Revelation 14:4 - De Beebaa Dabu

⁴ Gai de gau laa alodahi ni daane gilimalali, gilaadeu tigi hulo gi daho denga haahine e hai ai gi hakino gee gilaadeu. Aanei gilaadeu e daudali ange laa i Ssiibi Gauligi i mommee alodahi oona e hano aagena. Gilaadeu nei gu lava i de hagao ma gu hagaola mai i magavaa o dangada e hai ai denga hua i taamada ange gi de Maadua ma Ssiibi Gauligi.

Revelation 14:4 Iomraidhean Croise

Psalm 45:14

Ia e gahu i malo maaga hagalaagii ga dagi ai gi daho de hodooligi, ono soa go denga bua mmoe e daudali mai i ono dua, ma de gaamai ia gi oo daha.

Psalm 74:2

Manadua doo huaadangada aau ne hagao madagidagi, go de aamuli aau ne hagaola e hai ai oo dangada, de mounga go Zion, go doo mommee e noho ai.

Song of Songs 1:3

Doo vai hagamanongi e manongi danuaa; doo ingoo e bei de lolo manongi gu llingi laa, deelaa ai, denga damaa hine e aaloha i de goe.

Song of Songs 6:8

E dinoono bodu o de hodooligi, ma e dinovalu ono bodu laa daha, ma denga bua mmoe soa mmao;

Jeremiah 2:3

Israel ne hagadabu ange gi Tagi Maolunga, gai go hua aana ne hagihagi i taamada. Dangada alodahi ne oohaa ina ia gu haisala; gai de hai ngadaa ne duu ange gi gilaadeu, ’ ” go Tagi Maolunga e hagadaba.

Amos 6:1

E vakaa naa gilaadeu e nnoho duadonu i Zion, ma gilaadeu e nnoho paba i honga de mounga go Samaria, goodou denga daane dau o de huaahenua e maolunga i denga huaahenua, go gilaadeu o de gau Israel e hulo aagena!

Matthew 19:12

Go hiidinga e hanu donu dangada ne haanau mai ni eunuch, gai hanu go dangada ne haia gilaadeu ga ni eunuch — aagai hanu ne hilihili de mouli bei denga eunuch, i hiidinga o de nohoanga hodooligi o de langi. Tangada e maua i de kave muna nei, gai ia gi gaavee gi daohia.”

Matthew 25:1

“De masavaa laa gai de nohoanga hodooligi o de langi e bei naa dagodo o tinoangahulu bua mmoe, e kave laa alaadeu laama e hulo ai e hedae ange gi taane gu dai hagahai bodu.

Matthew 8:19

Gai dahi daane sisi ne humai ga hai ange gi Iesu, “Tangada Agoago, au e lodo e daudali adu i de goe i mommee alodahi oou e hano aagena.”

John 10:27

Agu ssiibi e langona dogu leo; au e iloo gilaadeu, gai gilaadeu e daudali mai i de au.

John 12:26

Be goai e hai hegau mai gi de au, gai ia gi daudali mai i de au. Gai go hee naa huu oogu iai, gai go kilaa hogi o dogu dangada hai hegau iai. Gai dogu Damana e hagadubu tangada e hai hegau mai gi de au.

John 13:37

Peter ne ssili ange gi de ia, “Tagi Maolunga, gu aha gu dee maua ai e au i de daudali adu i de goe iainei? Au gu baba ange donu e gaavange dogu mouli i oo hiidinga.”

John 8:12

Gai Iesu ga ahe ange ga basa ange gi gilaadeu, ga hai ange, “Go au de maalama o henua i lalo. Tangada e daudali mai i de au e dee seesee i de gohu, gai ia e hagamaalama i de maalama o de mouli.”

Acts 20:28

Goodou diiloo iho goodou aama de hagabuulingaa ssiibi alodahi, go gilaadeu a de Hagasaalunga Dabu gu dugu adu goodou gi dagina, gai goodou ga hagaloosi ange ai de nohoanga dabu o de Maadua, aana ne hagao laa i ono dodo donu.

