येता थोङपुखे, वा लोलि दोअ्तेङ नेलाइहेङ इङको गोताङ परमेस्वरको बारेता सत्ये बुझाइ पापियावा। वा दोङ ताइको खाबारासो माधुइयाङ कालाउ वा जेदोङ काथागेलाइ परमेस्वरसो हिनाङ ओदोङ दोङ काथा नेलाइहेङ दोअ्प्यावा। कालाउ न्हुसो लोलि खाङका काथागेलाइ बुङ दोअ्प्यावा।

युहन्‍ना 3:5

येसु उत्तारा पिहि, “जातिङ भारि का नासेहेङ दोअ्खा, चि कालाउ आत्मासो जोलोम माजेङपा थेकापा हासु बुङ परमेस्वरको सासनता दुल्लि माद्वाङ।

युहन्‍ना 4:10

येसु वासेहेङ जोबाफ पिहि, “नाअ् मागिखेना कि नासेहेङ परमेस्वर हाइ पिलि खाङखे। कालाउ नाअ् या बुङ मागिखेना कि नाअ् दोफा हासु चि ह्रेखे। जेसापा नाअ् थाहा गिनु इङको का दोफा ह्रेधाना कालाउ का नासेहेङ जिबनको चि पिधाङका जेदोङ जिबन पिखे।”

युहन्‍ना 4:14

कालाउ जाइ-जाइ काङको पिका चि आम्खे उङको हेलाउ बुङ चि आम्लि माकिताङ। जेदोङ चिका प्याङका, इङको चि वासेहेङ आनान्त जिबनको भाअ्सिङ मुर्तेङ हिका चिको मुहान जेनाङ।”

युहन्‍ना 6:55

हाइपालिपानु काङको जिउ जातिङकोङ चाका आमेने दोङ, कालाउ काङको हिति जातिङको आम्का आमेने दोङ।

साल्न्हाका चात्या 8:36

कालाउ ओबालाइ दामाता हानिकाताङ पालाउ आधे चि हिका एनोङ पोखोरि तिङहि। कालाउ उङको नपुङसक दोअ्हि, “खाङसु, इता पोखोरि हि, एला कासेहेङ हाइहोइ बप्तिस्ता ह्रुकासो रोकिलि द्वावा रो?”

रोमि 3:25

परमेस्वर येसु ख्रिस्टहेङ वाको हितिसो पाप स्यामाको भाअ्सिङ बलिदान भाइपाङ पिगिल्हि, कालाउकि येसु ख्रिस्ट ह्रुता खाङधुरि पाकालाइको पाप स्यामा जेनाको, इदोइ काम परमेस्वर ताइको धार्मिकता तिङपालि पाहि, हाइपालिपानु परमेस्वर हानिका सोमोइता ताइको धर्यता तिङपातेङ द्‍याङगेलाइहेङ इम्बालाइको पापको दन्ड मापिहि।

एफिसि 1:7

ख्रिस्ट केलाइको भाअ्सिङ ताइको हिति होपातेङ सिकानाङ केलाइको पाप स्यामा जेङका हि कालाउ केलाइ स्वतन्तरो जेङका हिनाहि। ओह, परमेस्वरको आनुग्रह हेथे माहान हि, जाइ वा केलाइहेङ प्रसस्त पिका हि।

कलस्सि 1:4

हाइपालिपानु ख्रिस्ट येसुता नेलाइको खाङधुरि कालाउ परमेस्वरको जनगेलाइको भाअ्सिङ नेलाइको प्रेमको काथा केलाइ हिङका हिनाहि।

1तिमोथि 3:16

हिदोइ बुङ साङखा माकोसिङ केलाइ मानिन्हाखे, कि केलाइको खाङधुरिको रहस्य हेन्जाङ माहान हि: ख्रिस्ट एमि द्‍याङको रुपता देखाल जेङहि, वा पबित्तरो आत्मासो परमेस्वरको चान साबित जेङहि, स्वर्गदुतगेलाइ वासेहेङ तिङहि, गोताङ सारभिगेलाइता वाको बारेता सुसमाचार हिङपाहि, सुमिङको गोताङ द्‍याङगेलाइ वाको ह्रुता खाङधुरि पाहि, कालाउ परमेस्वर वासेहेङ महिमाको स्वर्गता चुम्पुहि।

