फिलिप्पि 4:8 - धिमाल

⁸ एला दादाओने बाइओनेगेलाइ, जेदोङ काथा सत रो मानको हि, जेदोङ काथा नियाको रो पुनित हि, जेदोङ काथा माया लाएक रो निगाहाको हि, जेदोङ काथा रेम्‍का रो बाखिन्‍लि गोइका हि, इङकोङ काथाता मन लागाइसु।

Dhimal NT

⁸ आम्तिमता खान्धुराइ ओनेगेलाइ, जेदोङ काथा सत्ये हि, जेदोङ काथा आदारनिय हि, जेदोङ काथा ठिक हि, जेदोङ काथा सुद्द हि, जेदोङ काथा झालाफालापा हि, जेदोङ काथा क्रिपामय हि, जेसापा हाइ दोङ स्रेस्थता, कालाउ बाखिन योग्य हाइ दोङ हि पानु इदोइ दोङ काथागेलाइता मन लागाइसु।

फिलिप्पि 4:8 Iomraidhean Croise

मत्‍ति 22:16

एम्‍बालाइ ताइको चात्‍यागेलाइहेङ हेरोदको द्‍याङगेलाइदोफा इसुकोता दिङगिल्‍हि। एम्‍बालाइ दोअ्‌हि, “ओइ मास्‍टर, केलाइ गेन्‍हाखे, ना जातिङको हिन्‍हा रो द्‍याङगेलाइहेङ परमेस्‍वरको जातिङको काथा धिरपाखेना। ना हासुङदोफा माथिखेना, ना द्‍याङगेलाइको र्‍हाइ खान्‍तेङ काथा बुङ मापाखेना।

मर्कुस 6:20

हाइपानु युहन्‍नाहेङ धरमाति रो पुनित द्‍याङ चिताइतेङ हेरोद वाकोदोफा थिघाखे। इदोइखातिर वासेहेङ बान्‍चेपातेङ ताअ्‌का हिघाखे। युहन्‍नाको काथा हिङलाउ हेरोद थिलाउ बुङ वाको काथा हिङलि मोन्‍दा ताघाखे।

लुका 16:15

कालाउ इसु एम्‍बालाइहेङ दोअ्‌हि, “नेलाइ द्‌याङगेलाइको नजरता धरम तिङलि ते भोसुखेना कुलाउ परमेस्‍वर नेलाइको कोन्‍धाङ गेखे। द्‌याङको झाउका फोमपाका इन्‍सिका काथागेलाइहेङ परमेस्‍वर आखेका दोअ्‌तेङ मोन्‍दा माताखे।

लुका 2:25

इङको पहर सिमियोन दोअ्‌का द्‌याङ यरुसलेमता हिघाखे। वा धरम द्‌याङ हिघाखे रो परमेस्‍वरको भक्ति पाघाखे। वा इस्राएलिगेलाइहेङ बान्‍चेपाका द्‌याङको आस पातेङ दामा खाङघाखे। पुनित हाङसा वाकोदोफा हिघाहि।

लुका 23:50

महासभाको सदस्‍यगेलाइता यहुदिया माउजाको अरिमाथिया पुरसो लोका एमि योसेफ मिङ हिका द्‍याङ हिघाखे। वा रेम्‍का रो इमानि द्‍याङ हिघाखे रो वा सादेलको सारभिहेङ र्‍हुम्‍तेङ हिघाखे। माहासभाको द्‍याङगेलाइ इसुहेङ सेअ्‌लि ठहर पालाउ वा बिरोध पाका हिघाखे।

युहन्‍ना 7:18

जाइ ताइकोङ पाहासो धुइखे, वा ताइकोङ मान भोखे, कालाउ बुङ जाइ ताइमिहेङ दिङगिल्‍काको मान भोखे, इङको सत एइ रो वाता जाल मान्‍थुखे।

साल्न्हाका चात्या 10:22

एम्‍बालाइ दोअ्‌हि, “काप्‍तान कर्नेलियस केलाइहेङ दिङगिल्‍का एइ। जाइ वा नोइका रो परमेस्‍वरदोफा थिका रो गोताङ यहुदि जात्‍यासो आदर निङका द्‍याङ एइ। नासेहेङ वाको साअ्‌ता काइगिल्‍तेङ नासो बानाल हिङलि दोअ्‌तेङ सादेलको काथा चुमाकासो वासेहेक हुकुम जेङका हि।”

साल्न्हाका चात्या 22:12

“इङको पुरता हननिया मिङ हिका एमि द्‍याङ हिघाखे। वा मोसाको पिका नियम मानेका धरम द्‍याङ हिघाखे रो दमस्‍कसता हिका यहुदिगेलाइ झाराङ वासेहेङ मानिघाखे।

