1तिमोथि 3:2 - धिमाल

² इसिका आगुवाचाहिँ हिदिङ दुसमान्‍थुका रो इङकोको बेअ् एलोङ खिनिङ हिलिगोयाङ। इङको ताइमिङहेङ रो ताइको मनहेङ बसता ताअ्‌लि दोका कालाउ रेम्‍का चालचलनको हिलिगोयाङ। इङको बान्‍साबुझाइका रो बोमिहेङ रेम्‍फा बिद्‌या पिका हिलिगोयाङ।

Dhimal NT

² ओदोङ भाअ्सिङ इदोइ आव्यस्यक हि, कि आगुवागेलाइ चाहि दुसिका मान्थुका हिलि गोइखे। वाको एमि खिनिङ बे ह्याको। ताइमिहेङ काबुता ताअ्लि दोका, साम्मान निङका, समझदार, कालाउ ताइको साअ्ता लोकालाइहेङ सेवा सात्कार पाका कालाउ परमेस्वरको बचन रेम्फासो धिरपाका द्‍याङ हिलि गोइखे।

1तिमोथि 3:2 Iomraidhean Croise

लुका 1:6

इङको न्‍हेमि परमेस्‍वरको आगाता धरम हिघाखे। एम्‍बालाइ परमेस्‍वरको गोताङ हुकुम रो नियमगेलाइ माबिराइसिङ मानिघाखे।

लुका 2:36

थानता हन्‍ना दोअ्‌का एमि बेराङ आगाधुइका हिघाखे। वा आसेर खालको फनुएलको चामिन्‍दि हिघाखे। बिहु जेङका न्‍हिअ् बाअ्‌सारन्‍हुसो दोङ वा रान्‍दि जेङका हिघाखे।

फिलिप्पि 2:15

एसा पासुन्‍हा पानु नेलाइ कुकरमि रो दुनियाको आखेका द्‌याङगेलाइको माझाता परमेस्‍वरको हाइदोङ दुस मान्‍थुका जामाल भाइपाङ पुनित जेङस्‍वाना। कालाउ आदेलता फुरुगेलाइ चिल्‍काका भाइपाङ नेलाइ बुङ रेम्‍का काम पातेङ एम्‍बालाइको माझाता चिल्‍कास्‍वाना।

1तिमोथि 3:12

मन्‍डलिको डिकनको बुङ एलोङ खिनिङ बेअ् हिलिगोयाङ। एम्‍बालाइ ताइको चानचामिन्‍दि रो साअ्‌द्वार रेम्‍फा मिलिपातेङ ताअ्‌लि दोका ह्‍याको।

1तिमोथि 3:8

एन्‍साङ पातेङ मन्‍डलिता चाकरपाकालाइ मान निङका रो जातिङको धुइका हिलि गोयाङ। इन्‍सिकालाइ हेन्‍जाङ माम्‍हाका रो मारेम्‍का काम पातेङ टाका काउरि काम्‍हाइलि भोका द्‌याङ हिलि माएल।

1तिमोथि 4:3

एबालाइ बिहुपालि माएलाङ रो हेथे थोकचाहिँ चालिमाएलाङ दोअ्‌तेङ द्‍याङगेलाइहेङ धिरपाखे। कालाउ खान्‍धुर पाका रो सतहेङ नाल्‍कालाइ च्‍याबास चार्‍हाइतेङ इदोइ चाका थोकगेलाइ चालिएल्‍खे। हाइदोनु इदोङ गोताङ थोकगेलाइ परमेस्‍वर दोङ सिरजाइका।

1तिमोथि 5:10

रेम्‍का काम पातेङ इङकोको मिङ चारचाराइका हिलि गोयाङ। इङको ताइको चान चामिन्‍दिगेलाइहेङ रेम्‍फा पातेङ हुर्किपाका रो बान्‍सालाइहेङ ताइको साअ्‌ता चुमातेङ बान्‍साबुझाइका हिलि गोयाङ। कालाउ इङको परमेस्‍वरको पुनित जनगेलाइको खोकोइ झातेङ चाकर पाका, तु:ता वाङकालाइहेङ साघाइका रो इसिकाङ रेम्‍का कामगेलाइ पाका हिलिगोयाङ।

1तिमोथि 5:22

हातार पातेङ हासुहेङ मन्‍डलिको आगुवा माबान्‍हाइ। बो द्‌याङगेलाइको कुकरमता भाग मार्‍हु रो ताइको ज्‍यान सुदो ताअ्।

1तिमोथि 5:9

सुमकुरि बाअ्‌सार बोइसा माजेङका बेबालहेङ रान्‍दि बहिता इङकोको मिङ दारता मापासु। इङकोता बुङ इङको एलोङ खिनिङ वाबालदोफा बिहु पाका हिलिगोयाङ।

2 तिमोथि 2:24

प्रभुको चाकर चेरसुलि माएल। इङको झाराङदोफा मिलिका हिलिगोयाङ कालाउ बिद्‍या धिरपालि दोका रो गोताङ काथा सहेलि दोका जेङलिगोयाङ।

तितस 2:2

वाराङ द्‍याङगेलाइहेङ ताइको मनहेङ आधिनता ताअ्‌का, इजत मान हिका, रेम्‍फा बिचार पाका, खान्‍धुरता बोल्‍याका, मायारो पाका रो गोताङ काथा सहेलि दोका हिलि गोयाङ दोअ्‌तेङ धिरपा।

1पतरुस 4:7

गोताङ काथागेलाइको आखिर जेङलिङ तोम्‍का हि। इदोइखातिर नेलाइ ताइको मनहेङ आधिता ताअ्‌सु रो हुसपातेङ पुकार पासु।

1पतरुस 4:9

ताइको साअ्‌ता लोकालाइहेङ लेङचातेङ बान्‍साबुझाइसु।

1पतरुस 5:8

हुस ताअ्‌सु रो चानाखा जेङसु। हाइदोनु नेलाइको दुस्‍मन दियाबलस डिकिरिम्‍का झाबिरिभाइपाङ हासुहेङ निनाङका रो चाङका दोअ्‌तेङ दाउ खान्‍तेङ घुराइगिल्‍दोङखे।