याकुब 3:13 - धिमाल

¹³ नेलाइको माझाता हासुङ आकिलहिका रो बुझाकि द्‌याङ हि पानु वा ताइको ज्‍यानता नोइतेङ द्‌याङगेलाइको माझाता रेम्‍का काम पातेङ तिम्‍पाको।

Dhimal NT

¹³ नेलाइ मध्येसो बुद्दिमान कालाउ ग्यानि द्‍याङ हासु हि? जेसापा नेलाइ बुद्दिमानि कालाउ ग्यानि हिसुना पानु मोनोइ दोफा रेम्का कामगेलाइ पातेङ तिङपासु।

याकुब 3:13 Iomraidhean Croise

मत्‍ति 11:29

काङको जुङगेले फासु रो कासो धिरसु, हाइदोनु का नोइका रो काङको कोन्‍धाङ नोम्‍का हि, कालाउ नेलाइ ताइको आत्‍माता माइसालि निङस्‍वाना।

मत्‍ति 21:5

“सियोनको द्‍याङगेलाइहेङ दोअ्‌सु, खाङसु, नेलाइको राजा नेलाइकोता लोदोङखे, वा नोइका जेङतेङ गाधाता, गाधाको चानर्‍हुता दोङ धोल्‍तेङ लोदोङखे।”

मत्‍ति 5:5

नोइकालाइ सहसाम्‍पा निङकालाइ ज्‍यावा, हाइदोनु सुमिङता हिका गोताङ चिज एम्‍बालाइकोङ ज्‍यावा।

मत्‍ति 7:24

“इदोइखातिर काङको कथनगेलाइ हिङका रो मानिका द्‍याङहेङ चाहिँ ताइको साअ्‍ रेम्‍का थामेता बान्‍हाइका एमि आकिल हिका द्‍याङदोफा दाज्‍याङका।

1 कोरिन्थि 6:5

का नेलाइहेङ लेदेरता परेपालिको भाअ्‌सिङ इदोइ काथा दोअ्‌का एइ। हाइ नेलाइको ताइको दादाओने माझाता झागारा मिलिपालि दोका एअ्‌मि बुङ आकिल हिका द्‌याङ मान्‍थु?

गलाति 5:23

नोइका जेङलि रो ताइमिहेङ आधिनता ताअ्‌लि दोङ एइ। कालाउ इसिका काथागेलाइको खिलापता हिदिङ नियम दोङ मान्‍थु।

गलाति 6:1

दादाओने बाइओनेगेलाइ, एदि हासुङ कुकरमको जालेता परेहि पानु नेलाइ पुनित हाङसाको आधिनता चलिकालाइ नोइका जेङतेङ इङकोहेङ सुधिर पासु। इदोइता ताइमिङ बुङ मारेम्‍का कामता मावालाताइने दोअ्‌तेङ हुस पासु। माकोनु ते नेलाइ बुङ कुकरमता वालालि दोस्‍वाना।

गलाति 6:4

नेलाइ झाराङ ताइमिङको पाका काम बोमिको पाका कामदोफा मादाज्‍याको। कालाउ ताइको काम ताइमिङ जाच्‍याको रो रेम्‍का हि पानु इङको तुजुक पाको।

फिलिप्पि 1:27

मुल काथाचाहिँ इदोङ दोङ एइ, ख्रिस्‍टको रेम्‍काबानालहेङ सोबाइका नेलाइको आनिबानि ज्‍याको। कालाउ का नेलाइहेङ दुसुलाउ बुङ, मादुसुलाउ बुङ नेलाइ एलोङदोङ बिचारहोइ थिर जेङतेङ एलोङदोङ लाल्‍साहोइ हेन्‍जाङ द्‌याङगेलाइ रेम्‍काबानालहेङ खान्‍धुर पाको दोअ्‌तेङ भेम्‍ति ह्‍याअ्‌पातेङ काम पादोङसुखेना दोअ्‌का का हिङलि निनाको।

कलस्सि 3:12

इदोइखातिर परमेस्‍वर माया पातेङ नेलाइहेङ साल्‍हि रो पुनित जनगेलाइ बान्‍हाइहि। कालाउ नेलाइ तु:ता परेकालाउहेङ साघाइसु, दाया माया पासु, सोझाका जेङसु, नोइका रो धिर जेङसु।

