Philippians 1:10 - De Beebaa Dabu

¹⁰ gi maua ai e goodou i de buni ange gi de mee heohi, gai goodou gu gilimalali ma teai oodou baubau i de laangi o Klisdo e ahe mai ai.

Philippians 1:10 Iomraidhean Croise

Genesis 20:5

E aha, ia tee hai mai laa bolo de hine nei se daina niiona? Gai de hine nei ne hai mai hogi, ‘Ia go dogu daina daane’? Gai au ne hai de hegau nei i de gilimalali tagi, gai luoogu lima e gilimalali hogi.”

De Beebaa go Job 12:11

E aha, talinga e dee hagatale laa denga muna, bei de hai a de alelo e mami ange ai laa denga gai?

De Beebaa go Job 34:3

i hiidinga talinga e haide dagodo o denga muna, bei de hai a de alelo e mami ai denga gai.

Micah 3:2

Goodou ni dangada e kino i tanuaa gai e llodo i de baubau; goodou e bei denga manu e holeholea laa gili o ogu dangada ma de aau gee kano i olaadeu ivi.

Matthew 16:23

Iesu ne huli dua ga hai ange gi Peter, “Satan, hannoo gi ogu dua! Koe se dangada e buibuia ngau. Go hiidinga au maanadu e dee bei lodo o de Maadua, aagai e bei lodo o dangada.”

Matthew 26:33

Peter ne hai ange gi de ia, “Ga odi naa donu gilaadeu alodahi i de tili goe, aagai au e dee tili donu goe.”

John 1:47

Gai ga gidee huu e Iesu Nathanael i dono masavaa ne dae mai ai, gai ia ga tala ono dagodo ga hagadaba, “Taane nei se daane Israel abodonu, gai e deai donu se muna hhadu i ono daha!”

John 3:20

Be goai e haia de baubau e kino donu i de maalama, gai ia e dee lodo e humai gi de maalama, kana ssula mai ana hegau baubau.

Acts 24:16

Deenei ai, au e hagaduu ngae e hai gi heohi tagi i ogu lodo ange gi de Maadua aama ange gi dangada.

Romans 12:2

Goodou gi dee hagadulagi ange gi dagodo o henua i lalo nei, aagai goodou gi suuia oodou dagodo, i de sui hagahoou oodou maanadu, gi maua ai e goodou i de hagatale ange ma de tonu abodonu gi lodo o de Maadua — e danuaa laa, gai e hagamalangilangi ma de heohi abodonu.

Romans 12:9

Oodou aaloha gi se mee abodonu; goodou kino i de baubau, gai daohia de mee danuaa.

Romans 16:17

Denga daina, au e dangidangi adu goodou gi dagidiiloo dangada e hagadee heloongoi ina laa magavaa o dangada, ma de haia mee e dee bei de hai oodou gu agoago ai. Goodou gi dee hagabuni ange gi gilaadeu.

Romans 2:18

gai koe e iloo ono mee e lodo ai ma de buni ange gi de mee e heohi, i hiidinga koe gu agoago i de hainga;

Romans 7:16

Gai noo au e hai mee aagu e dee lodo e hai, gai e bei au gu hagadaba bolo de hainga e danuaa.

Romans 7:22

Au e malangilangi i de hainga a de Maadua, i ogu lodo alodahi,

Romans 8:7

Go hiidinga maanadu a de angaanga e hagadaumee ange donu gi de Maadua, ma tee hagallongo ange gi hainga a de Maadua, gai e dee maua donu i de hai mee nei.

1 Corinthians 1:8

Gai go ia e hagammahi ina oodou lodo ga dae ai gi de hagaodi, gai goodou gu dee hagabaubau i de laangi o taadeu Dagi Maolunga go Iesu Klisdo e humai ai.

1 Corinthians 10:32

Goodou gi dee hagadaemaha ina lodo o de gau Ssuu, be go de gau Greek, aabe go de nohoanga dabu o de Maadua,

1 Corinthians 8:13

Deenei ai, noo denga gai e hai ga baageaa lodo o dogu daina, gai au gi dee ahe ange donu gi gaina hanu giidagi, kana haia e au ga doo dogu daina.

2 Corinthians 1:12

Gai deenei demaau mee e tala tuhi ai, ma de tala hagadonu o tagi i omaau lodo: bolo gimaau ne hai hegau i de mee heohi i henua i lalo ma adu hogi gi goodou, i de lodo se muna abodonu, gai e dee se mee ne hai i de heiangi o henua i lalo, aagai mai i de abodonu o de Maadua.

