गलाति 1:4 - धिमाल

⁴ केलाइको परमेस्‍वर आबाको लाल्‍साआन्‍सार इदोइ एलाको दुरजन दुनियासो केलाइहेङ छुटकारा पिलि प्रभु इसु ख्रिस्‍ट ताइमिङहेङ केलाइको कुकरमको भाअ्‌सिङ ताइको ज्‍यान भोक पिहि।

Dhimal NT

⁴ केलाइको परमेस्वर कालाउ आबाको इच्छा आन्सार येसु ख्रिस्ट केलाइको पापको भाअ्सिङ ताइमिहेङ बलि पिहि, कालाउकि केलाइहेङ इदोइ सुमिङको मारेम्का कामगेलाइसो लाअ्पाको।

गलाति 1:4 Iomraidhean Croise

मत्‍ति 13:22

आरोङ हेअ्‌मि द्‍याङको कोन्‍धाङचाहिँ चुइको झालास्‍ता बिअ्‌न्‍हाका चालाइभाइकाङ एइ। एम्‍बालाइ परमेस्‍वरको कथन हिङतेङ बुङ दुनियाको पिर रो टाका काउरिको लाल्‍साता फासिखे। एन्‍साङ एम्‍बालाइको हिङका कथनगेलाइ राम्‍तेङ हानिखे रो ताइको ज्‍यानता हिदिङ बुङ फल मासेपाखे।

मत्‍ति 20:28

जेसापा का द्‍याङको चान सेवा निङलि माको, कालाउ बुङ बोमिको सेवा पालि रो हेन्‍जाङहेङ लाअ्‌पाकाको मोल चुकाइतेङ ताइको बायु पिलि लोघा।”

मत्‍ति 26:28

हाइदोनु इदोइ नावा केराको काङको हिति, जाइ हेन्‍जाङको कुकरमको फतुर माअ्‌पालिको भाअ्‌सिङ झोपावा।

मत्‍ति 26:42

इसु आरोङ हानितेङ पुकार पालि तेङहि, “काङको आबा, का इदोइ तु:को बाति माआम्‍सा माज्‍याङ पानु, नाङकोङ लाल्‍सा पाका भाइपाङ ज्‍याको।”

मत्‍ति 6:9

कालाउ बुङ नेलाइचाहिँ एसापा पुकार पासु: हे सादेलता हिका केलाइको आबा, नाङको मिङ पुनित ज्‍याको।

मर्कुस 10:45

हाइपानु का द्‍याङको चान सेवा निङलि माको, कालाउ बुङ सेवा पालि रो हेन्‍जाङहेङ लाअ्‍पालि भाअ्‌सिङ ताइको बायु पिलि लोका एइ।”

लुका 22:19

इङकोन्‍हुअ्‌सो इसु तोले र्‍हुतेङ परमेस्‍वरहेङ च्‍याबास पितेङ वासेहेङ पेङहि रो चात्‍यागेलाइहेङ पितेङ दोअ्‌हि, “नेलाइहेङ पिका इदोइ काङको जिउ। एलासोउसो काङको फोमपालिको भाअ्‌सिङ एसापा दोङ चासु।”

लुका 22:42

वा दोअ्‌हि, “आबा, नाङको लाल्‍सा हिनु इदोइ पिरको बाति काङकोसो लाअ्‌पापि। कालाउ काङको लाल्‍सा माको, नाङको लाल्‍सा पुरा ज्‍याको।”

युहन्‍ना 10:11

“का रेम्‍का घोका एइ। रेम्‍का घोका ताइको भेरागेलाइको भाअ्‌सिङ ताइको बायु चार्‍हाइखे।

युहन्‍ना 12:31

एला इदोइ दुनियाको निया ज्‍याङ। इदोइ दुनियाको राजपाका बाहार थालन्‍हावा।

युहन्‍ना 5:30

“का ताइमिङ हाइदोङ पालि मादोखा। जिसिका का हिङखा, इन्‍सिकाङ निया का पाखा रो काङको निसाप मुनासिप जेङखे, हाइपानु का ताइको लाल्‍सा माभोखा, कुलाउ कासेहेङ दिङगिल्‍काको लाल्‍सा भोखा।

युहन्‍ना 6:38

ताइको लाल्‍सा पोङघा पालि का सादेलसो लोका माको, कुलाउ कासेहेङ दिङगिल्‍काको लाल्‍सा पोङघा पालि लोका एइ।

1 कोरिन्थि 15:3

हाइदोनु काङको निङका रेम्‍काबानालको मुल काथा दोङ नेलाइहेङ सोङपिघा। जेदोङ मुल काथा, पुनित धरमकिताबआन्‍सार ख्रिस्‍ट केलाइको कुकरमको भाअ्‌सिङ सिहि।