1तिमोथि 4:12

ना धाना हिन्‍हा दोअ्तेङ हासुङ बुङ नासेहेङ हेपेलि माद्‌वाको। कालाउ खान्‍धुरिगेलाइको माझाता नाङको धुइकाकथन, चालचलन, दाया, खान्‍धुर रो पुनित जेङका काथाता ना एअ्‌ नामुना जेङलि दो।

1तिमोथि 6:11

कालाउबुङ ना परमेस्‍वरको चाकर, इदोइ गोताङ मारेम्‍का काथागेलाइसो फारापाङ हि। ना परमेस्‍वरको आगा उचित ठर्‍हाइन्‍हाका काथाता, चाकरता, खान्‍धुरता, दायाता, धिरताता, नोइका जेङका काथाता ताइको मन लागाइ।

2 तिमोथि 2:25

इङको बिरोधिगेलाइहेङ नोइका जेङतेङ साम्‍झाइलि दोका हिलिगोयाङ। एन्‍सा जेङहि पानु खिनिङ परमेस्‍वर बाइरिगेलाइको मन फेरेपिलि द्‌वावा रो एम्‍बालाइ सतहेङ नालावा।

तितस 3:2

एम्‍बालाइ हासुङको खिलाप मापाको, गालबाजिसो फारापा ह्‍याको, नोइका ज्‍याको रो झाराङ द्‍याङगेलाइदोफा रेम्‍का बेभार तिङपाको।

याकुब 1:21

इदोइभाअ्‌सिङ गोताङ इसिका मारेम्‍का आनिबानि रो दिगमिगजेङका बानिसो फारापा हिसु। नोइका जेङतेङ नेलाइको कोन्‍धाङता ताअ्‌का परमेस्‍वरको कथनको दोअ्‍का भाइपा पासु। हाइदोनु नेलाइहेङ जोगाइका ते इङकोङ एइ।

याकुब 2:18

कालाउ आधेमि दोअ्‌तावा, “नादोसा खान्‍धुर हि, कादोसा कामगेलाइ हि।” काममाकोसिङको नाङको खान्‍धुर कासेहेङ तिम्‍पा, कालाउ काङको पाका कामसो का ताइको खान्‍धुर नासेहेङ तिम्‍पाङका।

याकुब 3:1

काङको मोन्‍दाताका दादाओने बाइओनेगेलाइ, नेलाइता झाराङ हेन्‍जाङ द्‌याङगेलाइ मास्‍टर जेङलि माभोसु। हाइपानु केलाइ मास्‍टर जेङकालाइको निया हेन्‍जाङ बाराका ज्‍याङ दोअ्‌तेङ नेलाइ गेसुखेना।

याकुब 3:17

कालाउ जेदोङ आकिल सादेलसो लोखे, इङको पुनित, सुका पिका, नोइका रो मिलिका हिखे। इसिका आकिल दायाहोइ पोङघाका हिखे रो इङको रेम्‍का कामको फल सेपाखे। कालाउ इदोइ पछेपात रो छल मापाका जेङखे।

1पतरुस 1:15

कालाउ नेलाइहेङ काइका परमेस्‍वर पुनित हिका भाइपाङ नेलाइ बुङ गोताङ काथाता पुनित जेङसु।

1पतरुस 2:12

बोजात्‍यागेलाइको माझाता नेलाइको आनिबानि रेम्‍का ह्‍याको। एम्‍बालाइ नेलाइहेङ मारेम्‍का दोअ्‌तेङ दुसिलाउ नेलाइको रेम्‍का कामगेलाइ तिनाको। कालाउ परमेस्‍वर निया पालि लोलाउ वासेहेङ बाखिनाको।

1पतरुस 2:9

कालाउ बुङ नेलाइ ते परमेस्‍वर साल्‍का खालगेलाइ, राजाको धामिगेलाइ, पुनित जात्‍यागेलाइ, परमेस्‍वरको ताइकोङ राइतिगेलाइ एइ। वा नेलाइहेङ कितिकितिकासो वाको भारभुसाइका फासालाम्‍काता चुमाहि। कालाउ नेलाइ वाको भारभुसाइका कामगेलाइ पारचार पालि दोसु।

1पतरुस 3:4

कालाउ नेलाइको रेम्‍काचाहिँ मन लिअ्‌ताङ ह्‍याको, जेदोङ हेअ्‌लाउ बुङ माचुअ्‌का, नोइका रो सिपापा हाङसाको रेम्‍का एइ। कालाउ इङको चाहिँ परमेस्‍वरको आगाता हेन्‍जाङ मोलको हि।