साल्न्हाका चात्या 6:3

एन्‍साङ नेलाइको माझासो पुनित हाङसा, आकिलहोइ पोङघाका रो झाराङ मानेका न्‍हिअ्‌मि द्‍याङ साल्‍सु, जाइहेङ केलाइ इदोइ कामता भरना पाइने।

1 कोरिन्थि 4:5

इदोइभाअ्‌सिङ तोकेका पहरखान्‍तेङ लाम्‍फा हासुकोङ निया मापासु रो प्रभु लोपाधाउ र्‍हुम्‍सु। प्रभु दोङ कितिकितिकाता म्‍होअ्‌न्‍हाका गोताङ काथा फाइसालाम्‍काता चुमावा रो द्‌याङगेलाइको मनको काथागेलाइ तिङपाप्‍यावा। इङको पहरता झाराङ द्‍याङगेलाइको पाका कामको इनाम परमेस्‍वरसो निनावा।

गलाति 5:22

कालाउ पुनित हाङसाको आधिनता हिगिल्‍कालाइको ज्‍यानता इदोइ काथागेलाइ हिखे : माया पालि, लेङचालि, बेराजा पालि, साहेलि दो:लि, दाया पालि रो भालाइ पालि, भर परेका जेङलि,

फिलिप्पि 3:1

आखिरता दादाओने बाइओनेगेलाइ, प्रभुता लेङचासु। नेलाइहेङ इङकोङ काथागेलाइ घुरिघुरि लेखेतेङहिलि का माज्‍याह्‍वाखा। कालाउ इदोइसो ते नेलाइको खान्‍धुरहेङ सिन्‍हुपावा।

कलस्सि 4:5

इसुता खान्‍धुर मापाकालाइदोफा बेभार पालाउ आकिल थेम्‍पातेङ पासु। कालाउ नेलाइको निङका गोताङ माउकाहेङ एन्‍साङ माथाल्‍सु।

1 थेस्लोनिकि 4:12

एसा पासुन्‍हा पानु नेलाइहेङ बोजात्‍यागेलाइ बुङ मान पावा रो नेलाइहेङ हार्जा जेङलाउ बोमिदोफा भर परेलि मागोयावा।

1तिमोथि 2:2

कालाउ राजागेलाइ रो सारकारको द्‍याङगेलाइको भाअ्‌सिङ बुङ पुकार पासु। कोलाउ केलाइ दिनाङ सान्‍तिता हितेङ धरमाति रो मानको ज्‍यान सिन्‍हुलि द्‍वाइने।

1तिमोथि 3:11

एन्‍साङ पातेङ एम्‍बालाइको बेअ्‌गेलाइ बुङ बोमि द्‌याङगेलाइसो मान निङका हिलि गोयाङ रो एम्‍बालाइ बोमिको बारेता मारेम्‍का काथा मापाका हिलि गोयाङ, कालाउ ताइमिङहेङ आधिनता ताअ्‌तेङ गोताङ काथाता खान्‍धुरि लाएक हिलि गोयाङ।

1तिमोथि 3:4

इङको ताइको साअ्द्वार रेम्‍फा चालाइलि दोका रो ताइको चानचामिन्‍दिगेलाइहेङ मान पाका रो हुकुम साअ्‌का बान्‍हायाको।

1तिमोथि 4:12

ना धाना हिन्‍हा दोअ्तेङ हासुङ बुङ नासेहेङ हेपेलि माद्‌वाको। कालाउ खान्‍धुरिगेलाइको माझाता नाङको धुइकाकथन, चालचलन, दाया, खान्‍धुर रो पुनित जेङका काथाता ना एअ्‌ नामुना जेङलि दो।

1तिमोथि 5:10

रेम्‍का काम पातेङ इङकोको मिङ चारचाराइका हिलि गोयाङ। इङको ताइको चान चामिन्‍दिगेलाइहेङ रेम्‍फा पातेङ हुर्किपाका रो बान्‍सालाइहेङ ताइको साअ्‌ता चुमातेङ बान्‍साबुझाइका हिलि गोयाङ। कालाउ इङको परमेस्‍वरको पुनित जनगेलाइको खोकोइ झातेङ चाकर पाका, तु:ता वाङकालाइहेङ साघाइका रो इसिकाङ रेम्‍का कामगेलाइ पाका हिलिगोयाङ।

1तिमोथि 5:2

एन्‍साङ पातेङ बेराङगेलाइहेङ आमाइ भाइपाङ रो धानिगेलाइहेङ ओनेगेलाइ भाइपाङ पुनित मनहोइ बेभार पा।