1 Corinthians 16:15

Denga daina, goodou gu iloo bolo go Stephanas ma dono huaabodu hugadoo ne hagadonusia i taamada i Achaia, gai ne kona mmao delaadeu bale ange dangada o de Maadua; au e hai adu gi goodou,

1 Corinthians 6:20

goodou ne hagao ina i dahi hagaoanga laumalie. Deenei ai, goodou hagamahamaha ina de Maadua i oodou angaanga.

1 Corinthians 7:28

Aagai noo koe e hai bodu, gai koe e dee haisala, gai noo dahi bua moe e hai bodu, gai ia e dee haisala hogi. Aagai dangada e hai bodu laa e tuu ange donu gi denga hai ngadaa o de mouli nei, gai au e lodo e buibui goodou i mee nei.

2 Corinthians 11:2

Au gu lodo gaiaa i oodou hiidinga i de lodo gaiaa o de Maadua. Au ne hagatoo donu e hai goodou go de hagababa gilimalali o dahi daane, go Klisdo.

Ephesians 1:14

go de ia e hagadonu ai taadeu boolonga ga dae ai gi taadeu kave de mee gu bolo mai laa gi gidaadeu, gai gidaadeu ga tuhi ai dono mahamaha.

Ephesians 5:27

gai ia ga kave ai gi niiona de nohoanga dabu gu hagamahamaha laa, gu deai mee baubau iai, be ni mee vinivini iai, aabe ni mee bei mee nei iai; gai gu dabu aama teai mee baubau iai.

1 Timothy 4:3

Gilaadeu e hai naa dangada gi dee hai bodu, ma de hai gilaadeu gi dee gaina gai a de Maadua gu hai e gai dangada, gai ni mee niilaadeu e hagadonusia ma de iloo de muna abodonu e hagaahe ange ai de abodonu.

Hebrews 12:23

aama de nohoanga dabu o denga ganimua, go dangada gu sisi olaadeu ingoo i de langi. Goodou gu loomai gi de Maadua, de Ia Hagamodu Muna o dangada alodahi, ma hagasaalunga o dangada e heohi ma de hoohonu abodonu olaadeu dagodo,

James 1:18

Gai ia ne lodo e hagadili gidaadeu i de muna abodonu, gai ia ga hai ai gidaadeu go hua i taamada o mee alodahi aana ne hai.

1 Peter 2:9

Aagai goodou se huaadangada gu lava i de hili, goodou ni dangada haimeedabu niio de Hodooligi, se huaahenua dabu, gai se huaadangada hagamogomogo niio de Maadua, gai goodou ga tuhi ai de ia ne hagahia goodou, ma de hagassao mai goodou i lo te gohu, ga gaamai gi de maalama danuaa mmao.

Revelation 17:14

Gai gilaadeu e hulo naa ga hebagi ange gi Ssiibi Gauligi, aagai Ssiibi Gauligi e hagadee kii naa gilaadeu, go hiidinga go ia Tagi Maolunga o denga dagi, ma de Hodooligi o denga hodooligi. Gai dangada madali ia gu lava i de hagahi, ma de hili, gai gilaadeu e hai hegau i de mee abodonu.”

Revelation 21:22

Gai au tee gidee dahi temple i lo te aduhale laa, go hiidinga de temple i kilaa go Tagi Maolunga de Maadua Mmahi Mmao laa aama Ssiibi Gauligi.

Revelation 21:23

Gai e deai hogi se laa aabe se maasina o de aduhale laa, i hiidinga go de mahamaha o de Maadua e hagamaalama ina kilaa, gai de laama e hagamaalama ina kilaa go Ssiibi Gauligi.

Revelation 3:4

Gai goi hanu huu momo dangada i de nohoanga dabu i Sardis tigi vaigelegele olaadeu malo; gai gilaadeu e kahu naa i malo tea ga seesee ai madali au, go hiidinga gilaadeu e pau ange aagena.

Revelation 5:9

Gai gilaadeu ne daahili i dahi daahili hoou ga hagataba, “Koe e bau ange gi de kave de beebaa mulo ga oha ono mee hagamakaga, go hiidinga koe ne daa ga magau, e hagao ai dangada i oo dodo ga hagaahe mai gi de Maadua, mai i denga aamuli alodahi, ma dangada e pasa i denga hagadaagangaa muna alodahi, ma denga huaadangada aama huaahenua alodahi.