Revelation 8:5 - De Beebaa Dabu

⁵ Gai tangada de langi laa ga kave de mee e dudu ai laa mee maanongi, ga hhao ange de ahi gi ono lodo ga maga iho gi henua i lalo. Gai gu babaa denga hatuli, ma de ngaolo, gai gu labalaba denga uila, gai gu ngalungalue de henua.

Revelation 8:5 Iomraidhean Croise

1 Kings 19:11

Gai ia ne hai ange, “Sao mai hannoo duu i honga de mounga i mada luu mada o Tagi Maolunga. Gai tilo, Tagi Maolunga e humai naa laa oo gaogao.” Gai dahi madangi laumalie ma de mmahi ne dau mai ga oha denga mounga ma de dili iho denga hadu, i mada i mua o Tagi Maolunga, aagai Tagi Maolunga e dee noho i lo te madangi laa. Dua de madangi laa gai de henua gu ngalungalue, aagai Tagi Maolunga e dee noho i de ngalungalue o de henua.

Psalm 18:13

Tagi Maolunga e basa mai i de langi bei de babaa denga hatuli, de Ia Maolunga Mmao laa gu hai gi langona dono leo, i magavaa o denga dibadibaa haisi ma denga maga ahi.

Exodus 19:16

Gai taiao huu o de hagadolu laangi, gai gu babaa denga hatuli ma de labalaba denga uila, gai de hagausinga maadolu gu haoli de mounga laa, gai gu kona de nganangana de ili o de hanga manu. Gai dangada alodahi i de mommee nnoho gaainga gu bolebole i delaadeu maatagu.

Isaiah 29:6

gai Tagi o denga hagabuulinga hebagi e humai naa bei de hatuli ma de ngalungalue o de henua ma de leo mmahi, madali denga ssio ma de madangi aama de ahi e dudu ai mee alodahi.

Isaiah 30:30

Gai Tagi Maolunga e hai naa gi langona e dangada dono leo maolunga, ma de gidee de hagaabo dono lima i dono bole, ma de ahi ula mmahi e duungia laa mee, madali de langi pala, ma de madangi, aama dibadibaa haisi.

Isaiah 66:6

Hagalaangona adu de hellumi o dangada i de aduhale, hagalaangona adu de hagalongaa o dangada i de temple! Go de leo o Tagi Maolunga e suuia ange hegau a ono hagadaumee.

Jeremiah 51:11

Hakaa ina denga dao! Gai hagauda ina denga mee hungihungi! Tagi Maolunga gu hagangaalue lodo o denga hodooligi o de gau Media, go hiidinga ia gu baba ange e oha Babylon. Tagi Maolunga e sui ange naa ana mee ne hai ange gi dono temple.

Leviticus 16:12

Gai ia gi haoa gi honu dahi gumedi i denga maga ahi i honga de mommee o ssigidaumaha i mada luu mada o Tagi Maolunga, ma de hhao gi hoohonu luoono lima i denga mee maanongi gu mmili gi lligi; gai ia ga kave mee laa gi lo te malo buibui.

Zechariah 14:5

Gai goodou e saavini naa ga hulo laa gaogao de geelonga e vaaea laa denga mounga, go hiidinga de geelonga laa e dae laa gi Azal. Gai goodou e saavini naa ga hulo gee, e dagodo be goodou e saavini e hulo gee mai i de ngalungalue o de henua, i laangi o Uzziah ne hodooligi ai i Judah. Gai Tagi Maolunga dogu Maadua e humai naa madali de gau dabu alodahi.

Matthew 24:7

Denga huaahenua e hagadau hebagi naa, denga nohoanga hodooligi e hagadau hebagi naa, gai e hai naa denga onge ma de ngalungalue o de henua i denga mommee.

Luke 12:49

“Au ne humai e tili ange de ahi gi honga henua i lalo, gai mee naa de ahi gu lava donu i de haula!

Acts 16:26

De masavaa laa donu huu gai gu ngalungalue de henua, gai de hale pono laa alodahi gu ngalungalue; ono abaaba alodahi gu maahuge, gai denga daula baalanga e noonooa ai laa dangada gu maatala.

Acts 4:31

Gai ga lava huu delaadeu dalodalo, gai gu ngalungalue de mommee olaadeu e hagabuni ai laa. Gai gilaadeu gu odi i de hoohonu i de Hagasaalunga Dabu, gai gilaadeu ga tala muna a de Maadua i de lo taane.

Revelation 11:13

De masavaa laa donu huu gai gu kona de ngalungalue o de henua, gai dahi diba i diba e madaangahulu o de aduhale laa gu maoha. Gai gu maakau e hidumano dangada i de ngalungalue o de henua, gai dangada e doe gu kona mmao de maatagu, gai gilaadeu ga hagamahamaha de Maadua o de langi.

Revelation 11:19

Gai gu hhuge de temple o de Maadua i de langi, gai au gu gidee de ngavesi o dana hagatoo donu hagaheloongoi i lo tono temple. Gai gu labalaba mai ai denga uila, ma de nguu lo te moana i de babaa o denga hatuli, ma de ngalungalue o de henua, aama de too iho o denga dibadibaa haisi nnui.

Revelation 4:5

Gai de nohoanga laa e labalaba mai ai denga uila, ma de babaa ai denga hatuli. Gai mada i mua o de nohoanga laa iai e hidu laama gu haaula. Aanei denga hagasaalunga e hidu o de Maadua.

Revelation 6:12

Gai de masavaa aana ne oha ai de ono mee hagamakaga laa, gai au ne gidee bolo gu kona de ngalungalue de henua; de laa gu gohu bei de malo daladala uli, gai de maasina alodahi gu mmea bei denga dodo,

Revelation 8:3

Gai dahi dangada de langi ange laa ne humai ga duu i gaogao de mommee o ssigidaumaha, ma dahi mee goolo e dudu ai laa mee maanongi. Gai gu gaavange gi de ia hanu mee maanongi lagolago mmao, gai ia ga hai ai ssigidaumaha madali dalodalo a dangada o de Maadua alodahi, i honga de mommee o ssigidaumaha goolo i mada i mua o de nohoanga hodooligi laa.