Ruth 2:12 - De Beebaa Dabu

¹² Tagi Maolunga gi hagamanuuia ina goe i hiidinga au hegau gu hai, gai gi laumalie doo manuuia mai i daho Tagi Maolunga, go de Maadua o de gau Israel, oou gu humai naa gi ono daha gi buibuia goe i lalo de malu o luoono bakau.”

Ruth 2:12 Iomraidhean Croise

Psalm 17:8

Buibuia mai au bei dagodo o tama legalega eidu o doo ganomada, ma de hagammuni au i lalo de malu o luoo bakau,

Psalm 19:11

Muna nei e hagakana ange lodo o doo dangada hai hegau; gai e laumalie donu de hagaoanga o tangada e daohia muna nei.

Psalm 36:7

De Maadua, e hagamogomogo mmao doo abodonu! Gai dangada e buibui i lalo de malu o luoo bakau.

Psalm 57:1

De Maadua, lodo aloha mai gi de au, lodo aloha mai gi de au, go koe dogu buibui; au e ssala dogu buibui i lalo de malu o luoo bakau, ga dae ai gi de sili de madangi mmahi.

Psalm 58:11

Dangada e hagataba naa, “Ni muna abodonu, e dahi donu hagaoanga olaadeu e heohi; gai e dahi donu Maadua e hagamodu ina muna o henua i lalo.”

Psalm 61:4

Au e noho naa i lo too hale ga hano ai, gai gi noho baba i lalo de malu o luoo bakau. Selah

Psalm 63:7

I hiidinga go koe dogu bale, au e daahili naa ma de malangilangi i lalo de malu o luoo bakau.

Psalm 91:4

Ia e haoli naa goe i lalo ono hulu manu ma de buibui goe i lalo luoono bakau; dono hai hegau i de muna abodonu go doo mee hungihungi ma doo buibui.

Proverbs 11:18

Tangada baubau e kave denga hagaoanga hagasenga, aagai tangada e hai hegau laa i de mee heohi, e kave donu de hagaoanga abodonu.

Proverbs 23:18

Ni muna abodonu, e dahi donu au tali ange gi de masavaa e humai, gai dau tali e dee helui naa donu.

Jeremiah 31:16

E hagadaba Tagi Maolunga, “Duudia dau dangi gai sooloa oo loimada, go hiidinga e dahi donu hagaoanga o au hegau, go Tagi Maolunga e hagadaba. Gai gilaadeu e aahe mai naa i de henua o de hagadaumee.

Matthew 23:37

“Jerusalem, Jerusalem! De aduhale ne daia ga maakau denga pelaabisi ma de maga i hadu, gilaadeu ne hai gi loomai gi oo daha! Gu dee modu donu dogu lodo e hagabudu mai au dama, bei de hai a de gaagoo hahine e hagabudu ai laa ana dama i lalo luoono bakau, aagai koe e dee lodo!

Matthew 5:12

Goodou llodo danuaa ma de malangilangi, go hiidinga e laumalie doodou hagaoanga i de langi. Gilaadeu ne vaivai hai donu hogi denga pelaabisi i mua.

Matthew 6:1

“Goodou kana dagidiiloo gi dee haia e goodou denga hegau danuaa gi gidee ai e dangada. Noo goodou e hai mee nei, gai e deai donu oodou hagaoanga mai i daho doodou Damana i de langi laa.

Luke 6:35

Aagai goodou aaloha ange gi oodou hagadaumee, ma de hai ange tanuaa gi gilaadeu, ma de gaavange oodou mee gi dangada, gai e dee maanadu bolo gilaadeu gi suuia adu oodou mee. Gai gi laumalie ai doodou hagaoanga, gai goodou gu hagabinga bolo ni dama nii de Ia Maolunga Mmao laa, go hiidinga ia e abodonu ange gi gilaadeu e dee hagaahe ange de abodonu ma de gau baubau.

Colossians 2:18

Goodou gi dee dugua ange dahi dangada gi haia gi dee dau goodou, i dana hagammahi adu goodou gi hagamaolalo i de hadu muna, ma de daumaha ange gi denga dangada de langi, ma de tala hanu midi hagaago ange, ga hagasoenga ai i teai hiidinga, i ana maanadu dee heohi.

2 Timothy 1:18

(Tagi Maolunga gi haia gi maua e ia tegi mai i daho Tagi Maolunga i de laangi laa!) Gai koe gu iloo dagodo o ana hegau lagolago ne bale mai ai au i Ephesus.

2 Timothy 4:8

Deenei ai, de hau o de heohi gu hagadabena mai donu gi de au, go de hau a Tagi Maolunga, de ia hagamodu muna heohi, e hagao mai ai au i de laangi laa, gai e dee go au donu huu, aagai se mee ange gi gilaadeu alodahi e malangilangi i dono hagasula mai.

Hebrews 11:26

Ia ne hagadaba bolo de hagangadi mee ina i hiidinga o Klisdo, e hagamogomogo ange i de lava o Egypt, go hiidinga ia ne galo ange gi de hagaoanga i muli mai.

Hebrews 11:6

Noo e deai se gai, aagai e dee maua donu i de hagamalangilangi de Maadua, go hiidinga tangada e humai gi de Maadua, gi hagadonusia bolo e dahi donu Maadua, gai ia e hagao ange gilaadeu e hagaduu ngae e saalaa ia.

Hebrews 6:10

Gai de Maadua e dee haisala donu dana hagamodu; ia e dee ngalo naa donu oodou hegau danuaa, i doodou bale ange ono dangada dabu, i hiidinga doodou aaloha i de ia, gai goodou goi duudagi donu huu de bale ange gilaadeu iainei.

Ruth 1:16

Aagai a Ruth ne hai ange, “Aude usuusuhia mai au gi hano gee mai i oo daha, aabe gi dee daudali adu i de goe. Be go hee oou e hano aagena, gai go kilaa hogi oogu e hano ai, gai be go hee oou e noho ai, gai go kilaa hogi oogu e noho ai. Oo dangada go ogu dangada, gai doo Maadua go dogu Maadua.

Ruth 2:11

Aagai a Boaz ga basa ange, ga hai ange, “Dangada gu tala mai gi de au dagodo o mee alodahi aau gu hai ange gi doo saulaba, i dua de magau o doo bodu. Koe ne dugu doo damana ma doo dinana, ma doo henua, gai koe ga humai ga noho madali dangada aau tee iloo i mua.

Ruth 2:13

Gai a Ruth ga hai ange, “Dogu dangada aamua, gu laumalie doo abodonu mai gi de au. Koe gu hagaaneane ogu lodo ma de basa danuaa mai gi de au, doo hahine hai hegau, e dee galemu donu au e dee go dahi oo hahine hai hegau.”

Ruth 4:15

Ia e hai naa ga ahe ange goe ga mahi, ma de tilo adu goe i doo madumadua. Doo saulaba e aloha i de goe, ia e kii ange de haigamaiana adu gi de goe i denga dama daane e dogohidu, go ia ne haanau ina ia.”

1 Samuel 24:19

Noo tangada gu gidee dono hagadaumee, gai ia e dugua naa ia gi hano? Deenei ai, Tagi Maolunga gi haia adu tanuaa gi de goe, i hiidinga dau hegau ne hai mai nei gi de au anailaa nei.

1 Samuel 24:20

Gai tilo, au e iloo bolo koe e sula naa donu ga hodooligi, gai de nohoanga hodooligi o Israel e duu naa ga makaga i oo lalo.