Micah 1:8 - De Beebaa Dabu

⁸ Go hiidinga o de mee nei oogu e dangi ai ma de dangi see; au e aau naa ogu mee vae ma de gilisau ga hano saele ai. Au e dangi naa bei denga jackal, ma de gonogono bei de owl.

Micah 1:8 Iomraidhean Croise

2 Kings 18:13

Gai de madaangahulu ma haa huu ngadau o Hezekiah ne hodooligi ai, gai Sennacherib, de hodooligi o Assyria, ne humai ga hebagi ange gi Judah, ga kave denga aduhale buibui i kilaa.

Esther 4:1

Gai de masavaa huu a Mordecai ne langona ai mee gu hai laa, gai ia ga saesae ono malo, ga gahu i malo daladala aama de hagamalili ange lehu gi honga dono biho. Gai ia ne oo ga dangi ga hano ai gi lo te aduhale;

De Beebaa go Job 30:29

Au gu bei dagodo o denga jackal, gai se soa niio denga ostrich.

Psalm 102:6

Au gu bei de owl lodo henua; ma de owl i denga mommee gu maoha laa.

Isaiah 13:21

Aagai denga manu lodo henua e nnoho naa i kilaa, denga jackal e hhao naa lodo olaadeu hale ga hoohonu; denga owl e nnoho naa i kilaa, gai denga guudi de vao e saavini saele naa i kilaa.

Isaiah 13:22

Denga hyena e koo naa i lodo ono hale buibui makaga, gai denga jackal i lodo ono hale danuaa. Dono masavaa gu dae mai donu, gai ono laangi e dee daulooloa naa donu.

Isaiah 16:9

Gai au e dangi bei de dangi o Jazer, i hiidinga o de grapevine o Sibmah. Heshbon, Elealeh, au e hai gi ssali adu ogu loimada gi ooluu elunga! De malangilangi o dangada i de lleu o denga huamanu aama de malangilangi i masavaa o de hagihagi gu dee langona.

Isaiah 21:3

Deenei ai, au gu kona mmao dogu manavasaa ma de mmae, au gu mmae, bei de hine gu hai laa ono hagalangona; au gu ino gi lalo i hiidinga o agu mee gu langona, ma de madagu i agu mee gu gidee.

Isaiah 22:4

Deenei ai, au e hagadaba, “Goodou hulo gee mai i ogu daha; dugua donu huu au gi dangi see. Aude hagaaneane ina mai au, i dogu dangi i de oohaa o de aduhale o ogu dangada.”

Isaiah 32:11

Goodou denga haahine duadonu e bolebole naa; goodou denga damaa hine nnoho paba e maatagu naa! Goodou e hagaui oodou malo, gai ga nnoa oodou ungaalodo i malo daladala.

Jeremiah 4:19

Au gu duasala mmao, au gu duasala mmao, gai gu kona mmao dogu mmae! Au gu dee baba mmao ogu lodo! Gai gu bonabona age ogu lodo. Au gu dee maua i de noho donu ga dee muu. Go hiidinga au gu langona de ili de hanga manu, au gu langona de hagailoo o de hebagi.

Jeremiah 9:1

Mee naa gi se saalingaa vai dogu biho gai luoogu mada gi se vai e ssali ai loimada! Gai au ga dangi ai i de laangi ma de boo i hiidinga de daaia ga maakau o ogu dangada!

Jeremiah 9:10

Au e dangi naa ma de dangi see i hiidinga o denga mounga, ma de dangi i hiidinga o mommee iai helii i lodo henua. Mommee laa gu ngadi daakodo ma teai dangada e seesee ai, gu dee langona hogi leo o denga manu haangai ai. Gai denga manu llele ma manu dolodolo gu hulo gee mai i kilaa.

Jeremiah 9:19

De leo o tangi see e langona mai i Zion: ‘Gidaadeu gu odi i de maoha! Gidaadeu gu kona mmao i de dookaa. Gidaadeu e hulo gee donu i taadeu henua i hiidinga odaadeu hale gu maoha.’ ”

Ezekiel 32:18

“Tama a tangada, oo ma gi dangi i hiidinga o dangada soa o Egypt, haia ono dangada gi hulo gi de mommee o de gau maakau, madali dangada i denga huaahenua mmahi; gilaadeu gi hulo gi daho dangada gu loiho laa gi lo te geelonga laa:

Micah 2:4

De laangi laa gai dangada e hagadogaa naa i goodou; gilaadeu e hagammae manava naa goodou i dahi daahili, ga hai adu, ‘Gu vakaa loo gimaadeu; de henua o ogu dangada gu vaevae ma gu kave gee. Ia gu kave gee mee nei mai i de au! Ia gu gaavange omaadeu gelegele gi dangada ne hagadee kii ina gimaadeu.’ ”

1 Samuel 19:24

Gai ia ga hagaui hogi ono malo laa daha, gai ia ga basa pelaabisi i mada i mua o Samuel, ma de dagodo i kilaa i de laangi laa aama de boo laa. Deelaa ai, dangada ne hagataba, “A Saul gu dau nei hogi madali denga pelaabisi?”