Mark 15:34 - De Beebaa Dabu

³⁴ Gai ga daa huu tolu i de ahiahi, gai Iesu ga oo i de leo mmahi ga hagadaba, “Eloi, Eloi, lama sabachthani?”, e bei “Dogu Maadua, dogu Maadua, gu aha gu tili ai naa goe au?”

Mark 15:34 Iomraidhean Croise

Psalm 22:1

Dogu Maadua, dogu Maadua, gu aha gu tili ai naa goe au? Gu aha gu kona ai naa doo mmao gee ma dau dee hagaola dogu mouli, i dogu masavaa e mmae ai?

Psalm 27:9

Koe gi dee hagamuunia luoo mada i de au, koe gi dee alualumia doo dangada hai hegau i doo lili; go koe nogo balea mai au. De Maadua, dogu Ia Hagaola, koe gi dee kino aabe gi hano gee mai i ogu daha.

Psalm 42:9

Au e hai ange gi de Maadua dogu baba makaga, “Gu aha gu ngalo ai naa goe au? Ni haigamaiana aha dogu hano saele ma de daemaha ogu lodo, i de hagaduasala a ogu hagadaumee au?”

Psalm 71:11

ma de hagataba, “De Maadua gu dee anga ange gi de ia; gidaadeu ne doolohi ia ga poo, i hiidinga e deai donu se dangada e hagaola ina ia.”

Isaiah 41:17

De gau hagaau aloha ma gilaadeu e duasala e sala vai unu, aagai gu deai donu vai; olaadeu hakii gu mmasa gee naa i delaadeu hieunu. Aagai au, Tagi Maolunga, e basa ange naa gi alaadeu dalodalo, go au, de Maadua o Israel, au e dee tili donu gilaadeu.

Lamentations 1:12

Dangada e loomai laa ogu gaogao, goodou e dee aanga mai naa donu gi ogu dagodo? Goodou kalo mai diiloo. Gu dahi ange laa hagaduasala bei de hagaduasala, a Tagi Maolunga gu hai mai nei gi de au, i de laangi ne kona ai dono lili?

Lamentations 5:20

Gu aha goe gu ngalo ai naa gimaadeu i masavaa alodahi? Gai gu aha gu daulooloa ai naa dau tili gimaadeu?

Daniel 9:21

de masavaa aagu e tala ai agu muna ma de dalodalo, gai Gabriel, taane aagu ne gidee laa i de midi hagaago ange i taamada, ne hagamoolau ga lele mai gi ogu daha i de masavaa o ssigidaumaha i de ahiahi.

Matthew 27:45

Gai gu hagagohu honga de henua alodahi i de daa tuele ga dae ai gi tolu i de ahiahi.

Matthew 27:46

Gai tolu aoaa huu gai Iesu ga oo ga hagadaba, “Eli, Eli, lama sabachthani?”, e bei, “Dogu Maadua, dogu Maadua, gu aha gu tili ai naa goe au?”

Mark 15:25

Gai go ssiva i taiao alaadeu ne daudau ai ia i de laagau lui.

Mark 15:35

Gai ga langona huu e hanu dangada e tuu laa i kilaa ana muna, gai gilaadeu ga hagataba, “Tilo, ia e hagaagahi Elijah.”

Luke 23:44

De masavaa laa gu daa tuele, gai gu hagagohu honga de henua alodahi ga dae ai gi tolu i de ahiahi,

Luke 23:46

Gai Iesu ne oo i de leo mmahi, ga hagadaba, “Tamana! Au e dugu adu dogu hagasaalunga gi lodo luoo lima.” Gai ga lava huu i dana tala muna laa gai ia gu hai ana manava hagaodi.

Acts 10:3

Dahi laangi i daha tolu i muli de hualaangi gai ia ne hai dahi midi hagaago ange. Ia ne gidee dahi dangada de langi o de Maadua, ne humai ga hai ange gi de ia, “Cornelius!”

Hebrews 5:7

Gai de masavaa o Iesu ne mouli ai i henua i lalo, gai ia ne dalodalo aama de dangidangi i de dangi see aama de ssali ono loimada ange gi de ia e maua laa i de hagaola ia mai i de magau, gai de Maadua ne hagallongo dana dangidangi, i hiidinga ia e hai hegau i de hagadubu ma de madagu.