Zozue 8:31 - A SƐB-SÕW

³¹ Ʋ tɩ mɛ ʋ na mɛ̃ a lɛ a Moyiir, a Sore tõ-tõ-bie, na tɩ wul a Ɩsɩrayɛl nɩbɛ, a tu a lɛ na sɛb a Moyiir wulu sɛbɛ pʋɔ a: kʋsɛ-gbawlɛ kure tõ-tõ-bom za na bɛ tɔ a bàwr-maal-kuur. Bɛ tɩ maal'ɩ nyɩw-a-za-bagɛ nɩ ƴã-ɓaarʋ bagɛ a ʋ zu.

Zozue 8:31 Iomraidhean Croise

2 Na-mɩnɛ 14:6

Ɛcɛ ʋ bɛ tɩ ƴãw bɛ kʋ a nɩ-kʋrbɛ bɛ ŋa bidɛbr ɛ, k'ʋʋ tʋ̃ɔ́ tu a lɛ na sɛb a Moyiir wulu sɛbɛ pʋɔ a. Bʋ̃ʋ n'ʋ vɛ̃, a Sore yel'ɩ à ŋá a be: «Bɛ bɛ kʋrɛ a sãà mɩnɛ a bɛ bibiir yel-bebe ƴãw ɛ, bɛ bɛ kʋrɛ a bibiir a bɛ sãà mɩnɛ yel-bebe ƴãw ɛ, nɩsaal za yel-bebe ƴãw n'a bɛ na mɩ́ kʋ ʋ.»

2 Na-mɩnɛ 22:8

Lɛ n'a a bàwr-maal-kara Hɩlkɩahu tɩ yel a sɛ-sɛbrɛ Safan: «Ɩ̃ nyɛ̃ nɩ a wulu sɛbɛ a Ŋmɩn-yir-kpɛ̃ɛ pʋɔ.» Ʋ tɩ kʋ̀ n a sɛbɛ a Safan ʋ kanɩ.

2 Bibie za yel-manɩ 25:4

Ɛcɛ ʋ tɩ jɩɩr'ɩ a bɛ bidɛbr bɛr, k'ʋʋ tu a lɛ na sɛb a Wulu sɛbɛ pʋɔ, a Moyiir sɛbɛ pʋɔ a. A be a, a Sore ƴãw nɩ a nʋɔr ŋa: «Bɛ bɛ kʋrɛ sãà mɩnɛ a bɛ bibiir yel-bebe ƴãw ɛ, bɛ bɛ kʋrɛ bibiir a bɛ sãà mɩnɛ yel-bebe ƴãw ɛ. Nɩsaal za yel-bebe ƴãw n'a bɛ na mɩ́ kʋ ʋ.»

2 Bibie za yel-manɩ 35:12

A lɛ a Ɩsɩrayɛl dɔwlʋ nɩbɛ na põ põ a, lɛ n'a bɛ tɩ ír a dʋn a mɩnɛ bɛr, báa zuo a za a nadɛɛ a nyɩw-a-za-bagɛ ƴãw, mɛ̃ a lɛ na sɛb a Moyiir sɛbɛ pʋɔ a.

Ɛsɩdɩrasɩ 6:18

Bɛ tɩ põ nɩ a bàwr-maalbɛ nɩ a levitɩ mɩnɛ palɛ palɛ, a Naaŋmɩn na be a Zerizalɛm a tome tob ƴãw, mɛ̃ a lɛ bɛ na sɛb a Moyiir sɛbɛ pʋɔ a.

Neemi 13:1

A lɛn daar, bɛ tɩ kanɛ nɩ a Moyiir sɛbɛ kʋ̀rɛ a nɩbɛ za, tɩ ta zie kãw bɛ na sɛb k'aa Amɔ̃ tẽw dem nɩ a Mowab tẽw dem bɛ be za na kpɛ a bɛlɩ dem na puore a Naaŋmɩn a lãw pʋɔ ɩ.

Eziptɩ tẽw yib 18:12

A Moyiir dɩɛm-sãà Zetoro tɩ maal'ɩ nyɩw-a-za-bàwr nɩ lãw-taa bagɛ kʋ̀ a Naaŋmɩn. A Aarɔ̃ nɩ a Ɩsɩrayɛl nɩ-kore tɩ wa na wa lãw nɩ a Moyiir dɩɛm-sãà dɩ a bàwr-maal-bʋ̃-dɩrɩ a Naaŋmɩn niŋé.

Eziptɩ tẽw yib 24:5

Ʋ tɩ ƴãw na a Ɩsɩrayɛl nɩbɛ pɔlbili bɛ mɩnɛ maalɩ nyɩw-a-za-bagɛ kʋ̀ a Sore, ɛ́ kʋ nadɛɛ maal'ɩ lãw-taa bagɛ kʋ̀ ʋ.

Matie 12:26

A na ɩ lɛ a, Sɩtaana wa diwr Sɩtaana a, ʋ bʋ́r'a lɛb ŋmɛlɩ zɛbr'ɩ ʋ tʋɔra. Ŋmɩŋmɩn n'a a ʋ naalʋ-tẽw na tʋ̃ɔ́ àr?

Wulu-ayi-sob 27:2

A ʋlɩ bibir nyɩ na na gãw a Zurdɛ̃ man kɛ́ nyɩ kpɛ a tẽw a Sore nyɩ Naaŋmɩn na kʋ̀rɛ nyɩ a pʋɔ a, nyɩ na de nɩ kʋsɛ-bɛrɛ bin teli, ɛ́ bʋl a nɩ gʋɔr-pla.

Wulu-ayi-sob 27:8

Nyɩ na sɛb'ɩ a Naaŋmɩn wulu nɛ-ƴãwnɩ za ƴãw a kʋsɛbɛ nyɩ na bin teli a zu, ɛ́ a sɛbrʋ nyɛrɛ vla.»

Zozue 1:8

A wulu sɛbɛ ŋa ƴɛ̀r-bie kʋ̃ yi zaa a fʋ nʋɔrɩ́ ɛ. Tɛr a tɩ́ɛrɛ mʋ̃tɔ̃w nɩ tɩ̃ɩsɔw za, kɛ́ fʋ tʋ̃ɔ́ ƴãw fãw ɩrɛ mɛ̃ a lɛ na sɛb a wulu sɛbɛ pʋɔ a, lɛ n'a a fʋ yele za na mɩ́ tu vla vla za.