3 Sɩza, mãa yõ zu n'a a ʋ nũu siwr a bibie za.
Ɩ̃ bɛ tɩ bãw damnʋ ɛ, ʋʋ wa dam mɛ̃, ʋ nyɔw mɛ̃ nɩ kpalimí zɛw lɔb'ɩ tẽw, ʋ jɩɛrɛ mɛ̃ na,
Nɩbaalʋ, nɩbaalʋ wɛ, ɩ̃ bárɩ i! Naaŋmɩn n'ʋ ŋmɛ m.
Mãa wa vɛlɩ nũu cɔw bi-kpieb ɩ̃ na bãw kɛ́ bɛ na kpɛ m'ɩ a ƴɛ̀rʋ zie a,
Bʋ̃ʋ n'ʋ vɛ̃, a Kpɛnʋ-za-sob pime kpɛ n a ɩ̃ ƴã-ganɩ́, ɛ́ a lɔw de a ɩ̃ ƴã-gan za. Pʋl-vʋ̃ɔ bʋʋrɛ bʋʋrɛ na yi a Naaŋmɩn zie a cɔrɩ nɩ a ɩ̃ ƴãw.
Sore e, fʋ nyɛ̃ nɩ mɛ̃ nɩ suur, ɛcɛ ta ƴãw mɛ̃ dɔwrʋ ɛ, ta kpãa mɛ̃ nɩ su-yãyaar ɛ.
Zerizalɛm i, ɩ̃ na lɩɛb'ɩ a fʋ ƴãw: ɩ̃ na ɩ na fʋ lɛb vɩɛl, mɛ̃ zɩ̃ɛ n'a ɩ̃ ɩ n a, ɩ̃ na ɩ n a fʋ dɛwr za a yi.
Alɛ n'a so a Sore suur ìr a ʋ nɩ-bʋʋrɛ ƴãw. Ʋ̀ zɛw nɩ a nũu ŋmɛ n bɛ. A tan gbiwri na, a kũuni gã nɩ a sɛ́ɛ pʋɔ mɛ̃ sagɛ a. Ɛcɛ a na saa ɩ à ŋá a, a Sore suur bɛ ɓãa ɩ, ɛ́ a ʋ nũu cãà zɛw.
Ɛcɛ a bɛl a, bɛ tɩ gaarɩ na, ɩ a ʋ Vʋʋrʋ Sõw ʋ tɛr pʋ-sãwna. Lɛ n'a a Sore tɩ lɩɛbɩ a bɛ dɔ̃ sob zɛb'ɩ bɛ.
A Sore na ír ʋ na bɛr a Ɩsɩrayɛl nɩbɛ pʋɔ, a tu a wulu sɛbɛ ŋa pʋɔ wõ-taa ŋmɛ-ƴãw, ɛ́ a na ɩ n a ʋ zu-bio.