2 Corinthians 2:17

Gai gimaadeu e dee bei dagodo o dangada soa, e haia laa muna a de Maadua bei goloa e hagao laa gi daha gi lagolago ai olaadeu mee. Aagai gimaadeu e hai hegau i de muna abodonu, i demaadeu agoago i mada luu mada o de Maadua, i lodo o Klisdo, bei de hai a de Maadua gu hagadabu ai gimaadeu.

2 Corinthians 6:3

Gimaadeu tee hagahai ngadaa goodou i dahi mee, gi dee hagabaubau ina ai demaadeu duuhanga hegau,

2 Corinthians 8:8

Au e dee tala hagasoe adu donu huu muna nei gi goodou, gai au e lodo e tilo be oodou aaloha ni mee abodonu, i dagu tala adu de lodo mmahi o de gau ange laa i de bale.

Galatians 5:11

Denga daina, noo au goi agoago ange huu dangada gi tuu dagaholiage, gai gu aha goi vaivai haia ai nei huu au? E bei ai naa ssele e laavea ai laa dangada i dagodo o de laagau lui gu hagadeai.

Ephesians 4:15

Aagai gidaadeu gi daalaa de muna abodonu i de aloha, gi hagadagadaga age ai taadeu maatua i lodo o Klisdo, go de Biho.

Ephesians 5:10

gai haia gi iloo e goodou be aahee mee e hagamalangilangi ina Tagi Maolunga.

Ephesians 5:27

gai ia ga kave ai gi niiona de nohoanga dabu gu hagamahamaha laa, gu deai mee baubau iai, be ni mee vinivini iai, aabe ni mee bei mee nei iai; gai gu dabu aama teai mee baubau iai.

Ephesians 6:24

De abodonu gi dagodo i daho dangada alodahi, e aaloha laa i taadeu Dagi Maolunga go Iesu Klisdo, i de aloha e deai laa se helui.

Philippians 1:16

Gilaadeu e agoagona laa Klisdo i de aloha, e iloo bolo au ne tili ange gi lo te hale pono, gai au ga tala hagadonu ai de longo danuaa.

Philippians 1:6

Gai au e iloo abodonu bolo de Maadua ne damadaa ina laa de hegau danuaa i oodou lodo naa, e duudagi naa donu de hegau naa ga dae ai gi dana hagalava i de laangi o Klisdo Iesu e ahe mai ai.

Philippians 2:16

i doodou hagammahi ga daohi muna o de mouli, gi maua ai e au i de tala tuhi i de laangi o Klisdo e humai ai, bolo au tee ngadi savini aabe teai haigamaiana o agu hegau.

1 Thessalonians 3:13

gai ia ga hagammahi ai oodou lodo, ga hai gi odi ange danuaa oodou dagodo, gai goodou gu dabu i mada luu mada o de Maadua taadeu Damana, i de humai o taadeu Dagi Maolunga go Iesu madali ono dangada dabu alodahi.

1 Thessalonians 5:21

aagai hagataalea ange mee alodahi; gai daohi mee danuaa.

1 Thessalonians 5:23

De Maadua o de baba gi haia gi dabu abodonu goodou. Gai oodou hagasaalunga ma oodou lodo aama oodou angaanga alodahi gi gilimalali, i de masavaa o taadeu Dagi Maolunga go Iesu Klisdo e humai ai.

Joshua 24:14

Gai goodou maatagu i Tagi Maolunga ma de daumaha ange gi de ia i de muna abodonu, ma de hai hegau ange gi de ia i de mee abodonu. Goodou dilia denga diinonga a oodou dubuna ne daumaha ange aagena i de baasi laa o Euphrates ma Egypt, aagai daumaha ange gi Tagi Maolunga.

1 John 4:1

Ogu soa hagamogomogo, goodou gi dee hagadonusia denga hagasaalunga alodahi, gai hagataalea denga hagasaalunga ga tilo be gilaadeu ni mee mai i daho de Maadua, go hiidinga gu soa pelaabisi hadu muna gu hulo saele i henua i lalo.

Revelation 2:2

Au e iloo dagodo o au hegau; koe e hagaduu ngae ma e hai hegau ma de golomagi oo lodo, gai koe e dee malangilangi i de gau baubau, aagai koe gu hagatale dagodo o dangada e hagataba laa bolo gilaadeu ni dangada tala, gai e dee se muna abodonu, gai koe gu gidee bolo gilaadeu ni dangada donu hadu muna.