तितस 3:5

कालाउ केलाइको ताइकोङ रेम्का कामसो माको, कालाउ वाको ताइको दायाहोइ केलाइहेङ केलाइको पापको दन्डसो बान्चिपाहि, कालाउ वा केलाइहेङ पबित्तरो आत्मा पिहि, जाइ केलाइको पापगेलाइ झाअ्पिहि कालाउ नावा जिबन पिहि कालाउ नावा तरिका जियाइलि धिरपाहि।

हिब्रु 10:29

जेसापा मोसाको व्यवस्था आन्सार साजाइ इन्सिका हिघाहि पानु, जाइ परमेस्वरको चानहेङ हेला पाखे उङकोहेङ आझाइ झन बार्का साजाइ जेङखे। कालाउ वा परमेस्वरको चानहेङ खोकोइहोइ याङखे कालाउ आदार मापाखे। कालाउ वा ख्रिस्टको हितिहेङ पबित्तरो माथानिखे, जेदोङ परमेस्वर वासेहेङ पबित्तरो बानाइलिको भाअ्सिङ नावा कारार सुरु पाहि। वा पबित्तरो आत्माको आपामान पाहि, जाइ पाहासो वा आनुग्रह निङका हिघाहि।

हिब्रु 12:24

नेलाइ परमेस्वर कालाउ द्‍याङगेलाइको मध्यस्ताता नावा कारारता धेउपिका येसु कालाउ सिरकाइका हितिता लोका हिसुन्हा, जाइ हाबिलको हिति खान्तेङ आझाइ आसल बचन धुइखे दोअ्खे।

हिब्रु 13:20

कालाउ एला, सान्तिको परमेस्वर, जाइ प्रभु येसुहेङ सिकासो सिन्हु पाहि, वाको इच्छा पुरा पालिको भाअ्सिङ नेलाइहेङ गोइका गोताङ गुनगेलाइ प्याको, कालाउ परमेस्वर वासेहेङ मन परिका गोताङ काथागेलाइ येसु ख्रिस्ट पाहासो पालिको भाअ्सिङ केलाइहेङ साघाइयाको। येसु दोङ भेडागेलाइको आसल लाखुरिया हि दोअ्का काथा आनान्त बाचाको चिन्हा वाको हितिसो दोङ तिङपाखे, वासेहेङ दोङ जेलाउलाउको भाअ्सिङ महिमा मिलियाको। आमेन।

हिब्रु 9:14

या सोचिसु कि सिका भारि चुम्पुका कामगेलाइसो ख्रिस्टको हितिहोइ केलाइको ह्रदयहेङ ते झन हेथे हेन्जा सुद्द बानाइलि दोखे, कालाउकि केलाइ सिन्हुका परमेस्वरको आराधाना पालि द्वाको, हाइपालिपानु आनान्त आत्माको सरबुङ पाहासो ताइमिहेङ केलाइको पापको भाअ्सिङ एमि सिद्द भोगको रुपता परमेस्वरहेङ चाढाइहि।

हिब्रु 9:7

कालाउ बासारता एखे खिनिङ प्राधान पुजारि माहा पबित्तरो थामेता हानिघाखे, जेलाउ वा लिता हानिघाखे कालाउ वा ताइमि दोफा गुपुसको हिति चुम्पुतेङ हानिघाखे, कालाउ वा इङको हिति ताइको पाप स्यामाको भाअ्सिङ कालाउ द्‍याङगेलाइको मागिसिङ पाका पापको भाअ्सिङ परमेस्वर दोफा बिन्ति चाढाइका काम पाघाखे।

