Zozue 15:7 - A SƐB-SÕW

⁷ Ʋ tɩ cãà na tu Akɔɔr fʋɔla do Deviir, ɛ́ a saa-pɛrɩ́-gʋba-lowr nidaa za, ʋ lɩɛbɩ tu Gilgal lowr na tori a Adumim dob zie na be a fʋɔla saa-pɛrɩ́-dʋrʋ-lowr a. Ʋ tɩ tɔl a pɩɛlɩ Ɛɩn-Semɛsɩ bul-nɛ́ɛ, ɛ́ tɩ nyɔw Ɛɩn-Orogɛl.

Zozue 15:7 Iomraidhean Croise

2 Samɩɛl 17:17

A Zonatã nɩ a Ahimaasɩ tɩ àr'ɩ a Ɛɩn-Orogɛl. Tõ-tõ-bi-pɔwle kãw nãá tɩ cen na tɩ yel yel kʋ̀ bɛ, ɛ̀ bɛ mɩ̀ cen tɩ yel kʋ̀ a nãà Daviir. Bʋ̃ʋ n'ʋ vɛ̃, a bɛ tɩ tɛr kɛ́ bɛ kpɛ a tẽw pʋɔ, nɩr wa mab nyɛ̃ bɛ ɩ.

1 Na-mɩnɛ 1:9

Bibir kãw, a Adonɩasɩ tɩ maal'ɩ cuw-kpɛ̃ɛ a “Kʋsɩɛr-na-salɛ-a” na pɩɛlɩ a Ɛɩn-Orogɛl a pɛr. Ʋ tɩ kʋ n píir, nadɛɛ nɩ nadeli-'wɔɛ a be maal'ɩ bàwr. Ʋ tɩ bʋɔl'ɩ a ʋ yɛbr na ɩ a nãà Daviir bidɛbr a, nɩ a Zuda nɩbɛ bɛl za na tone a nãà tome a,

Ɩzayi 65:10

A Saron tɩ̃tal na lɩɛb'ɩ píir àrʋ zie, ɛ́ a Akɔɔr fʋɔla lɩɛbɩ nadʋʋra a ɩ̃ nɩbɛ na na bɔ m a ƴãw.

A naaŋmɩn-ƴèr-manɛ Oze sɛbɛ 2:5

Alɛ bɛ ɩ lɛ, ɩ̃ na yàa nɩ a ʋ bʋ̃-suuri ɛ́ bɛr ʋ ƴã-gã-kpãkpol, ɩ̃ na ɩ na ʋ ŋmɛ̃ mɛ̃ a ʋ dɔwfʋ bibir a! Ɩ̃ na ɩ na ʋ ŋmɛ̃ taa nɩ a wɛja-kpalɛ, ɩ̃ na ɩ na ʋ lɩɛbɩ tẽsɔw-kõw, ɩ̃ na ɩ na ʋ kpi n kʋ̃ɔ-nyúur.»

Zozue 10:43

Al pùorí, a Zozue nɩ a Ɩsɩrayɛl nɩbɛ za tɩ lɛb'a cen a laɩ pʋɔ a Gilgal.

Zozue 15:15

Ʋ tɩ yi n a be ɛ́ cen tɩ zɛb'ɩ a Deviir tẽw dem, a Deviir tɩ dãw na dɩ kɛ́ Kɩrɩyatɩ-Sefɛɛr.

Zozue 15:6

Al pùorí, a tʋr-bɔw tɩ lɛb'a do Bɛtɩ-Hogɩla, tɔl a Bɛtɩ-Araba saa-pɛrɩ́-gʋba-lowr, ɛ́ cãà cow tɩ ta a Urubɛn bidɛb, Bohan, Kʋsɩɛr ƴãw.

Zozue 18:17

A be a, ʋ tɩ lɩɛb'ɩ a saa-pɛrɩ́-gʋba-lowr, tu a Ɛɩn-Semɛsɩ lowr, nɩ a Gelilɔtɩ na tori a Adumim dob zie a. Ʋ tɩ yi n a be, ɛ́ siw a Urubɛn bidɛb, Bohan, Kʋsɩɛr ƴãw.

Zozue 4:19

A cuw dãw-niwn sob bibie pie sob'a a Ɩsɩrayɛl nɩbɛ tɩ gãw a Zurdɛ̃. Bɛ tɩ maal'ɩ a bɛ laɩ Gilgal, a Zeriko saa-pɛrɩ́.

Zozue 7:24

A Zozue nɩ a Ɩsɩrayɛl nɩbɛ za tɩ tɛr'ɩ a Akan cen nɩ a Akɔɔr bà-fʋɔla pʋɔ. Bɛ tɩ tɛr ʋ na lãwnɩ a salm-pla, a kpar-kpɛ̃ɛ, a salm-zɩɛ gbil, nɩ a ʋ bidɛbr nɩ a ʋ pɔwyaar, a ʋ nĩi, a ʋ bòn, a ʋ bʋʋr nɩ a ʋ píir, a ʋ pɛn-sɛw nɩ bom za ʋ na so a.

Zozue 7:26

Bɛ tɩ wob'ɩ kʋsɛbɛ gbõ pàw ʋ, a cãà na nɩ dɩ̃a. Alɛ so a zie nɛ yúor dɩ kɛ́ Akɔɔr bà-fʋɔla wa tɩ tɔ a dɩ̃a. Lɛ n'a a Sore suur tɩ ɓãá.