तितस 1:8

इङको बान्‍सालाइहेङ मान पाका, रेम्‍का काम पालि मोन्‍दाताका, हुस ताअ्‌तेङ काम पाका, नियाइ, पुनित रो ताइमिङहेङ बसता ताअ्‌का हिलिगोयाङ।

तितस 2:14

इसु ख्रिस्‍ट केलाइहेङ गोताङ खालको कुकरमसो छुटकारा पिलिको भाअ्‌सिङ दोङ ताइको सास पिहि। वा केलाइहेङ पुनित पालि ताइको बान्‍हाइहि रो रेम्‍का काम पालिको भाअ्‌सिङ बोल्‍याका बान्‍हाइलि एसा पाहि।

तितस 2:2

वाराङ द्‍याङगेलाइहेङ ताइको मनहेङ आधिनता ताअ्‌का, इजत मान हिका, रेम्‍फा बिचार पाका, खान्‍धुरता बोल्‍याका, मायारो पाका रो गोताङ काथा सहेलि दोका हिलि गोयाङ दोअ्‌तेङ धिरपा।

तितस 2:7

ना दोङ गोताङ काथाता रेम्‍का कामको नामुना जेङतेङ एम्‍बालाइहेङ तिम्‍पा। ना धिरपालाउ इमानि जेङतेङ हेन्‍जाङ ल्‍हिका काथा धिरपा।

तितस 3:14

केलाइको द्‍याङगेलाइ बिथाता ज्‍यान थाल्‍लिमागोयाङ। एम्‍बालाइ रेम्‍का काम पातेङ हारजा परेका पहरता द्‍याङगेलाइहेङ साहेता पालि द्‍वाको।

याकुब 1:27

परमेस्‍वर आबाहेङ मोन्‍दाताका जातिङको काथा इदोङ एइः तु:ता वालाका राँदि रो माउर्‍या माउर्‍याइनिहेङ सामर्‍हाइलि रो दुनियाको मारेम्‍का काथासो खेङन्‍हालि एइ।

याकुब 3:17

कालाउ जेदोङ आकिल सादेलसो लोखे, इङको पुनित, सुका पिका, नोइका रो मिलिका हिखे। इसिका आकिल दायाहोइ पोङघाका हिखे रो इङको रेम्‍का कामको फल सेपाखे। कालाउ इदोइ पछेपात रो छल मापाका जेङखे।

1पतरुस 1:22

एला नेलाइ सतहेङ साअ्‍तेङ ताइको मन चोखाइका हिसुन्‍हा, कालाउ ताइको दादाओने बाइओनेगेलाइहेङ ताइमिहेङ भाइपाङ इन्‍ताना पासु रो एमि भेनेङहेङ कोन्‍धाङसोङ मान पासु।

1पतरुस 2:12

बोजात्‍यागेलाइको माझाता नेलाइको आनिबानि रेम्‍का ह्‍याको। एम्‍बालाइ नेलाइहेङ मारेम्‍का दोअ्‌तेङ दुसिलाउ नेलाइको रेम्‍का कामगेलाइ तिनाको। कालाउ परमेस्‍वर निया पालि लोलाउ वासेहेङ बाखिनाको।

1पतरुस 4:8

झाराङखान्‍तेङ बाराका काथाचाहिँ एमि भेनेङहेङ इन्‍ताना पासु, हाइदोनु इन्‍ताना दोङ हेन्‍जाङ कुकरमगेलाइहेङ थुम्‍खे।

२ पत्‍रुस 3:1

मोन्‍दाताकालाइ, नेलाइहेङ लेखेका इदोइ काङको न्‍हे चिथि एइ रो लाङ चिथि भाइपाङ इदोइ चिथिता बुङ नेलाइहेङ हेन्‍जाङ काथागेलाइको फोम पापातेङ हाउसाला पिका हिघा।

१ युहन्‍ना 3:18

काङको दायाका जामालाइ, केलाइ कथन रो नुइहोइ खिनिङ माया मापाइने। कालाउ काम रो सतहोइ माया पाइने।

१ युहन्‍ना 3:3

ख्रिस्‍ट पुनित हि रो वार्‍हुता आस ताअ्‌का झाराङ ताइमिहेङ पुनित ताअ्‌ताको।

१ युहन्‍ना 4:1

मोन्‍दाताकालाइ, ताइमिदोफा पुनित हाङसा हि दोअ्‌तेङ धुइकालाइहेङ खान्‍धुर मापासु, कालाउ नेलाइदोफा परमेस्‍वरको हाङसा एइ ना माको जाचेतेङ खाङसु। हाइदोनु हेन्‍जाङ असत आगाधुइकालाइ बुङ जेसोकोसोङ हानेका हि।