1पतरुस 1:2

आबा परमेस्वर लाम्फाङ नेलाइहेङ वाको द्‍याङ जेङलि कालाउ पबित्तरो आत्माको काम पाहासो नेलाइहेङ पबित्तरो बानाइलि चुनिलि निर्नय पाका हिघाहि। वा इसिका पाहि कालाउकि नेलाइ येसु ख्रिस्टको आग्या केम्सु कालाउ वाको हिति पाहासो सुद्द जेङलि दोसु। का प्रार्थाना पाखा कि परमेस्वर नेलाइहेङ नुगामारि थेकापा आनुग्रह कालाउ सान्ति प्याको।

1पतरुस 3:21

पुर्ना सोमोइता इम्बालाइको मुक्ति एला केलाइको मुक्तिको रुप दोङ, जेलाउ केलाइ बप्तिस्ता ह्रुन्हाखे। केलाइ बप्तिस्ता ह्रुका चिहोइ केलाइको जिउसो मिधि माझानाखे, भरु इङको सङकेत हि कि केलाइ परमेस्वरसो माफ ह्रेका हिनाहि, कालाउकि केलाइको मन एला माआउलियाको। केलाइ स्यामा निङलि द्वाङ, हाइपालिपानु येसु ख्रिस्ट ताइको सिकासो आरोङ बान्चिका हि,

१ युहन्‍ना 1:7

कालाउ जेसाङ परमेस्वर ताइको पबित्तरोता आन्सार जेलाउ बुङ आसाल काम पाखे। एन्साङ जेलाउ केलाइ परमेस्वरको फाइसालामकाहोइ तिङपाका आसल काम पाखे कालाउ केलाइको सङगति एमिसो-भेनेङ दोफा हिखे, कालाउ वाको चान येसुको हितिहोइ केलाइ झाराङहेङ पापसो सुद्द पाखे।

१ युहन्‍ना 4:10

सत्ये प्रेम या दोङ हि: केलाइ परमेस्वरहेङ प्रेम पाकानाङ माको, कालाउ वा दोङ केलाइहेङ प्रेम पाहि, कालाउ ताइको चानहेङ दिङगिल्पिहि। कालाउकि वाको बलिदानसो केलाइको पापको दन्ड स्यामा जेनाको।

प्रकास 1:5

कालाउ येसु ख्रिस्टसो, जाइ परमेस्वरको सत्येता खाङधुरि योग्यता देखाल पापियाङ। वा दोङ हि जाइ सिका न्हुसो आरोङ सिन्हु पाहि, कालाउ वा इदोइ सुमिङको गोताङ राजागेलाइको सासक हि। कालाउ येसु ख्रिस्ट केलाइहेङ मायारु पाखे कालाउ वाको हितिहोइ केलाइहेङ केलाइको पापगेलाइसो बान्चिपाखे। वा केलाइहेङ एनोङ जाति बानाइहि जाइ दोफा परमेस्वर ओबालाइको राजाको रुपता हिका हि। कालाउ वा केलाइहेङ वाको आबा परमेस्वरको भाअ्सिङ पुजारिगेलाइ बानाइहि। वा दोङ जेलाउलाउको भाअ्सिङ साम्मान कालाउ खाबारा गोताङ सोमोइ निङलि गोयाङ। आमेन।

प्रकास 5:9

इम्बालाइ एसा दोअ्काताङ एनोङ नावा ले लेहि: “नाअ् मोहोरगेलाइ थुरलि कालाउ किताप खोलेलि योग्य हिना, हाइपालिपानु द्‍याङगेलाइ नासेहेङ सेअ्हि कालाउ नाङको सिकाको हितिहोइ नाअ् परमेस्वरको भाअ्सिङ गोताङ कुल, भासा, रास्ट कालाउ जाति-जातिसो झाराङ द्‍याङगेलाइहेङ चोल्न्हा।

प्रकास 7:14

कालाउ का वासेहेङ दोअ्घा, “कासेहेङ थाहा मान्थु भरु नेउ, नासेहेङ दोङ थाहा हि।” वा कासेहेङ दोअ्हि, “इदोइ द्‍याङगेलाइ हि जाइ दुख भोगिका हि। इम्बालाइ ताइको धाबा थुमाको हितिता झाअ्हि कालाउ जे:का जेङहि, याको मतलब हि कि इम्बालाइको पाप लाअ्पाका हि।