गलाति 2:20

का ख्रिस्‍टदोफाङ काङको ज्‍यानको पुरुना आनिबानि कुरुसताङ टाङगाइका हिघा। एलासो ओसो सिन्‍हुका का माको, कालाउ ख्रिस्‍ट काता सिन्‍हुतावा। जेदोङ ज्‍यान जिउता का एला सिन्‍हुताङका, इङको परमेस्‍वरको चानता खान्‍धुर पातेङ सिन्‍हुताङका। हाइपानु जाइ कासेहेङ माया पाहि रो काङको भाअ्‌सिङ ताइमिहेङ क्रुसता चार्‍हाइहि।

गलाति 6:14

कालाउ काचाहिँ बो काथाता माको, इसु ख्रिस्‍टको कुरुसता खिनिङ तुजुक पाखा। हाइदोनु वाको कुरुससो पातेङ काङको भाअ्‌सिङ दुनियाको लाभ रो लाल्‍सागेलाइ सिका हि रो का दुनियाको भाअ्‌सिङ सिका हिघा।

फिलिप्पि 4:20

एला केलाइको परमेस्‍वर आबाको प्रताप दिना दिनाङ जेङतेङह्‍याको। आमेन।

1 थेस्लोनिकि 1:3

केलाइको परमेस्‍वर आबाको आगाता नेलाइको खान्‍धुरसो पाका काम रो मायाहोइ पाका मिनेत कालाउ केलाइको प्रभु इसु ख्रिस्‍टता ताअ्‌का आसता तु: साहेका केलाइ दिनाङ फोमपातेङ हिन्‍हाखे।

1 थेस्लोनिकि 3:11

एला केलाइको परमेस्‍वर आबा ताइमिङ रो केलाइको प्रभु इसु नेलाइकोता लोका केलाइको दामा हेप्‍याको।

1 थेस्लोनिकि 3:13

एसापा वाको झाराङ पुनित जनगेलाइदोफा केलाइको प्रभु इसु ख्रिस्‍ट आरोङ लोलाउ वा केलाइको परमेस्‍वर आबाको आगाता नेलाइको कोन्‍धाङहेङ पुनित रो दुसमान्‍थुका बान्‍हाइयाको।

2 थेस्लोनिकि 2:16

केलाइको प्रभु इसु ख्रिस्‍ट रो परमेस्‍वर आबा केलाइहेङ माया पाहि। कालाउ वाको निगाहासो हेअ्‌लाउ मादोका हाउसा रो रेम्‍का आस प्‍याको।

1तिमोथि 2:6

झाराङ द्‍याङगेलाइहेङ सिन्‍हुपालि वा भोक जेङहि। परमेस्‍वर झाराङ द्‌याङ सिन्‍हुका लाल्‍सापाखे दोअ्‌का काथाको दासि इदोइ दोङ।

तितस 2:14

इसु ख्रिस्‍ट केलाइहेङ गोताङ खालको कुकरमसो छुटकारा पिलिको भाअ्‌सिङ दोङ ताइको सास पिहि। वा केलाइहेङ पुनित पालि ताइको बान्‍हाइहि रो रेम्‍का काम पालिको भाअ्‌सिङ बोल्‍याका बान्‍हाइलि एसा पाहि।

याकुब 4:4

ओइ बेबिचार पाकालाइ, जाइ दुनियाहेङ माया पाखे वा परमेस्‍वरको बाइरि जेङखे दोअ्‌तेङ हाइ नेलाइ मागेसुखेना? हाइदोनु जाइ दुनियादोफा सानाइति जेङलि भोखे इङको ताइमिहेङ परमेस्‍वरको दुस्‍मन बान्‍हाइखे।

1पतरुस 2:24

केलाइ कुकरमको भाअ्‌सिङ सितेङ धरमातिको भाअ्‌सिङ बानच्‍याइने दोअ्‌तेङ ख्रिस्‍ट ताइमिङ केलाइको कुकरम फातेङ कुरुसता सिहि। एन्‍साङ पातेङ वाकोङ पेचारासो नेलाइ एल्‍का हिसुन्‍हा।

1पतरुस 3:18

हाइदोनु केलाइहेङ परमेस्‍वरकोता थुकापालिको भाअ्‌सिङ ख्रिस्‍ट धरमाति हिलाउबुङ अधरमातिगेलाइको कुकरमको भाअ्‌सिङ ए खे सिहि। वा जिउता सिहि कालाउ बुङ परमेस्‍वर वासेहेङ हाङसाको सरबङसो सिन्‍हुपाहि।

१ युहन्‍ना 2:2

वा केलाइको कुकरम माअ्‌पालिको भाअ्‌सिङ खिनिङ माको, कालाउ दुनियाको गोताङ द्‍याङगेलाइको कुकरम माअ्‌पालि भाअ्‌सिङ ताइमिङ भोक हि।

१ युहन्‍ना 3:16

माया हाइ एइ दोअ्‌तेङ केलाइ इताङसो गेन्‍हाखे, ख्रिस्‍ट केलाइको भाअ्‌सिङ ताइको ज्‍यान पिहि। केलाइ बुङ ताइको दादाओने बाइओनेगेलाइको भाअ्‌सिङ ताइको ज्‍यान पिलिगोयाङ।