१ युहन्‍ना 2:12 - Dhimal NT

¹² नेलाइ जाइ काङको आनाउ जामाललाइ भाइकाङ हिसुन्हा, का नेलाइको भाअ्सिङ लेखेदोङखा, हाइपालिपानु येसु ख्रिस्ट नाङको भाअ्सिङ पाका काम पाहासो परमेस्वर नेलाइको पाप स्यामा पापिका हि।

धिमाल

¹² काङको दायाका जामालाइ, का नेलाइहेङ लेखेदोङखा, हाइदोनु वाको मिङको भाअ्‌सिङ नेलाइको कुकरम माफ जेङका हि।

१ युहन्‍ना 2:12 Iomraidhean Croise

लुका 24:47

कालाउ यरुसेलेम सहरसो सुरु पातेङ द्‍यापाहाङ गोताङ जातिगेलाइ वासेहेङ खाङधुरि पातेङ पाप पालि लाअ्नु पाप स्यामा जेनावा दोअ्तेङ सुसमाचार पालि गोइस्वाना।

लुका 5:20

इम्बालाइको ओसारापाङ खाङधुरि तिङतेङ येसु दोअ्हि, ओइ द्‍याङ, नाङको पापगेलाइ स्यामा जेङहोइ।

साल्न्हाका चात्या 10:43

गोताङ परमेस्वरको बक्तागेलाइ येसुको साक्सि पिका हि, कि ख्रिस्ट क्रुस्टता जेदोङ पाहि वाको ह्रुता खाङधुरि पाका झाराङ वाको मिङसो पापको स्यामा निनावा।”

साल्न्हाका चात्या 13:38

ओदोङ भाअ्सिङ खान्धुराइ ओनेगेलाइ, नेलाइहेङ थाहा जेनाको, कि इदोङ येसुसो पाप स्यामा जेनाङ दोअ्तेङ घोसाना नेलाइहेङ पाका हि।

साल्न्हाका चात्या 4:12

येसु बाहेक आरु हासुता बुङ मुक्ति मान्थु, हाइपालिपानु केलाइहेङ मुक्ति निङलि स्वर्ग लेता द्‍याङगेलाइकोता भेनेङ हिदोइ बुङ मिङ पिका मान्थु।”

1 कोरिन्थि 6:11

नेलाइ हेथेते इन्सिकाङ हिघासुखेना, कालाउ परमेस्वर नेलाइको पाप झाअ्पिहि, कालाउ प्रभु येसु ख्रिस्टको मिङता केलाइहेङ पबित्तरो आत्मासो धर्मि कालाउ पबित्तरो बानाइहि।

एफिसि 1:7

ख्रिस्ट केलाइको भाअ्सिङ ताइको हिति होपातेङ सिकानाङ केलाइको पाप स्यामा जेङका हि कालाउ केलाइ स्वतन्तरो जेङका हिनाहि। ओह, परमेस्वरको आनुग्रह हेथे माहान हि, जाइ वा केलाइहेङ प्रसस्त पिका हि।

एफिसि 4:32

एमिसो भेनेङहेङ दाया कालाउ क्रिपा पासु कालाउ परमेस्वर ख्रिस्ट पाहासो नेलाइहेङ माफ पिका भाइपाङ नेलाइ बुङ एमिसो-भेनेङहेङ माफ पिसु।

कलस्सि 1:14

वा केलाइहेङ लाअ्पाका हि, कालाउ वा केलाइको पापगेलाइ स्यामा पापिका हि।

१ युहन्‍ना 1:4

केलाइको आनान्द पुरा ज्याको दोअ्तेङ केलाइ इदोइ काथागेलाइ लेखेदोङन्हाखे।

१ युहन्‍ना 1:7

कालाउ जेसाङ परमेस्वर ताइको पबित्तरोता आन्सार जेलाउ बुङ आसाल काम पाखे। एन्साङ जेलाउ केलाइ परमेस्वरको फाइसालामकाहोइ तिङपाका आसल काम पाखे कालाउ केलाइको सङगति एमिसो-भेनेङ दोफा हिखे, कालाउ वाको चान येसुको हितिहोइ केलाइ झाराङहेङ पापसो सुद्द पाखे।

१ युहन्‍ना 1:9

जेसापा केलाइ ताइको पाप परमेस्वरको आगाता सुइकार पानाखे पानु वा केलाइको पाप स्यामा पापिखे कालाउ गोताङ मारेम्का कामगेलाइसो केलाइहेङ सुद्द पाङ। हाइपालिपानु वा जेदोङ दोअ्खे ओदोङ पाखे कालाउ जेलाउ बुङ ठिक काम खिनिङ पाखे।

१ युहन्‍ना 2:1

नेलाइ जाइ काङको आनाउ जामाललाइ भाइका हिसुन्हा, नेलाइ पाप मापासु दोअ्तेङ का इदोइ काथा नेलाइहेङ लेखेतेङ हिघा। कालाउ हिदोइ बुङ द्‍याङ पाप पाखे पानु बुङ आबा परमेस्वर दोफा केलाइको पक्स्यता धुइपिका एमि हि, जाइ केलाइको पाप स्यामाको भाअ्सिङ परमेस्वर दोफा बिन्ति पापिखे। उङको द्‍याङ दोङ येसु ख्रिस्ट हि, जाइ परमेस्वरको आगाता पुरा रुपता ठिक हि।

१ युहन्‍ना 2:21

नेलाइ सत्येहेङ मागिसुखेना दोअ्तेङ का लेखेका माको, कालाउ हिदोइ बुङ धाताइका सिक्स्या परमेस्वर देखाल पापिका सत्येसो मालोखे दोअ्तेङ नेलाइ गिका हिनाङ का नेलाइको भाअ्सिङ लेखेदोङखा।

१ युहन्‍ना 2:7

ओइ आनाउ खान्धुराइ ओनेगेलाइ, का नेलाइहेङ हिदोइ बुङ नावा आग्या लेखेका माको, कालाउ ओदोङ पुरना आग्या लेखेदोङखा जेदोङ सुरुसोङ नेलाइ दोफा हिघाहि। पुरना आग्या नेलाइ हिङका बचन हि, जेलाउसो नेलाइ ख्रिस्टता खाङधुरि पासुन्हा।